ដោយ: មុនីរាជ
ភ្នំពេញ: នៅព្រឹកថ្ងៃទី២៣ ខែសីហា នេះ សាលាឧទ្ធរណ៍ បើកសវនាការជំនុំជម្រះ លើសំណុំរឿងរបស់ សមាជិកគណបក្សសង្គ្រោះជាតិ និងសកម្មជន ចំនួន ១១នាក់ ទាក់ទងការដឹកនាំបាតុកម្ម រំដោះទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។
សមាជិកគណបក្សសង្គ្រោះជាតិ និងសកម្មជន ចំនួន១១នាក់ ត្រូវបានតុលាការ រាជធានីភ្នំពេញ កាលពីថ្ងៃទី២១ ខែកក្កដា ឆ្នាំ២០១៥ ផ្តន្ទាទោសដាក់ពន្ធនាគារ ពី ៧ឆ្នាំ ទៅ២០ឆ្នាំ ចោទប្រកាន់ពីបទ ដឹកនាំកុបកម្ម និងចូលរួមចលនាកុបកម្ម ទាមទារឲ្យមាន បើកទីលានប្រជាធិបតេយ្យ។
ជនជាប់ចោទចំនួន ៣នាក់ ដែលត្រូវតុលាការផ្តន្ទាទោស ដាក់ពន្ធនាគារ ២០ឆ្នាំ មានដូចជាៈ ១-លោក មាជ សុវណ្ណារ៉ា (ប្រធាននាយកដ្ឋានព័ត៌មាន និង ប្រព័ន្ធផ្សព្វផ្សាយ នៃគណបក្សសង្គ្រោះជាតិ)។ ២.លោក អឿ ណារិទ្ធ (មន្ត្រីទទួល បន្ទុកកិច្ចការ សាធារណៈ នៃគណបក្សសង្គ្រោះជាតិ និងជាជំនួយការផ្ទាល់ របស់អ្នកស្រី មូរសុខហួរ)។ ៣.លោក ឃិន រឿន ហៅ ឃិន ជំរឿន (ប្រធានចលនាយុវជន រាជធានីភ្នំពេញ នៃគណបក្សសង្គ្រោះជាតិ)។
ចំណែកជនជាប់ចោទ ចំនួន៨នាក់ ដែលត្រូវផ្តន្ទាទោស ដាក់ពន្ធនាគារ ៧ឆ្នាំ មានដូចជាៈ ១-លោក ស៊ុំ ពុទ្ឋី (សមាជិកក្រុមប្រឹក្សា ខណ្ឌច្បារអំពៅ នៃគណបក្សសង្គ្រោះជាតិ )។ ២-លោក កែ ឃីម ហៅវីន ឌី (សកម្មជនគណបក្សសង្គ្រោះជាតិ)។ ៣-លោក ទេព ណារិន (សមាជិកចលនាមហាជន របស់គណបក្សសង្គ្រោះជាតិ)។ ៤-លោក អ៊ុក ពេជ្រសំណាង (សកម្មជនគណបក្សសង្គ្រោះជាតិ )។ ៥- លោកនាង សុឃុន (ប្រធានសម្ព័ន្ធយុវជនជាតិខ្មែរ និងជាហេរញ្ញិកចលនាយុវជន គណបក្សសង្គ្រោះជាតិ នៅខណ្ឌច្បារអំពៅ)។ ៦-លោក សាន គឹមហេង (ប្រធានចលនាយុវជន គណបក្សសង្គ្រោះជាតិ និងជាសមាជិក ក្រុមប្រឹក្សាខណ្ឌទួលគោក)។ ៧-លោក សាន សីហៈ (លេខាធិការគណបក្សសង្គ្រោះជាតិ)។ ៨-លោក អាន បឋម ហៅ សុខុម (យុវជនគណបក្សសង្គ្រោះជាតិ )។
សូមរម្លឹកថា អំពើហិង្សា នៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ បណ្តាលឲ្យសន្តិសុខ ខណ្ឌដូនពេញ ៣៨នាក់ ដែលក្នុងនោះសន្តិសុខ ៥នាក់ រងរបួសធ្ងន់ធ្ងរ បន្ទាប់ពីមន្ត្រីជាន់ខ្ពស់ គណបក្សសង្គ្រោះជាតិ ដឹកនាំក្រុមបាតុករ ជិត ១.០០០ នាក់ ទាមទារឲ្យបើក ទីលានប្រជាធិបតេយ្យ ឡើងវិញ។ ក្រុមជនជាប់ចោទទាំងអស់ ត្រូវបានតុលាការ ចោទប្រកាន់ពីបទ ដឹកនាំកុបកម្ម បទញុះញង់ ឲ្យប្រព្រឹត្តឧក្រិដ្ឋជាអាទិ៍ និងបទហិង្សា ដោយចេតនាមានស្ថានទម្ងន់ទោស៕
No comments:
Post a Comment