និពន្ធដោយ : ជា ធីរិទ្ធ
ភ្លាមៗក្រោយពីស្ថានទូតតួកគីប្រចាំនៅកម្ពុជាស្នើជាផ្លូវការឲ្យកម្ពុជាបិទសាលាអន្តរជាតិហ្សាម៉ាន់ (ZAMAN) នោះ ក្រុមហ៊ុនហ្សាម៉ាន់ Co., Ltd បានចេញសេចក្តីថ្លែងការណ៍បញ្ជាក់ពីភាពស្អាតស្អំរបស់ខ្លួន និងទាមទារឲ្យឯកអគ្គរដ្ឋទូតតួកគីបង្ហាញភស្តុតាង និងការសម្រេចរបស់តុលាការជាសាធារណៈ។ សកលវិទ្យាធិការរងនៃសកលវិទ្យាល័យ ZAMAN ក៏ស្វាគមន៍ ប្រសិនបើក្រសួងការបរទេសកម្ពុជាចង់បើកការស៊ើបអង្កេតរកការពិត។
ការទាមទារឲ្យបិទសាលាអន្តរជាតិហ្សាម៉ាន់ពីសំណាក់រដ្ឋាភិបាលតួកគីម្តងហើយម្តងទៀត មិនបានធ្វើឲ្យក្រហ៊ុនហ្សាម៉ាន់ Co., Ltd នៅស្ងៀមនោះឡើយ។ នៅថ្ងៃនេះ តាមរយៈសេចក្តីថ្លែងការណ៍របស់ខ្លួន ក្រុមហ៊ុនហ្សាម៉ាន់ បានផ្តាំទៅលោក Ilhan Khemal Tug ឯកអគ្គរដ្ឋទូតតួកគីប្រចាំនៅកម្ពុជាជាថ្មី ឲ្យបង្ហាញភស្តុតាង និងសេចក្តីសម្រេចរបស់តុលាការជាសាធារណៈ ឬដល់អាជ្ញាធរចំពោះការចោទប្រកាន់របស់រដ្ឋាភិបាលតួកគីមកលើសាលាអន្តរជាតិហ្សាម៉ាន់ថា មានជាប់ពាក់ព័ន្ធនឹងចលនារដ្ឋប្រហាររដ្ឋាភិបាលបរាជ័យកាលពីថ្ងៃទី ១៥ ខែកក្កដា កន្លងទៅ។
សេចក្តីថ្លែងការណ៍របស់ក្រុមហ៊ុនហ្សាម៉ាន់ដដែល បានបញ្ជាក់យ៉ាងនេះថា៖« ពាក់ព័ន្ធនឹងភាពស្អាតស្អំរបស់យើងខ្ញុំផ្ទាល់ យើងសូមអញ្ជើញលោកឯកអគ្គរដ្ឋទូតម្តងទៀត ឲ្យបង្ហាញភស្តុតាង ឬសេចក្តីសម្រេចណាមួយដោយតុលាការ ដែលគាត់ចោទប្រកាន់យើង ទៅកាន់សាធារណៈជន និងអាជ្ញាធរ»។ សេចក្តីថ្លែងការណ៍ដែលផ្ញើជូនកាសែតភ្នំពេញប៉ុស្តិ៍នោះ សង្កត់ធ្ងន់បែបនេះទៀតថា៖«យើងមានជំនឿចិត្តលើភាពស្អាតស្អំរបស់អង្គភាពយើង។ ដូចនេះវាជាកាតព្វកិច្ចរបស់គាត់(លោក Ilhan Khemal Tug) ផ្ទាល់ថា មានភស្តុតាងអ្វី ដើម្បីបញ្ជាក់ការចោទប្រកាន់របស់ខ្លួន»។
ការឆ្លើយតបរបស់ក្រុមហ៊ុនហ្សាម៉ាន់ជាលើកទី ២ នេះ ធ្វើឡើងបន្ទាប់ពីលោក លោក Ilhan Khemal Tug ឯកអគ្គរដ្ឋទូតតួកគីប្រចាំនៅកម្ពុជា បានស្នើជាផ្លូវការទៅកាន់លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជាឲ្យបិទសាលាអន្តរជាតិហ្សាម៉ាន់ ទាំងថ្នាក់មតេយ្យ ថ្នាក់បឋម ថ្នាក់វិទ្យាល័យ និងទាំងថ្នាក់សកលវិទ្យាល័យ កាលពីថ្ងៃចន្ទទី ២២ ខែ សីហា។ សំណើនេះ ត្រូវលោក ប្រាក់ សុខុន ឆ្លើយតបទៅវិញថា ក្រសួងការបរទេសកម្ពុជានឹងធ្វើការពិនិត្យពិចារណានូវសំណើនេះ ជាមួយស្ថាប័នពាក់ព័ន្ធរបស់កម្ពុជា។
សារព័ត៌មានថ្មីៗ នៅមិនទាន់អាចទាក់ទងស្ថានទូតតួកគីប្រចាំនៅកម្ពុជា ឲ្យឆ្លើយតបនឹងសេចក្តីថ្លែងការណ៍របស់ក្រុមហ៊ុនហ្សាម៉ាន់ បាននោះទេនៅថ្ងៃអង្គារនេះ។ តែយ៉ាងណា លោក ឯកអគ្គរដ្ឋទូតតួកគី លោក Ilhan Khemal Tug បានប្រាប់កាសែតខេមបូឌា ដេលី កាលពីថ្ងៃចន្ទថា រដ្ឋាភិបាលតួកគី «កំពុងរំពឹងថា នឹងមានកិច្ចសហប្រតិបត្តិការពីរដ្ឋាភិបាលកម្ពុជា» នៅក្នុងការបិទសាលាដែលមានទំនាក់ទំនងជាមួយលោក ហ្វេទុឡា ហ្គូឡេន។ ប៉ុន្តែលោកបានបដិសេធមិនបញ្ជាក់ថា តើច្បាប់កម្ពុជាណាមួយដែលសាលាហ្សាម៉ាន់ប្រហែលជាបានរំលោភបំពាននោះឡើយ។
លោក ដេត សុខឧត្តម សកលវិទ្យាធិការរងនៃសកលវិទ្យាល័យហ្សាម៉ាន់ ប្រាប់សារព័ត៌មានថ្មីៗនៅព្រឹកថ្ងៃអង្គារនេះថា ដោយសារភាពស្អាតស្អំ សកលវិទ្យាល័យហ្សាម៉ាន់ គ្មានក្តីកង្វល់អ្វីឡើយចំពោះសំណើរបស់ស្ថានទូតតួកគីប្រចាំនៅកម្ពុជា។ «ក្នុងនាមសកលវិទ្យាល័យហ្សាម៉ាន់ ខ្ញុំអាចននិយាយបានថា យើងអត់មានព្រួយបារម្ភអ្វីសោះឡើយ។ យើងកំពុងតែមមាញឹកនឹងការងារសាលារបស់យើង ដើម្បីរៀបចំការប្រឡងអាហារូបករណ៍»។ លោក ដេត សុខឧត្តម អះអាងដូច្នេះហើយ ក៏បន្តបញ្ជាក់យ៉ាងនេះថា៖« យើងមិនទាន់ទទួលបានព័ត៌មានណាមួយថា ក្រសួងការបរទេសកម្ពុជា ឬស្ថាប័នពាក់ព័ន្ធ ចង់មកស៊ើបអង្កេតនៅសកលវិទ្យាល័យទេ។ តែយើងស្វាគមន៍បើក្រសួងចង់បើកការស៊ើបអង្កេតនោះ»។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានថ្លែងប្រាប់អ្នកកាសែតក្រោយពីជំនួបលោក ប្រាក់ សុខុន ជាមួយឯកអគ្គរដ្ឋទូតតួកគីកាលពីថ្ងៃចន្ទថា ភាគីកម្ពុជានៅមិនទាន់មានជំហរបែបណាមួយចំពោះសំណើរបស់រដ្ឋាភិបាលតួកកីឲ្យបិទសាលាអន្តរជាតិហ្សាម៉ាន់នោះទេ។ «យើងមិនទាន់អាចនិយាយជ្រៅពីបញ្ហានេះទេ។ ខ្ញុំអាចប្រាប់បានថា យើងកំពុងតែពិនិត្យជាមួយស្ថាប័នពាក់ព័ន្ធ។ យើងមិនទាន់ប្រកាន់ជំហរណាមួយទេ។ ខ្ញុំឧទាហរណ៍ ដូចប្អូនលើកឡើងថា អង្គការនេះជាអង្គការភេរវកម្ម វាបង្ហាញពីជំហររបស់យើងបាត់ទៅហើយ។ ដូច្នេះយើងមិនទាន់និយាយបានទេ»។
សាលាអន្តរជាតិហ្ស៉ាម៉ាន់ បច្ចុប្បន្នមានសិស្សចុះឈ្មោះសិក្សាប្រមាណ ២០០០ នាក់ ដើម្បីសិក្សាថ្នាក់មតេយ្យ ថ្នាក់បឋម ថ្នាក់វិទ្យាល័យ និងថ្នាក់សកលវិទ្យាល័យ។ បើតាមសេចក្តីថ្លែងការណ៍របស់ក្រុមហ៊ុនហ្សាម៉ាន់ សាលាអន្តរជាតិហ្ស៉ាម៉ាន់ ត្រូវបានគ្រប់គ្រងដោយក្រុមប្រឹក្សា ដែលក្នុងនោះមានបុគ្គលិករដ្ឋបាល និងលោកគ្រូអ្នកគ្រូតំណាងអោយប្រទេសចំនួន ១៥ ផ្សេងៗគ្នា៕
No comments:
Post a Comment