និពន្ធដោយ:រំដួល ចិត្រា
ភ្នំពេញ៖នៅថ្ងៃទី០១ កញ្ញា ខាងមុខនេះ គណៈកម្មាធិការជាតិរៀបចំការបោះឆ្នោត (គ.ជ.ប) នឹងរៀបចំបញ្ជីចុះឈ្មោះបោះឆ្នោតឃុំ-សង្កាត់ ដែលការចុះឈ្មោះនឹងប្រព្រឹត្តិទៅរហូតដល់ថ្ងៃទី២៩ វិច្ឆិកា ឆ្នាំ២០១៦។ ហើយការបោះឆ្នោតជ្រើសរើសមេឃុំ-សង្កាត់ នឹងប្រព្រឹត្តិទៅនៅថ្ងៃទី០៤ មិថុនា ឆ្នាំ២០១៧។ មុនការបោះឆ្នោតឃុំ-សង្កាត់មកដល់នោះ គណបក្សនយោបាយថ្មីចំនួន៥ បានត្រៀមខ្លួន និងកំណត់បេក្ខជនឈរឈ្មោះបោះឆ្នោតរួចរាល់ហើយ ។ គណបក្សទាំង៥នេះ ជឿជាក់ថា នឹងទទួលបានកៅអីឃុំ-សង្កាត់ ដើម្បីបំបែកអំណាចមូលដ្ឋានរបស់គណបក្សកាន់អំណាច។
ប្រធានគណបក្សអំណាចខ្មែរលោក សួន សេរីរដ្ឋា៖«ខ្ញុំត្រៀមបេក្ខជនឈរឈ្មោះ យ៉ាងហោចណាស់៨០០នាក់ (ស្មើ៥០ភាគរយ) ក្នុងចំណោមឃុំ-សង្កាត់ ចំនួន១៦៣៣ នៅតាមបណ្ដាខេត្តចំនួន១៥។ នៅតាមឃុំ-សង្កាត់ ទាំងនោះ បេក្ខជនឈរឈ្មោះរបស់យើងសុទ្ធតែមានសមាភាពខ្លាំង ជាងគណបក្សដទៃ ក្នុងការដឹកនាំឃុំ-សង្កាត់ ដែលគណបក្សខ្ញុំ បានបណ្ដុះបណ្ដាលកំណត់ទិសដៅឲ្យពួកគេបម្រើផលប្រយោជន៍ពលរដ្ឋ»។ លោកបន្ថែមថា៖«យើងនឹងគាស់រំលើងអំណាចស្ដេចត្រាញ់មន្ត្រីថ្នាក់មូលដ្ឋានគណបក្សកាន់អំណាច ដូច្នេះខ្ញុំ មានមហិច្ឆតា ចង់បានបេក្ខជនឈ្នះឆ្នោតជាថ្នាក់ដឹកនាំមូលដ្ឋានទាំង៨០០ឃុំ-សង្កាត់ ដែលមានបេក្ខជនឈរឈ្មោះ ។ ហើយបើមិនបានឈ្នះឆ្នោតជាមេឃុំ ឬចៅសង្កាត់ទេ គឺយ៉ាងហោចណាស់យើងបានជំទប់ទី១ ឬទី២ តែបើមិនបានជំទប់ទី១ឬទី២ទៀត ក៏យើងទទួលបានតំណែងក្រុមប្រឹក្សាឃុំ-សង្កាត់ យើងមិនយកលេខសូន្យដាច់ខាត ដើម្បីធ្វើយ៉ាងណាឲ្យយើងមានសំឡេងតទល់ជាមួយមន្ត្រីត្រាញ់អំណាចរបស់គណបក្សប្រជាជនកម្ពុជា»។
អគ្គលេខាគណបក្សប្រជាធិបតេយ្យមូលដ្ឋានលោក សាម អ៊ីន៖«គណបក្សខ្ញុំត្រៀមឈរឈ្មោះបោះឆ្នោតនៅក្នុងឃុំសង្កាត់ចំនួន១០០ក្នុងខេត្តក្រុងចំនួនពី១០ទៅ១៥នៅទូទាំងប្រទេស។ យើងកំណត់ឈ្នះដឹកនាំឃុំសង្កាត់ចំនួន២០ និងទទួលបានអាសនៈជាក្រុមប្រឹក្សាឃុំសង្កាត់ក្នុងឃុំសង្កាត់ចំនួន៨០ផ្សេងទៀត ដើម្បីដោះស្រាយបញ្ហាប្រជាពលរដ្ឋ និងផ្លាស់ជីវភាពពលរដ្ឋ នៅតាមមូលដ្ឋាន»។លោកបន្តថា«យើងជ្រើសរើសបេក្ខជនឃុំ-សង្កាត់ដោយតម្លាភាព អ្នកមានសមត្ថភាព ជាមនុស្សល្អ និងគុណសម្បត្តិខ្ពស់។ បេក្ខជនភាគច្រើនត្រូវរើសចេញពីថ្នាក់មូលដ្ឋាន។យើងកំពុងជំរុញឲ្យនិស្សិតរៀនចំត្រឡប់នៅមូលដ្ឋានវិញ និងឈរឈ្មោះជាមេឃុំសង្កាត់សម្រាប់គណបក្សប្រជាធិបតេយ្យមូលដ្ឋាន។ ខេត្តអាទិភាពទី១ និងអាទិភាពជាបន្តបន្ទាប់របស់គណបក្សប្រជាធិបតេយ្យមូលដ្ឋានជារួមមាន៖ខេត្តតាកែវ កំពត កំពង់ស្ពឺ ស្វាយរៀង កំពង់ធំ ត្បូងធំ។ល។ ហើយនៅក្នុងរាជធានីភ្នំពេញ គណបក្សយើងនឹងឈរឈ្មោះនៅក្នុងសង្កាត់ក្បាលកោះតែមួយគត់ពីព្រោះ នយោបាយរបស់បក្សគឺផ្តោតលើការអភិវឌ្ឍតំបន់ជនបទ។ ផ្តោតលើការកាត់បន្ថយគម្លាតរវាងអ្នកមាន និងអ្នកក្រ និងផ្តោតលើការអភិវឌ្ឍវិស័យកសិកម្ម »។
ប្រធានគណបក្សយុវជនកម្ពុជាលោក ពេជ្យ ស្រស់៖«គណបក្សយើងនឹងដាក់បញ្ចូលបេក្ខជនឈរបោះឆ្នោតតែ៤៥ឃុំទេ នៅក្នុងចំណោមឃុំ-សង្កាត់១៦៣៣ ទូទាំងប្រទេស ព្រោះគណបក្សយើងថ្មីទើបតែបង្កើតមក ដូច្នេះខ្ញុំចង់ស្ទាបស្ទង់មើលសិន។ ហើយឃុំ-សង្កាត់ ដែលយើងដាក់បេក្ខជននេះ គឺឃុំចំនួន៤៥ ក្នុងចំណោម៦៤ឃុំ នៅក្នុងេខត្តត្បូងឃ្មុំ ដែលខ្ញុំគិតថា ជាខេត្តមានអទិភាពទទួលបានការគាំទ្រដល់បេក្ខជនគណបក្សខ្ញុំ។ បើនិយាយពីសមត្ថភាពវិញ បេក្ខជនដែលខ្ញុំដាក់ឈរឈ្មោះបោះឆ្នោតនេះ សុទ្ធតែបញ្ចប់បរិញាបត្រ និងមានសមត្ថភាព ក្រមសីលធម៌ជាងគណបក្សដទៃ ដោយខ្ញុំសង្ឃឹមថា ពលរដ្ឋនឹងងាកមកគាំទ្របេក្ខជនគណបក្សខ្ញុំ»។
ប្រធានគណបក្សសំបុកឃ្មុំសង្គមប្រជាធិបតេយ្យលោក ម៉ម សូណង់ដូ៖«គណបក្សខ្ញុំនឹងដាក់បេក្ខជនឈរឈ្មោះបោះឆ្នោតទាំង១៦៣៣ ទូទាំង២៥ខេត្ត-ក្រុង។ ហើយនៅពេលនេះយើងមានសមាសភាពបេក្ខជនដែលមានសមត្ថភាពគ្រប់គ្រាន់ហើយ ដែលយើងសង្ឃឹមថា នឹងទទួលបានកៅអីមេឃុំ-សង្កាត់ នៅក្នុងចំណោមខេត្ត-ក្រុង ដែលយើងដាក់បញ្ចូលបេក្ខជនឈរឈ្មោះនេះ។ តែខ្ញុំមិនទាន់អាចកំណត់ថា អាចនឹងឈ្នះបានប៉ុន្មានឃុំ-សង្កាត់ទេ ព្រោះវាអាស្រ័យលើប្រជាពលរដ្ឋ ដែលគាំទ្រលើគោលនយោបាយគណបក្ស និងគាំទ្រលើប្រវត្តិខ្ញុំដែលតែងតែចេញមុខដោះស្រាយបញ្ហាពលរដ្ឋ និងមិនដែលបោកប្រាស់ពលរដ្ឋដូចគណបក្សដទៃទៀត»។
ប្រធានគណបក្សខ្មែររួបរួមជាតិលោក ញឹក ប៊ុនឆៃ៖«គណបក្សយើងនឹងដាក់បញ្ចូលបេក្ខជនឲ្យបានមួយ១០០ភាគរយ ក្នុងចំណោមឃុំ-សង្កាត់១៦៣៣នេះ ហើយនៅពេលនេះយើងបានជ្រើសរើសបេក្ខជនជាង៨០ភាគរយហើយ។ ហើយក្នុងចំណោមឃុំ-សង្កាត់ ដែលយើងដាក់បញ្ចូលបេក្ខជនឈរឈ្មោះនេះ យើងជឿជាក់ថា អាចឈ្នះកៅអីមេឃុំ-សង្កាត់ តាមរយៈគោលនយោបាយដោះស្រាយបញ្ហាពលរដ្ឋតាមមូលដ្ឋាន ដែលគណបក្សធ្លាប់បានចុះជួយពលរដ្ឋកន្លងមក។ តែខ្ញុំអត់ទាន់ហ៊ាននិយាយកំណត់ថា អាចឈ្នះបានប៉ុន្មានទេ រង់ចាំមើលលទ្ធផលចេញមកទាំងអស់គ្នា»។
គួររំឮកថា ការបោះឆ្នោតជ្រើសរើសថ្នាក់ដឹកនាំឃុំ-សង្កាត់ នៅអាណត្តិទី៣ កាលពីឆ្នាំ២០១២កន្លងមក គណបក្សប្រជាជនកម្ពុជា ឈ្នះកៅអីជាង១៥០០ ឃុំ-សង្កាត់ ក្នុងចំណោមកៅអី១៦៣៣ ទូទាំងប្រទេស។ សូមបញ្ជាក់ដែរថា ការបោះឆ្នោតឃុំ-សង្កាត់ អាណត្តិទី៤ នឹងប្រព្រឹត្តិទៅនៅថ្ងៃទី០៤ មិថុនា ឆ្នាំ២០១៧ខាងមុខនេះ៕
No comments:
Post a Comment