ដោយ រ៉ាន់ សំណាង
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន (រូបកណ្ដាល) ពេលនាំខ្លួនមកសវនាការ នៅតុលាការកំពូល នៅថ្ងៃទី១០ ខែសីហា ឆ្នាំ២០១៦។ |
ស្តាប់សំលេង
សាលាដំបូងរាជធានីភ្នំពេញ សម្រេចបើកសវនាការជាលើកដំបូងលើសំណុំរឿងលោក អ៊ុំ សំអាន ទាក់ទងនឹងការបង្ហោះផែនទី និងការបញ្ចេញទស្សនៈលើបញ្ហាព្រំដែនកម្ពុជា-វៀតណាម តាមបណ្ដាញសង្គមហ្វេសប៊ុក (facebook)។ ក្រុមមេធាវី និងកូនក្តីធ្វើពហិការដោយលើកសំអាងថា សវនាការនេះមិនអាចប្រព្រឹត្តស្របច្បាប់បានទេ ខណៈលោក អ៊ុំ សំអាន នៅមានអភ័យឯកសិទ្ធិនៅឡើយ ប៉ុន្តែចៅក្រមថា សវនាការអាចធ្វើទៅបាន ព្រោះជាសវនាការស្របតាមច្បាប់។ ទោះបីជាយ៉ាងណា តុលាការនឹងប្រកាសសាលក្រមរឿងនេះនៅរសៀលថ្ងៃទី១០ ខែតុលា ឆ្នាំ២០១៦។
ចំណុចដែលនាំឲ្យក្រុមមេធាវី និងលោក អ៊ុំ សំអាន ដើរចេញពីបន្ទប់សវនាការនៅព្រឹកថ្ងៃទី៥ កញ្ញា នេះ គឺការខ្វែងគំនិតគ្នារវាងមេធាវី និងចៅក្រមត្រង់អភ័យឯកសិទ្ធិអ្នកតំណាងរាស្ត្រ និងបណ្ដឹងសុំមោឃភាពនៅសាលាឧទ្ធរណ៍លើនីតិវិធីសាលាដំបូងរាជធានីភ្នំពេញ។
ថ្លែងទៅកាន់ចៅក្រម និងតំណាងអយ្យការក្នុងបន្ទប់សវនាការ លោកមេធាវី ជូង ជូងី លើកឡើងថា សវនាការលើករណីលោក អ៊ុំ សំអាន មិនអាចធ្វើទៅបានទេ លុះត្រាតែរដ្ឋសភាសម្រេចបោះឆ្នោតដកអភ័យឯកសិទ្ធិលោក អ៊ុំ សំអាន ដោយសំឡេង ២ភាគ៣ ឬស្មើនឹង ៨២សំឡេងជាមុនសិន។ មេធាវីរូបនេះនិយាយថា មកដល់ពេលនេះ រដ្ឋសភាមិនមានសំឡេង ២ភាគ៣ ដើម្បីចាត់រឿងនេះទេ។ ផ្ទុយទៅវិញ លោកថា បែរជាសំឡេង ៥០ភាគរយបូក១ ចេញដោយសមាជិកសភាបក្សប្រជាជនកម្ពុជា ប៉ុណ្ណោះ ដែលសម្រេចឲ្យសមត្ថកិច្ចបន្តចាត់ការករណីលោក អ៊ុំ សំអាន។
ករណីដែលសមត្ថកិច្ចចាប់ខ្លួនលោក អ៊ុំ សំអាន រួចបញ្ជូនឲ្យព្រះរាជអាជ្ញាចោទប្រកាន់ និងយកទៅឃុំខ្លួនជាមុន ទើបរដ្ឋសភាអនុម័តឲ្យអាជ្ញាធរបន្តចាត់ការជាក្រោយនោះ លោក ជូង ជូងី យល់ថា ការអនុវត្តនីតិវិធីហាក់ដូចជាកាត់ក្បាលតម្រូវមួក។ បន្ថែមពីលើការលើកឡើងរបស់លោក ជូង ជូងី លោកមេធាវី ហែម សុជាតិ ថាចំណាត់ការរបស់រដ្ឋសភានោះ គឺមិនស្របនឹងមាត្រា៨០ នៃរដ្ឋធម្មនុញ្ញកម្ពុជា៖ «គោលបំណងតុលាការ គឺគេជម្រះទៅលើករណី ប៉ុន្តែមេធាវីយល់ឃើញថាខុសនីតិវិធី។ ចឹងមេធាវីយល់ឃើញថា យើងមិនអាចចូលរួមសវនាការមួយដែលខុសនីតិវិធីទេ ព្រោះកូនក្ដីខ្ញុំជាអ្នកតំណាងរាស្ត្រ។ អ៊ីចឹងវាត្រូវតែមានការដកអភ័យឯកសិទ្ធិឲ្យបានត្រឹមត្រូវតាមរដ្ឋធម្មនុញ្ញសិន បើយើងចេះតែបន្តអ្វីមិនត្រឹមត្រូវ អ៊ីចឹងវានឹងនាំឲ្យមានផលវិបាកតទៅទៀតសម្រាប់អ្នកតំណាងរាស្ត្រដទៃទៀត ឬអ្នកណាដែលមានអភ័យឯកសិទ្ធិ»។
និយាយនៅចំពោះមុខតុលាការ ត្រង់មាត្រា៨០ នេះ លោក អ៊ុំ សំអាន និយាយថា លោក ហ៊ុន សែន និងសមាជិកសភាបក្សប្រជាជនកម្ពុជា រួមគ្នាធ្វើរដ្ឋប្រហាររដ្ឋធម្មនុញ្ញ ដោយឃុំខ្លួនលោកទាំងកំពុងមានអភ័យឯកសិទ្ធិតំណាងរាស្ត្រ។
ប៉ុន្តែការលើកឡើងនេះ ត្រូវបានចៅក្រមជំនុំជម្រះ លោក ហេង សុខណា ច្រានចោល ដោយសំអាងថា គ្មានមូលដ្ឋានច្បាប់គ្រប់គ្រាន់។ ចំណែកការដើរចេញរបស់មេធាវី និងជនជាប់ចោទចេញពីបន្ទប់សវនាការវិញ លោកចៅក្រម ហេង សុខណា លើកឡើងថា នោះជាសិទ្ធិរបស់ពួកគេ។
ទោះបីជាគ្មានវត្តមានមេធាវី និងជនជាប់ចោទក៏ដោយ សវនាការនៅតែបន្តដដែល។ លោកចៅក្រម ហេង សុខណា សំអាងថា តុលាការអាចបន្តសវនាការនេះបាន ដោយផ្អែកលើកត្តាច្បាប់មួយចំនួន។ កត្តាទាំងនោះរួមមាន សេចក្ដីសម្រេចរបស់រដ្ឋសភា អនុម័តឲ្យអាជ្ញាធរបន្តចាត់ការករណីលោក អ៊ុំ សំអាន និងសាលដីការបស់សភាស៊ើបសួរសាលាឧទ្ធរណ៍ ដែលបដិសេធលើបណ្ដឹងសុំមោឃភាពរបស់មេធាវីលើនីតិវិធីរបស់តុលាការរាជធានីភ្នំពេញ។
គិតមកដល់ពេលនេះ លោក អ៊ុំ សំអាន ត្រូវតុលាការឃុំខ្លួនបណ្ដោះអាសន្ននៅពន្ធនាគារព្រៃសអស់រយៈពេល ៤ខែ ២៤ថ្ងៃ។ លោក អ៊ុំ សំអាន ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍ នៃក្រមព្រហ្មទណ្ឌ បន្ទាប់ពីលោកត្រូវបានសមត្ថកិច្ចចាប់ខ្លួននៅខេត្តសៀមរាប កាលពីយប់ថ្ងៃទី១១ ខែមេសា។ ការចោទប្រកាន់នេះ ក្រោយពីលោកបានរិះគន់រឿងបញ្ហាព្រំដែនកម្ពុជា-វៀតណាម ទាក់ទងនឹងការប្រើប្រាស់ផែនទីក្លែងក្លាយ។ ក្រោយមក លោកនាយករដ្ឋមន្ត្រី ហ៊ុន សែន បានលើកឡើងថា ការចាប់ខ្លួនអ្នកតំណាងរាស្ត្រគណបក្សប្រឆាំង លោក អ៊ុំ សំអាន គឺត្រឹមត្រូវតាមច្បាប់ ព្រោះលោក ហ៊ុន សែន ថាលោក អ៊ុំ សំអាន បានញុះញង់ឲ្យមានជម្លោះជាមួយប្រទេសជិតខាងដោយសារការផ្សព្វផ្សាយផែនទី និងប្រើពាក្យសម្ដីក្នុងទិសដៅបំផុសបំផុល និងមានទិសដៅទម្លាក់នាយករដ្ឋមន្ត្រី៕
No comments:
Post a Comment