រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈតាមរយៈនាយកដ្ឋានសិល្បៈភាពយន្ត និងផ្សព្វផ្សាយវប្បធម៌បានដាក់ឲ្យអនុវត្តនូវវិធានការ៣ចំណុចចំពោះផលិតករ អ្នកដឹកនាំរឿង សំដៅពង្រឹងគុណភាពក្នុងការផលិតភាពយន្តឲ្យបានល្អប្រសើរ ។
យោងតាមសេចក្តីជូនដំណឹងរបស់នាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈដែលបានចេញផ្សាយកាលពីថ្ងៃទី១២ ខែកញ្ញា ឆ្នាំ២០១៦ឲ្យដឹងថា អនុវត្តតាមស្មារតីអង្គសិក្ខាសាលាភាពយន្តក្រោមប្រធានបទ «ដើម្បីបង្កើនសមត្ថភាពប្រកួតប្រជែង» ថ្ងៃទី៦ ខែធ្នូ ឆ្នាំ២០១៥ ដោយបានឯកភាពសម្រេចដាក់ចេញនូវវិធានការមួយចំនួន សំដៅលើកកម្ពស់សមត្ថភាពផលិតស្នាដៃថ្មីប្រកបដោយគុណភាព មានភាពទាក់ទាញ និងអាចប្រកួតប្រជែងបាននៅលើទីផ្សារភាពយន្តក្នុងស្រុកនោះ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌បានដាក់ឲ្យអនុវត្តនូវវិធានការ៣ចំណុចដល់ចាងហ្វាងផលិតកម្មភាពយន្ត ផលិតករ អ្នកដឹកនាំរឿង ផលិតករភាពយន្តវ័យក្មេង ទាំងអស់ ។
១-ភាពមិនពេញលេញក្នុងការផលិតស្នាដៃភាពយន្តនាពេលបច្ចុប្បន្ន គឺកង្វះគុណភាពនៃការតែងនិពន្ធអត្ថបទនិពន្ធរឿង ។ អត្ថបទនិពន្ធរឿងល្អមួយត្រូវមានលក្ខណៈសម្បត្តិវិជ្ជាជីវៈគ្រប់គ្រាន់អាចពិនិត្យយល់ និងអាចវាយតម្លៃបានអំពីគោលគំនិតរឿង មាតិកា និងបរិបទនៃរឿងនោះទើបនាយកដ្ឋានទទួលសំណើសុំពិនិត្យ ដើម្បីផ្តល់ការអនុញ្ញាតផលិត ។
២-ឆ្លងតាមការវាយតម្លៃលើស្នាដៃដែលមានកន្លងមក អ្នកដឹកនាំរឿង ដែលមិនមានលក្ខណៈសម្បត្តិ វិជ្ជាជីវៈបទពិសោធន៍ និងសមត្ថភាពជំនាញសមល្មមទេនឹងមិនអនុញ្ញាតឲ្យដឹកនាំផលិតស្នាដៃភាពយន្តរឿងខ្នាតវែងទៀតឡើយ ។ ចំពោះអ្នកដឹកនាំរឿងថ្មី ដែលមានបំណងដឹកនាំផលិតភាពយន្តរឿងខ្នាតវែង ត្រូវមានស្នាដៃភាពយន្តខ្នាតខ្លីចំនួន២ស្នាដៃដែលផលិតដោយសាមីខ្លួនផ្ទាល់ ដាក់ភ្ជាប់ជាឯកសារសម្រាប់វាយតម្លៃ និងវិនិច្ឆ័យសម្រេចអំពីសមត្ថភាព ចំណេះដឹង និងបទពិសោធន៍របស់ខ្លួនមុននឹងអនុញ្ញាត ឬមិនអនុញ្ញាតឲ្យដឹកនាំផលិតស្នាដៃភាពយន្ត ។
៣-ចាប់អនុវត្តដំណើរការរៀបចំកសាងបញ្ជីឈ្មោះអ្នកដឹកនាំរឿង ដោយឆ្លងតាមរយៈការវាយតម្លៃលើស្នាដៃដែលមានរួចហើយ ការបណ្តុះបណ្តាលជំនាញ និងការសាកល្បងបង្កើតស្នាដៃថ្មី ។ បញ្ជីឈ្មោះអ្នកដឹកនាំរឿងត្រូវតែមានការឯកភាព គាំទ្រ និងទទួលស្គាល់ជាទូទៅក្នុងឧស្សាហកម្មភាពយន្តជាតិ ។
សេចក្តីជូនដំណឹងនោះស្នើសុំឲ្យចាងហ្វាងផលិតកម្ម ផលិតករ អ្នកជំនាញភាពយន្ត ផលិតករវ័យក្មេងទាំងអស់ត្រូវអនុវត្តដោយស្មារតីទទួលខុសត្រូវខ្ពស់ ។ សេចក្តីជូនដំណឹងនោះបានធ្វើឡើង បន្ទាប់ពីមានទស្សនិកជនភាគច្រើនដែលទស្សនាខ្សែភាពយន្តខ្មែរមួយចំនួនពិនិត្យឃើញថា នៅមានកម្រិត និងមានកង្វះខាតគុណភាពច្រើន ។
ភាពយន្តខ្មែរបានងើបឡើងវិញ ក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែអ្នកជំនាញបានព្យាករទុកថា វិស័យភាពយន្តខ្មែរអាចនឹងធ្លាក់ចុះវិញ បន្ទាប់ពីផលិតករ និងអ្នកដឹកនាំរឿងនៅតែផលិតស្នាដៃភាពយន្តរបស់ខ្លួនដោយមិនមានគុណភាពនោះ ៕
No comments:
Post a Comment