ជំរុញ​ឲ្យ​នាយកដ្ឋាន​អភិវឌ្ឍន៍​ឥស្លាម​ម៉ាឡេស៊ី​ ផ្ដល់​ការអប់រំ វិជ្ជាជីវៈ បច្ចេកទេស

កម្ពុជា​ថ្មី​
វិមាន

ភ្នំពេញ ៖ លោក អូស្មាន ហាស្សាន់ ជំរុញឲ្យក្រុមប្រតិភូ នាយកដ្ឋានអភិវឌ្ឍន៍ឥស្លាម ម៉ាឡេស៊ីផ្ដល់ការអប់រំ វិជ្ជាជីវៈ បច្ចេកទេស ជូនលោកគ្រូ អ្នកគ្រូ និងសិស្សានុសិស្ស នៅសហគមន៍ខ្មែរឥស្លាមជនបទឲ្យបានលឿន សម្រាប់ជំហានទី១នេះ ដើម្បីបង្ហាញពីសកម្មភាពជឿជាក់ពីថ្នាក់ដឹកនាំ ។ លោកអូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ ក្រសួងការងារ បណ្ដុះបណ្ដាលវិជ្ជាជីវៈ លោកបានបញ្ជាក់បែបនេះ ខណៈទទួលជួប ពិភាក្សាការងារជាមួយ គណៈប្រតិភូ អ្នកជំនាញបច្ចេកទេសម៉ាឡេស៊ី១២រូប នៅស្នាក់ការអង្គការមូលនិធិអភិវឌ្ឍន៍មុស្លិមកម្ពុជា កាលពីថ្ងៃទី ១៣ កញ្ញា ឆ្នាំ២០១៦នេះ។

លោក Haji Mohammad Nordin Ismail អគ្គនាយករង នៃអគ្គនាយកដ្ឋានកិច្ចការឥស្លាមម៉ាឡេស៊ី បានបញ្ជាក់ថា នៅក្នុងជាជំហានដំបូង ក្នុងដំណើរការ លើគម្រោងនានាសម្រាប់ឆ្នាំ២០១៦នេះ ក្រុមអ្នកឯកទេស របស់ស្ថាប័នលោក បានទទួលការអនុញ្ញាតិពីរដ្ឋាភិបាលម៉ាឡេស៊ីឲ្យ ចាប់ផ្ដើមចំណាយខ្ទង់ថវិកា ចំនួន៣០ម៉ឺនដុល្លារសិន ដើម្បីបើកវគ្គអប់រំ វិជ្ជាជីវៈ និងបច្ចេកទេស ជូនលោកគ្រូ អ្នកគ្រូ សិស្សានុសិស្ស ដល់សហគមន៍ខ្មែរឥស្លាមនៅជនបទក្នុងជំហ៊ានដំបូងនេះ។ ឆ្លើយតបតាមសំណើរបស់អង្គការ មូលនិធិអភិវឌ្ឍន៍មុស្លិមកម្ពុជា គឺត្រូវបើកវគ្គមុនគេនៅ ខេត្ដកំពង់ចាម និងខេត្ដកំពង់ឆ្នាំង។ រៀងរាល់ឆ្នាំរហូត ដល់បញ្ចប់បេសកកម្ម ដើមឆ្នាំ២០១៩។ ក្នុងពេលនេះ យើងផ្តើមពីវិស័យអប់រំជាមុន ដោយនឹងរៀបចំបំពាក់បំប៉នគ្រូបង្គោលថ្នាក់មត្តេយ្យ និង បឋមសិក្សា ហើយនឹងមានវគ្គអប់រំផ្សេងៗបន្ដទៀត។ ចំណែកប្រព័ន្ធផ្សេងៗ ៥ចំណុចទៀត នឹងបន្តតាមកាលវិភាគ ដែលបានដាក់ជូន ហើយកែប្រែតាមស្ថានភាពជាក់ស្ដែង។ តាមរយៈសកម្មភាពនេះជាការបង្ហាញ ពីការផ្សាភ្ជាប់ទំនាក់ទំនង ឲ្យកាន់តែជិតស្និទ្ធរវាងប្រទេសម៉ាឡេស៊ីនិងប្រទេសកម្ពុជាថែមទៀត។

លោក អូស្មាន ហាស្សាន់បាន ថ្លែងអំណរគុណដល់រដ្ឋាភិបាល ម៉ាឡេស៊ីដែលបានសម្រេច និងចាប់ផ្ដើមដំណើរការគម្រោងកញ្ចប់ថវិកាខាងលើដើម្បីជួយបណ្ដុះបណ្ដាល និងបំពេញសេចក្ដីត្រូវការរបស់សហគមន៍ខ្មែរឥស្លាម។ ក្នុងនាមថ្នាក់ដឹកនាំសាសនិក ឥស្លាមកម្ពុជា លោកមានក្ដីសង្ឃឹមយ៉ាងមុតមាំថា រដ្ឋាភិបាលម៉ាលេស៊ី នឹងបន្តបេសកកម្មនេះរហូតបានសម្រេច គ្រប់ផ្នែកទាំងអស់ដើម្បីចូលរួមអភិវឌ្ឍន៍លើកកម្ពស់វិស័យអប់រំ វិជ្ជាជីវៈ វិស័យឧស្សាហកម្ម និងកិច្ចការសាសនាឥស្លាមនៅកម្ពុជា ជាពិសេសគឺការកាត់បន្ថយភាពក្រីក្រ។

លោកបន្ដថា សម្រាប់៦ចំណុច ដែល ស្ថិតនៅក្រោមគម្រោងកញ្ចប់ថវិកា ក្រោមការ រាប់រងរបស់រដ្ឋាភិបាលម៉ាឡេស៊ី យើងខ្ញុំកំពុងរៀបចំមេក្រុមការងារតាមផ្នែកនិមួយៗ ដើម្បីទៅទទួលការបណ្ដុះបណ្ដាលពីម៉ាឡេស៊ី តែសម្រាប់ពេលវេលា ដែលក្រុមបច្ចេកទេសដាក់ជូន ហាក់បីដូចជាកៀកគ្នា និង រយៈពេលខ្លី យើងខ្ញុំសូមយកពេលនេះចាត់ចែងសមាស ភាពឲ្យសមស្របតាមជំនាញនិមួយៗ សិនបន្ទាប់មក ក្រុមគណៈដឹកនាំជាន់ខ្ពស់ នៃសាសនា ឥស្លាមកម្ពុជា យើងនិងស្នើសុំកំណត់ថេរវេលាទៅតាមផ្នែកនិមួយៗ ដើម្បីត្រៀមអនុវត្តការងារនេះឲ្យមានប្រសិទ្ធភាព ទៅតាមបណ្ដាខេត្ដផ្សេងៗ បន្តទៀត៕