 |
| លោក គួយ ប៊ុនរឿន (ឆ្វេង) និងលោក ប៊ិន ឈិន ផ្ដល់បទសម្ភាសន៍ បន្ទាប់ពីចេញពីកិច្ចប្រជុំជាមួយEU នៅរសៀលថ្ងៃសុក្រនេះ (រូបភាព៖ ណាត សុភាព) |
ការបង្ហាញពីជម្រើសទាំង៤នេះធ្វើឡើងនៅក្នុងនៅក្នុងកិច្ចប្រជុំដាច់ដោយឡែកពីគ្នារវាងក្រុមអ្នកជំនាញការមកពីសហភាពអឺរ៉ុបជាមួយក្រុមការងាររបស់គណបក្សប្រជាជនកម្ពុជា និងក្រុមការងារគណបក្សសង្គ្រោះជាតិ នៅរសៀលថ្ងៃទី២៣ ខែមករា ឆ្នាំ២០១៥នេះ នៅវិមានរដ្ឋសភា ។
ជម្រើសទាំង៤ដែលEU បានលើកឡើងនោះរួមមាន ទី១ យកសំបុត្រកំណើតទៅចុះឈ្មោះបោះឆ្នោត ទី២ ធ្វើបច្ចុប្បន្នភាពបញ្ជីបោះឆ្នោតដែលមានសព្វថ្ងៃ ទី៣ ធ្វើបញ្ជីបោះឆ្នោតដោយមានស្នាមមេដៃទាំងដប់ និងទី៤ ប្រើអត្តសញ្ញាណប័ណ្ណ និងស្នាមម្រាមដៃទៅចុះឈ្មោះបោះឆ្នោត ។
ប្រធានក្រុមការងារគណបក្សប្រជាជនកម្ពុជា លោក ប៊ិន ឈិន មានប្រសាសន៍បន្ទាប់ពីកិច្ចប្រជុំថា លោកនឹងយកសំណើរបស់EUទៅពិចារណា តែលោកបានលើកឡើងផងដែរថា គណបក្សប្រជាជនកម្ពុជាបានឯកភាពគ្នាសរសេរនៅក្នុងសេចក្តីព្រាងច្បាប់ គជប ថ្មី ទាក់ទងនឹងការប្រើអត្តសញ្ញាណប័ណ្ណសម្រាប់យកទៅចុះឈ្មោះបោះឆ្នោត។ លោកថា គណបក្សប្រជាជនក៏បានស្នើទៅគណបក្សសង្គ្រោះជាតិឲ្យយកចំណុចទី៤នេះដែរ តែសបក្សសង្គ្រោះជាតិចង់បន្ថែមឲ្យមានប័ណ្ណបោះឆ្នោតមួយទៀត ។
ចំណែកប្រធានក្រុមការងារគណបក្សសង្គ្រោះជាតិលោក គួយ ប៊ុនរឿន មានប្រសាសន៍បន្ទាប់ពីជំនួបជាមួយEUថា លោកឯកភាពត្រង់ចំណុចទី៤ដែលEUបានស្នើនោះ ព្រោះក្រសួងមហាផ្ទៃមានទិន្ន័យទាក់ទងនឹងការផ្តល់អត្តសញ្ញាណប័ណ្ណ ដូចជា ឈ្មោះ ភេទ អាយុ ថ្ងៃខែឆ្នាំកំណើត រូបថត ស្នាមមេដៃ និងទីលំនៅជាដើម ។ លោកថា គ.ជ.ប អាចយកទិន្នន័យទាំងនេះពីក្រសួងមហាផ្ទៃមកត្រួតពិនិត្យពីសុក្រិតភាព និងបញ្ជាក់ថាមានសិទ្ធិគ្រប់គ្រាន់ក្នុងការចុះឈ្មោះបោះឆ្នោត និងមានសិទ្ធិគ្រប់គ្រាន់ក្នុងការបោះឆ្នោតដែរឬទេ ។
លោក គួយ ប៊ុនរឿន បន្តទៀតថា បន្ទាប់ពីត្រួតពិនិត្យរួច គ.ជ.ប អាចយកទិន្នន័យទាំងនេះទៅប្រើប្រាស់ដោយ គ.ជ.ប អាចបន្ថែមចំណុចមួយទៀតគឺទីតាំងការិយាល័យដែលត្រូវបោះឆ្នោត ។ លោកថា ការធ្វើបែបនេះមានភាពងាយស្រួល និងមានប្រសិទ្ធិភាព ដោយគេអាចបញ្ចូលនូវទិន្នន័យភ្លាមៗ ហើយអាចព្រីនប័ណ្ណបោះឆ្នោតសម្រាប់អ្នកបោះឆ្នោតភ្លាមបាននៅកន្លែងនោះតែម្ដង ។
លោក ប៊ិន ឈិន ឲ្យដឹងថា នៅថ្ងៃចន្ទសប្ដាហ៍ក្រោយ ក្រុមការងារបក្សទាំងពីរនឹងមិនជួបប្រជុំទេ ដោយសារគណៈកម្មការជាប់រវល់ទៅថ្នាក់មូលដ្ឋាន ចំណែកនៅថ្ងៃសុក្រ រូបលោកជាប់រវល់ធុរៈផ្ទាល់ខ្លួន ៕
VOD
ដោយ៖ ណាត សុភាព | ថ្ងៃសុក្រ ទី23 មករា 2015, 11:42 PM
No comments:
Post a Comment