ការប្រកួតអន្តរជាតិលើសង្វៀនទូរទស្សន៍អាស៊ីអាគ្នេយ៍នាថ្ងៃអាទិត្យទី២២ កុម្ភៈពេលរសៀលនោះ កីឡាករវ័យក្មេងសែន រ៉ាដេត ដែលត្រូវគេមើលឃើញថាមិនសូវមានបទពិសោធន៍ច្រើន ហាក់មិនគួរបំបាក់ជើងខ្លាំងមកពីថៃឈ្មោះ Phitphong Thang បានងាយនោះឡើយ។ ទាំងមាឌ ទាំងកម្ពស់ គូប្រកួតទាំងពីរ មិនស៊ីសងគ្នាឡើយ ខណៈដែលកម្រិតនៃការវាយលុក កីឡាករថៃគឺមានស្នៀតខ្លះល្អនាំមុខផង ពិសេសធាក់ និងទាត់។ ២ទឹកដំបូង បង្គោលក្រហមសែន រ៉ាដេត មិនអាចធ្វើអ្វីទៅលើគូប្រកួតបានទេ បើទោះជាកម្រិតនៃការទាត់ចេញ និងវាយកែង មានសន្ទុះខ្លាំងក្លា ដែលធ្វើឲ្យមានការជឿជាក់ថាគូប្រកួតជាជនជាតិថៃ អាចពិបាកតស៊ូ។ គ្រប់ពេលមានការសម្រុក កីឡាករថៃ Phitphong Thang រមែងសងមកវិញដោយកែង ម៉ាត់ និងទាត់ បានយ៉ាងល្អ ធ្វើឲ្យមានសម្រែកកងរំពងនៅក្នុងសង្វៀន។ គូនេះ បើកឆាកប្រយុទ្ធគ្នា ព្រមជាមួយនឹងលទ្ធផលបែកផ្កាភ្លើងតាំងពីទឹកទី១ ដោយគ្រាន់តែឈានដល់ទឹកទី៣ភ្លាម បង្គោលខៀវរបស់ថៃក៏វាយប៉ុន្មានកែង ធ្វើឲ្យសែន រ៉ាដេត បែកត្រង់ក្រោមភ្នែកខាងធ្វេងតែម្ដង ដោយស្នាមបែកនោះ មានសភាពរយះកាន់តែធំ។ អញ្ចឹងហើយទើបកីឡាករថៃ ត្រូវគេឃើញបង្កើនសន្ទុះវាយលុកកាន់តែខ្លាំង ដើម្បីបំបុកទៅលើបង្គោលក្រហមរបស់កម្ពុជា ដើម្បីមានឈ្មោះផ្ដួលសែន រ៉ាដេត ដោយសន្លប់។ ស្នាមបែកនោះ ក៏មានស្រក់ឈាម និងលានសាច់ខាងក្នុងចេញ គួរឲ្យញញើតភ្នែកផងដែរ។ យ៉ាងណាមិញ សន្ទុះវាយគំរាមរបស់កីឡាករថៃ មិនទទួលបានជោគជ័យនោះទេ បន្ទាប់ពីកីឡាករកម្ពុជា ដឹងច្បាស់ថាខ្លួនត្រូវចាញ់ ហើយក៏សម្រេចចិត្តវាយប្ដូរដោយមិនខ្វល់ពីស្នាមរយះ ដើម្បីតបវិញ។
ក្នុងទឹកទី៣នេះ បានក្លាយជាទឹកកាត់ក្ដី នឹងមានសភាពស៊ីសាច់ហុតឈាមរវាងអ្នកទាំងពីរកាន់តែខ្លាំង ដោយ សែន រ៉ាដេត ប្រឹងវ័ធកែងទៅកាន់សៀតផ្កា និងផ្នែកលើក្បាល ឯកីឡាករ Phitphong Thang ក៏ស្ទុះសំដៅត្រង់ស្នាមរយះទ្វេដង។ នៅទំបំផុត កីឡាករថៃបានក្លាយជាអ្នកបែកអំពិលអំពែក និងដួលផ្ងារជើង រហូតងើបលែងរួច បន្ទាប់ពីកីឡាករសែន រ៉ាដេត វ័ធកែងត្រូវផង និងម៉ាត់ត្រូវផង ត្រង់បរិវេណសៀតផ្កា និងផ្ទៃមុខដដែលជាដដែល។ កីឡាករថៃត្រូវលោកអាជ្ញាកណ្ដាលរាប់ដល់១០ និងបន្តការប្រកួតទៅមុខលែងរួច បើទោះជាភាគីកម្ពុជា មានសភាពរយះកាន់តែធំ ពីការប្រកួតវាយប្ដូរនោះ។ ក្រុមអ្នកទស្សនាសុទ្ធតែឃើញដូចគ្នាថា បើគ្មានការវាយប្ដូរ នោះកីឡាករកម្ពុជាមិនស្គាល់ជ័យជម្នះលើកីឡាករថៃនោះទេ ដោយសារតែការប្រកួតទាំងមូល ភាគីខាងថៃក៏មានសន្ទុះឈ្នះប្រៀបដោយអន្លើស្រាប់ ដោយមិនទាន់គិតដល់សភាពធ្វើឲ្យបែករយះត្រង់ផ្ទៃមុខនោះផង។ លទ្ធផលនេះ បានធ្វើឲ្យប្អូនប្រុសរបស់កីឡាករ សែន រ៉ាឌី ក្លាយជាជើងខ្លាំងឆ្នើមវ័យក្មេងមួយរូប ដែលទទួលបានការចាប់អារម្មណ៍ ជាមួយនឹងឱកាសវាយប្ដូរស្នៀតធ្វើឲ្យកីឡាករថៃ Phitphong Thang សន្លប់ក្នុងទឹកទី៣។
អ្នករៀបចំការប្រកួតប្រចាំទូរទស្សន៍អាស៊ីអាគ្នេយ៍ប្រាប់ថាវត្តមានរបស់សែន រ៉ាដេត គ្រាន់តែក្នុងន័យស្ទាបស្ទង់ប៉ុណ្ណោះ ប៉ុន្តែក្រោយការប្រកួតបានល្អ កីឡាកររូបនេះ នឹងទទួលឱកាសឡើងប្រកួតជាអន្តរជាតិបន្តទៀត ដើម្បីឲ្យមានកេរ្តិ៍ឈ្មោះខ្ទរខ្ទារដូចកីឡាករសែន រ៉ាឌី ជាបងបង្កើត។
សែន រ៉ាដេត ទើបឡើងប្រកួតបាន១៨លើកប៉ុណ្ណោះ ខណៈដែលតួលេខឈ្នះទើបតែមាន១១ដង និងចាញ់៧ដង។ សម្រាប់កីឡាករ Phitphong Thang វិញ ធ្លាប់ឆ្លងកាត់ការប្រកួតបានដល់២៧ដង ឈ្នះ២១ដង និងចាញ់៦ដង ដែលក្រៅពីនាំមុខខាងបទពិសោធន៍ កម្រិតប្រកួតក៏ល្អមិនធម្មតាផងដែរ។ មួយគូអន្តរជាតិទៀត កីឡាករផល សោភ័ណ្ឌ មិនបានឈ្នះថៃដូចការគ្រោងទុកនោះទេ ដោយសារតែភ្លាត់ថែមលើកីឡាករថៃ Thy Det បណ្ដាលឲ្យគូប្រកួតមានឱកាសស៊ីឡាក់ តាមរយៈការដាក់ពិន័យឲ្យចាញ់ដោយស្វ័យប្រវត្តិ។ មុនឈានដល់ការកំណត់នេះ អ្នករៀបចំកម្មវិធី និងអ្នកផ្ដល់ពិន្ទុ បានចាក់វីដេអូមើលពីកំហុសឆ្គងរបស់បង្គោលក្រហមដដែលជាដដែល ហើយដោយមើលឃើញថា ផល សោភ័ណ្ឌ ពិតជាភ្លាត់ថែមមួយជើងត្រូវលើកីឡាករថៃពិតមែន ទើបកំណត់ឲ្យកីឡាករ Thy Det ឈ្នះក្នុងទឹកទី១តែម្ដង បន្ទាប់ពីកីឡាករថៃប្រើល្បិចស៊ីឡាក់ធ្វើសន្លប់។
នេះក៏ជាលើកទី១ដែលផល សោភ័ណ្ឌ ជាប់ប្រវត្តិចាញ់ថៃ ក្នុងចំណោម៧លើកជាមួយជនជាតិថៃ៕
VOD
ដោយ៖ វង្ស សុម៉ាលីន | ថ្ងៃចន្ទ ទី23 កុម្ភៈ 2015
No comments:
Post a Comment