 |
| លោក កែម ឡី ថ្លែងនៅក្នុងសន្និសីទស្តីសារព័ត៌មាននាព្រឹកថ្ងៃពុធនេះ (រូបភាព៖ ឡាយ សាមាន) |
ការបញ្ជាក់ជំហរនេះ ធ្វើឡើងនៅក្នុងសន្និសីទសារព័ត៌មានស្ដីពីករណីក្រសួងមហាផ្ទៃបដិសេធមិនផ្តល់ទិដ្ឋាការឲ្យលោកអាឡិច សកម្មជនការពារព្រៃឈើនៅតំបន់អារ៉ែង ជាជនជាតិបរទេស នៅថ្ងៃទី ១៨ ខែកុម្ភៈ នៅមជ្ឈមណ្ឌលអប់រំច្បាប់សម្រាប់សហគមន៍។
តំណាងក្រុមយុវជនខ្មែរមហានគរលោក សន ចាន់ដារ៉ា មានប្រសាសន៍ថា កន្លងមកអាឡិចបានបណ្តុះយុវជខ្មែរឲ្យចេះស្រឡាញ់បរិស្ថាន និងធម្មជាតិ ជាពិសេសនៅតំបន់អារ៉ែង។ លោកបន្តថា បើទោះជារដ្ឋាភិបាលបណ្តេញលោកអាឡិចចេញពីកម្ពុជា ក្រុមយុវជនរបស់លោកនៅតែបន្តសកម្មភាពក្នុងការការពារតំបន់អារ៉ែងដដែល។
នាយកប្រតិបត្តិនៃសហព័ន្ធនិស្សិតកម្ពុជា លោកទឹប ទាវ មានប្រសាសន៍ថា ទោះបីលោកអាឡិចមិនមានវត្តមាននៅកម្ពុជា ក្រុមយុវជនរបស់លោក នឹងនៅតែបណ្តុះគំនិតប្រជាពលរដ្ឋខ្មែរ និងជំរុញឲ្យយុវជនការពារតំបន់អារ៉ែងបន្ថែមទៀត តាមមធ្យោបាយផ្សេងៗ។ តែលោកបញ្ជាក់ថា អាឡិច នៅតែបន្សល់ទុកនូវកេរ្តិ៍ឈ្មោះ ជាពិសេសធ្វើឲ្យប្រជាពលរដ្ឋខ្មែរយល់ដឹងច្រើនពីតំបន់អារ៉ែង។
អ្នកស្រាវជ្រាវពីការអភិវឌ្ឍន៍សង្គម និងជាស្ថាបនិកបណ្ដាញខ្មែរដើម្បីខ្មែរ លោក កែម ឡី យល់ថា ការមិនបន្តទិដ្ឋាការដល់ជនជាតិបរទេសមួយនេះ ហាក់បីដូចជារដ្ឋាភិបាលប្រឆាំងនឹងសកម្មជនការពារបរិស្ថាន និងការគាំពារធនធានធម្មជាតិ ដែលធ្វើឲ្យកម្ពុជាមិនមានផលចំណេញឡើយ។ ទោះជាយ៉ាងណាលោក យល់ថា លោកអាឡិច បានបណ្តុះនូវស្មារតីឲ្យយុវជនស្រឡាញ់ធម្មជាតិរួចទៅហើយ ហើយរដ្ឋាភិបាលគួរផ្តល់សញ្ជាតិខែ្មរ ឬផ្តល់គោរមងារជូនលោកអាឡិចដែលខំការពារបរិស្ថាន។
បន្ទាប់ពីនាយកដ្ឋានអន្តោប្រវេសន៍មិនបន្តផ្តល់ទិដ្ឋការជូនលោកអាឡិច អង្គការសង្គមស៊ីវិលជាច្រើនៅកម្ពុជា បានចេញសេចក្តីថ្លែងការណ៍រួម បង្ហាញពីការសោកស្តាយចំពោះចំណាត់ការរបស់រដ្ឋាភិបាល។
ប្រធានចលនាមាតាធម្មជាតិលោក អាឡិច ជាជនជាតិអេស្ប៉ាញ ដែលបានមករស់នៅលើទឹកដីកម្ពុជានេះជាង១០ឆ្នាំមកហើយ និងចេះនិយាយភាសាខ្មែរបានយ៉ាងច្បាស់លាស់ ព្រមទាំងបានបង្កើតសមាគមការពារព្រៃឈើមួយឈ្មោះថា មាតាធម្មជាតិ ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង។ តែថ្មីៗនេះ នាយកដ្ឋានអន្តោប្រវេសន៍នៃក្រសួងមហាផ្ទៃបដិសេធផ្តល់ទិដ្ឋាការជូនលោក ដោយអះអាងថា ជនបរទេសមួយនេះរារាំងដល់ការអភិវឌ្ឍប្រទេសជាតិ។ ទិដ្ឋាការរបស់លោកនឹងត្រូវផុតកំណត់នៅថ្ងៃទី២០ ខែកុម្ភៈ ខាងមុខនេះ ៕
VOD
ដោយ៖ ឡាយ សាមាន | ថ្ងៃពុធ ទី18 កុម្ភៈ 2015, 12:06 PM
No comments:
Post a Comment