ក្រុមអ្នកវិភាគ និងអ្នកឃ្លាំមើលការរំលោភសិទ្ធិមនុស្ស លើកឡើងថា ការដែលរដ្ឋាភិបាល ប្រកាសឲ្យចាត់វិធានការ លើមន្ត្រីតុលាការ ដែលអសកម្ម បង្ហាញពីរូបភាព ធ្វើកំណែងទម្រង់ តាមបែបត្រួតត្រាប្រព័ន្ធយុត្តិធម៌។
ការលើកឡើងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែកុម្ភៈ ម្សិលមិញបញ្ជាឲ្យ ក្រសួងពាក់ព័ន្ធ មានទាំងក្រសួងយុត្តិធម៌ ឧត្តមក្រុមប្រឹក្សានៃអង្គចៅក្រមផង បើកការស៊ើបអង្កេតបន្ទាន់មួយ ដើម្បីចាត់វិធានការ លើមន្ត្រីសាលាដំបូងរាជធានីភ្នំពេញ ដែលលោករកឃើញថា ធ្លាប់ដោះលែងជនជាប់ចោទ ទាក់ទិននឹងឃាតកម្មបាញ់សម្លាប់ឧកញ៉ាអ៊ឹង ម៉េងជឺ ឲ្យនៅក្រៅឃុំបណ្តោះអាសន្ន។
លោកនាយករដ្ឋមន្ត្រី ហ៊ុន សែន មានប្រសាសន៍ថា««ខ្ញុំថាអាកាន់ព្រនុង ម៉េចក៏វាជាប់គុក គ្រាន់តែកាន់ព្រនុងវាជាប់គុក ជាប់ឃុំ ដ៏អានេះកាំភ្លើងដ៏ប្រាំបីដើម វាទៅជារួចខ្លួន ទៅឲ្យនៅក្រៅឃុំ រួចហើយប្រាប់ ចេះទៅតាមចាប់បានវិញ កុំអីរឿងធំណាស់ ប៉ិនរឿងដែលវាអស្ចារ្យ វានៅកន្លែងនៀក ម្សិលម៉ិញខ្ញុំពិនិត្យសុំនុំរឿងដែលខ្ញុំស្នើសុំឲ្យមានការធ្វើ អធិការកិច្ចទៅលើឧត្តមក្រុមប្រឹក្សាចៅក្រមធ្វើអធិការកិច្ចលើ សុំនុំរឿងមួយនេះ ព្រោះអញ្ចេះសាលាដំបូងរាជធានីភ្នំពេញបានមិនព្រមឲ្យនៅក្រៅឃុំទេ ព្រោះខ្ញុំត្រូវឲ្យរដ្ឋមន្ត្រីយុត្តិធម៌ ធ្វើរបាយការណ៍ឲ្យខ្ញុំដែររឿងហ្នឹងវាយ៉ាងម៉េច បានខ្ញុំមានសំណើរសុំធ្វើអធិការកិច្ចហ្មង ព្រោះបើមិនចឹងរដ្ឋាភិបាលធ្វើងាប់ទាំងខ្លួនទៀតក៏មិនគ្រប់គ្រាន់នឹង ការបំផ្លាញរបស់ចៅក្រមខ្លះទេ»។
ក្រោយនាយករដ្ឋមន្ត្រីព្រមានឲ្យចាត់វិធានការ តែប៉ុន្មានម៉ោងប៉ុណ្ណោះ ប្រធានសាលាដំបូងរាជធានីភ្នំពេញ លោក អាំង មាលតី ត្រូវបានដកចេញពីតំណែង។
ប្រធានស៊ើបអង្កេតនៅសមាគមការពារសិទ្ធិមនុស្សអាដហុក លោក នី ចរិយា យល់ថា ដើម្បីធានាពីយុត្តិ ធ៌មសង្គម រដ្ឋាភិបាលត្រូវជំរុញការអនុវត្តច្បាប់ឲ្យមានតម្លាភាព ជាជាងបញ្ជាឲ្យមន្ត្រីក្រោមឱវាទគោរពអនុសាសន៍។ លោកថា ការដកតំណែងប្រធានតុលាការភ្លាមៗនេះ ជាភស្តុតាងមួយទៀតបញ្ជាក់ថា ប្រព័ន្ធយុត្តិធម៌ស្ថិតក្រោមកណ្តាប់ដៃនាយករដ្ឋមន្ត្រី។
លោកបន្តថា«ឥឡូវយើងគួរតែពិនិត្យមើលថា នៅពេលដែលនាយករដ្ឋមន្រ្តីនិយាយបាន តុលាការហ្នឹងកំរើកទៅ បានឧត្តមក្រុមប្រឹក្សានៃអង្គចៅក្រមហ្នឹងកំរើកទៅ អញ្ចឹងវាបង្ហាញថា តុលាការដែលស្ថិតនៅក្រោមអំណាចបុគ្គល ក្រោមអំណាចលនាយករដ្ឋមន្ត្រីអញ្ចឹង គឺជាតុលាករមួយដែលមិនអាចធានាបានរកយុត្តិធម៌ជូនប្រជាពលរដ្ឋទូទៅទេ»។
អ្នកវិភាគសង្គម លោក អ៊ូ វីរៈ អះអាងថា លោកគ្មានជំនឿច្រើនលើវិធានការនេះទេ ដោយលោកអះអាងថា កន្លងទៅលោកនាយករដ្ឋមន្ត្រី ក៏ធ្លាប់សន្យាទប់ស្កាត់បទល្មើសព្រៃឈើ រហូតដាក់ជីវិត តែទីបំផុតមិនអាចទប់ស្កាត់បាន។ ប៉ុន្តែលោកយល់ថា ចំណាត់ការនេះ អាចបង្ហាញថា គណបក្សប្រជាជនកម្ពុជាចង់ស្តារប្រជាប្រិយភាពឡើងវិញ ដោយលែងហ៊ានជិះសេះលែងដៃដូចអាណត្តិមុនៗ។
លោកបន្តថា«ចំពោះខ្ញុំបើសិនជាចង់ឲ្យតុលាការមានប្រសិទ្ធភាព ទាល់តែធ្វើកំណែទម្រង់ច្បាប់ទាំង៣ ដែលចងតុលាការ និងឧត្តមក្រុមប្រឹក្សានៃអង្គចៅក្រម បើសិនជាអត់អញ្ចឹងទេ ឧត្តមក្រុមប្រឹក្សានៃអង្គចៅក្រមគាត់ ជាស្ថាប័ននយោបាយ អញ្ចឹងគាត់ចាំតែមើលរឿងនយោបាយតើ»។
នាយកប្រតិបត្តិអង្គការតម្លាភាពកម្ពុជាលោក ព្រាប កុល យល់ថា វិធានការរបស់រដ្ឋាភិបាលពេលនេះ អាចជាការធ្វើកំណែទម្រង់ តាមអនុសាសន៍របស់សង្គមស៊ីវិល ដែលរកឃើញថា ការផ្តល់សេវានៅកម្ពុជា មានអំពើពុករលួយជាប្រព័ន្ធ។ ម្យ៉ាងទៀតលោកថា វិធានការនេះធ្វើឲ្យមន្ត្រីតុលាការផ្សេងទៀត ខ្លាចបាត់បង់តំណែងតាមអំណាចនាយករដ្ឋមន្ត្រីទៅវិញទេ។
អ្នកនាំពាក្យក្រសួងយុត្តិធម៌លោក ជិន ម៉ាលីន បានច្រានចោលការចោទប្រកាន់នេះ ដោយអះអាងថា ក្រសួងលោក ទទួលយកពាក្យបណ្ដឹងទាំងអស់សូម្បីតែពលរដ្ឋសាមញ្ញ ដែលជួបប្រទះនឹងអំពើអយុត្តិធម៌ណាមួយ ដើម្បីពិចារណាវិធានការច្បាប់ មិនមែនចាំតែទទួលបញ្ជាពីរដ្ឋាភិបាលទេ។
យ៉ាងណាក៏ដោយនៅអាណត្តិទី៥នេះ រដ្ឋាភិបាលបានធ្វើច្បាប់យ៉ាងតិចចំនួន៣ នូវអ្វីដែលរដ្ឋាភិបាលអះអាងថា ដើម្បីធ្វើកំណែទម្រង់ប្រព័ន្ធយុត្តិធម៌នៅកម្ពុជា។ ប៉ុន្តែសង្គមស៊ីវិលរកឃើញថាច្បាប់ ធ្វើកំណែទម្រង់ដែលកំពុងចូលជាធរមាននោះ រឹតតែបង្កើនអំណាចឲ្យរដ្ឋាភិបាលត្រួតត្រាតុលាការទៅវិញទេ។
VOD
ដោយ៖ លោក ញឹម សុខន | ថ្ងៃពុធ ទី18 កុម្ភៈ 2015
No comments:
Post a Comment