អភិបាលខេត្ដបន្ទាយមានជ័យបានស្ដីបន្ទោស និងរិះគន់ធ្ងន់ៗទៅលើមន្ដ្រីច្រកចេញចូលតែមួយរបស់ក្រុងសិរីសោភ័ណ និងក្រុងប៉ោយប៉ែត ថាធ្វើការមិនស៊ីសង្វាក់គ្នាបង្កការស្មុគ្រស្មាញ និងធ្វើឲ្យមានការយឺតយ៉ាវក្នុងការបំពេញក្នុងការបំពេញសេវារដ្ឋបាលជូនប្រជាពលរដ្ឋ ។
គេហទំព័ររបស់អគ្គស្នងដ្ឋាននគរបាលជាតិបានចេញផ្សាយថា អភិបាលខេត្ដបន្ទាយមានជ័យលោក គោស៊ុំ សារឿត បានធ្វើការស្ដីបន្ទោសបែបនេះនៅក្នុងពិធីបិទអង្គសន្និបាតការងារប្រចាំឆ្នាំ២០១៤ និងលើកទិសដៅការងារឆ្នាំ២០១៥ របស់សាលាខេត្តបន្ទាយមានជ័យ កាលពីថ្ងៃទី១៧ ខែកុម្ភៈ ឆ្នាំ២១៥ ។
លោក គោស៊ុំ សារឿត បានលើកឡើងថា ការបំពេញការងារមិនស៊ីសង្វាក់គ្នារបស់មន្ត្រីច្រកចេញតែមួយនៃក្រុងទាំងពីរបានបង្កឲ្យមានការយឺតយ៉ាវ ធ្វើឲ្យប៉ះពាល់សតិអារម្មណ៍ប្រជាពលរដ្ឋ និងធ្វើឲ្យប្រជាពលរដ្ឋកាន់តែខ្វះជំនឿទុកចិត្តលើអង្គភាពច្រកចេញចូលតែមួយរបស់ក្រុងទាំង២នេះ ។ លោក គោស៊ុំ សារឿត អះអាងថា ការមិនស៊ីសង្វាក់គ្នានេះគឺដោយសារតែមានទំនាស់រឿងផលប្រយោជន៍ ។
អភិបាលក្រុងប៉ោយប៉ែតលោក ងោ ម៉េងជ្រួន បដិសេធមិនធ្វើអត្ថាធិប្បាយលើបញ្ហានេះ ដោយលោកមានប្រសាសន៍យ៉ាងខ្លីថា «ខ្ញុំមិនបាច់បកស្រាយអ្វីទៀតទេព្រោះគាត់បកស្រាយរួចហើយ ព្រោះគាត់មេ គាត់ធ្វើការរួចហើយ» ។
ប្រធានអាជ្ញាធរជាតិប្រយុទ្ធប្រឆាំងនឹងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្ដបន្ទាយមានជ័យលោក កែ គឹមយ៉ាន បានថ្លែងនៅក្នុងពិធីអង្គសន្និបាតកាលពីថ្ងៃទី១៧នោះថា ទោះបីមានការកែសម្រួលថ្លៃសេវារដ្ឋបាលមួយចំនួនក៏ដោយ ប៉ុន្តែតាមបណ្តាមន្ទីរអង្គភាពក៏ដូចជាតាមមូលដ្ឋានមួយចំនួននៅពុំទាន់អនុវត្តបានល្អនៅឡើយ ។ លោកជំរុញឲ្យអាជ្ញាធរបន្តយកចិត្ដទុកដាក់ពិនិត្យមើលលើការផ្ដល់សេវារដ្ឋបាល និងសេវាសាធារណៈបន្ថែមទៀត ៕
VOD
ដោយ៖ ឡេង ចាន់រតនា | ថ្ងៃពុធ ទី18 កុម្ភៈ 2015
No comments:
Post a Comment