CEN
(ថ្ងៃទី 18 សីហា 2016, ម៉ោង 03:57:PM)
ដោយ: ដាវុធ
ភ្នំពេញ: នៅដំណាច់ឆ្នាំ២០១៦ នេះ មហាវិថីធំៗចំនួន៦ នៅក្នុងរាជធានីភ្នំពេញ នឹងលែងមានបណ្តាញខ្សែកាបស្អេកស្កះអនាធិបតេយ្យ នៅលើអាកាសដូចបច្ចុប្បន្ន។
បើតាមសេចក្តីជូនដំណឹងរបស់រដ្ឋបាលរាជធានីភ្នំពេញ ក្រុមការងារចម្រុះរបស់សាលារាជធានី នឹងធ្វើយុទ្ធនាការកាត់ទម្លាក់បណ្តាញខ្សែកាបដែលស្អេកស្កះដូចសំបុកពីងពាង នៅលើអាកាសទម្លាក់ចូលបំពង់បណ្តាញក្រោមដី នៅលើមហាវិថីព្រះនរោត្តម សហព័ន្ធរុស្ស៊ី មុនីវង្ស ម៉ៅសេទុង កម្ពុជាក្រោម និងមហាវិថីព្រះសីហនុ រហូតដល់ដំណាច់ឆ្នាំ ២០១៦ នេះ ។ ដូច្នេះ នៅដំណាច់ឆ្នាំ ២០១៦ នេះ មហាវិថីធំៗចំនួន៦ នៅក្នុងរាជធានីភ្នំពេញខាងលើ នឹងលែងមានបណ្តាញខ្សែកាបស្អេកស្កះអនាធិបតេយ្យ នៅលើអាកាសដូចបច្ចុប្បន្ន ទៀតហើយ ។
នៅពេលនោះ សាធារណជន និងប្រព័ន្ធព័ត៌មានផ្សេងៗ បានដឹងច្បាស់ថា ខ្សែកាបដែលស្អេកស្កះដូចសំបុកពីងពាង នៅលើអាកាសទាំងនោះ នៅពេលកាត់ទម្លាក់រួច ជាខ្សែកាប ខ្សែអគ្គិសនី ។ ដូច្នេះដើម្បីរក្សាបាននូវសណ្តាប់ធ្នាប់ របៀបរៀបរយ កាត់បន្ថយជាអតិបរមានូវគ្រោះថ្នាក់ជាយថាហេតុ និងបញ្ចៀសការកកស្ទះចរាចរណ៍ក្នុងតំបន់ការដ្ឋាននោះ រដ្ឋបាលរាជធានីភ្នំពេញ ស្នើសុំឲ្យបងប្អូនប្រជាពលរដ្ឋជាម្ចាស់លំនៅដ្ឋាន ម្ចាស់អាជីវកម្ម ក្រុមហ៊ុន អង្គភាពរដ្ឋ និងអ្នកពាក់ព័ន្ធទាំងអស់ដែលមានបណ្តាញខ្សែកាប ឬកំពុងប្រើប្រាស់ចិញ្ចើមផ្លូវតាមបណ្តាមហាវិថីខាងលើ ត្រូវរួសរាន់រៀបចំរុះរើចេញ និងត្រូវចូលរួមបង្កលក្ខណៈងាយស្រួលដល់ក្រុមការងារ ដើម្បីឲ្យការអនុវត្តគម្រោងនេះប្រព្រឹត្តទៅដោយរលួន និងទទួលបានលទ្ធផលតាមការគ្រោងទុក៕
No comments:
Post a Comment