ដោយ៖ សាតចាន់បុត្រ
(មណ្ឌលគិរី)៖ប្រជាពលរដ្ឋជាង២រយគ្រួសារមានការព្រួយបារម្មណ៍និងភ័យខ្លាចគ្រាដែលត្រូវជិះក្បូនឆ្លងកាត់លើទឹកព្រែកធម្មជាតិជិត១០០ម៉ែត្រនារដូវវស្សាដើម្បីបញ្ជួនផលអនុផលពីភូមិមួយទៅភូមិមួយទៀតពិសេសក្មេងៗឆ្លងទៅសាលារៀន។
ក្តីព្រួយបារម្មណ៍នេះកើតមានក្នុងចំណោមប្រជាពលរដ្ឋនៅ២ភូមិស្ថិតក្នុងឃុំសុខសាន្ត ស្រុកកោះញែក ខេត្តមណ្ឌលគិរី ដោយពួកគាត់ទទូចសុំការជួយសាងសង់ស្ពាន។
ថ្មីៗនេះនៅក្នុងបណ្តាញទំនាក់ទំនងសង្គមហ្វេសប៊ុកបានសួរគ្នាថាករណីនេះពិតឬមិនពិតត្បិតសម័យនេះទៅហើយនៅតែមានការជិះក្បូនដើម្បីឆ្លងទឹកដែលមានសភាពហូរកាត់ខ្មួលខ្មាញ់ពីភូមិមួយទៅភូមិមួយទៀតខុសប្លែកពីបណ្តាភូមិឃុំនានាក្នុងប្រទេសកម្ពុជាមានផ្លូវគ្រប់ច្រកល្ហកដែលបានស្ថាបនារួចរាល់ជូនប្រជាពលរដ្ឋប្រើប្រាស់ទៅហើយនោះ។ឈ្មោះគណនីមួយមានឈ្មោះថា(អញ្ចឹងសោះ)នៅម៉ោងប្រមាណជា៤ល្ងាចថ្ងៃ២៤សីហា២០១៦នេះបានបង្ហោះរូបភាពប្រជាពលរដ្ឋនគរបាលនិងសិស្សានុសិស្សជិះលើក្បូននិងបានសរសេរអក្សរថា(សិស្សវិទ្យាល័យកោះញែកមួយចំនួនត្រូវជិះលើក្បូនដើម្បីទៅសាលា)។អត្ថន័យនេះបានបង្ករជាការងឿងឆ្ងល់សួរដេញដោលគ្នារហូតមានអ្នកចូលមើលរាប់ពាន់អ្នកត្រឹមរយៈពេលប៉ុន្មានម៉ោងក្រោយការបង្ហោះតែប៉ុណ្ណោះ។
នៅម៉ោងប្រមាណជា៥ល្ងាចថ្ងៃ២៤សីហាដដែលរស្មីកម្ពុជាបានទំនាក់ទំនងទៅលោក ខ្លូត សុឃា អធិការនគរបាលស្រុកកោះញែកលោកបានឆ្លើយទាំងក្តីអាណិតថារឿងហ្វេសប៊ុកបង្ហោះពិតជាមានករណីនោះប្រាកដមែន។លោកថាប្រជាពលរដ្ឋជាង២រយគ្រួសារបូករួមនិងសិស្សសាលាផងបានសំដែងការព្រួយបារម្មណ៍លើបញ្ហាសុវត្ថភាពនៃការធ្វើដំណើរខណៈត្រូវជិះក្បូនឆ្លងកាត់ទឹកព្រែកធម្មជាតិមួយដែលមានទទឹងតាមការស្មានចាប់ពី៨០ទៅ១០០ម៉ែត្រនិងមានជំរៅជាង១០ម៉ែត្រនារដូវវស្សានេះ។លោកបញ្ជាក់ថាបើនៅរដូវប្រាំងព្រែកធម្មជាតិដែលគេស្គាល់ថាឈ្មោះ"អូរច្បារ"នេះ គឺអាច ធ្វើដំណើរតាមរយៈម៉ូតូឬរថយន្តបាន ព្រោះទឹកស្រកសល់តិចតួច តែបើរដូវវស្សានេះគឺមិនអាចឆ្លង កាត់បាន ក្រៅពីក្បូនឬទូកនោះទេ។
នាយប៉ុស្តិ៍នគរបាលឃុំសុខសាន្តលោក ជួន ប៊ុនធឿន ក៏បានឲ្យដឹងដែរថាប្រជាពលរដ្ឋជាង២០០គ្រួសារដែលរស់នៅភូមិចំនួន២គឺភូមិថ្មីនិងភូមិជីក្លបគឺត្រូវឆ្លងកាត់អូរច្បារដើម្បីមកកាន់ភូមិដែលគេហៅថាភូមិទូលស្ថិតក្នុងឃុំសុខសាន្តដូចគ្នាដែលទីនោះមានសាលារៀននិងទីប្រជុំជនដើម្បីសិក្សានិងដោះដូរផលិតផលកសិកម្មប្រចាំថ្ងៃ។លោកថាការឆ្លងលើក្បូននេះត្រូវបានបង់ថ្លៃក្នុងម៉ូតូមួយគ្រឿងចំនួន៥ពាន់រៀល។ចំណែកសិស្សសាលាម្នាក់១ពាន់រៀលទាំងទៅទាំងមកបង់ឲ្យថៅកែឯកជន។ដោយសង្កេតឃើញបញ្ហាទាំងនេះអជ្ញាធរបានប្រជុំនិងបានលើកឡើងថាបើសិស្សសាលាមកឆ្លងជុំគ្នាគឺមិនត្រូវបានបង់ថ្លៃក្បូននោះទេតែបើមករប៉ាត់រប៉ាយគឺត្រូវបង់ប្រាក់ធម្មតា។
លោកយន់ សារ៉ោម ប្រធានមន្ទីរអភិវឌ្ឍន៍ជនបទខេត្តមណ្ឌលគិរីបានសំដែងការអាណិតអាសូរចំពោះប្រជាពលរដ្ឋក្មេងៗសិស្សានុសិស្សនៅក្នុងតំបន់ខាងលើដោយលោកបានបញ្ជាក់ថាកាលពីប៉ុន្មានថ្ងៃមុនក្រុមកាងារលោកក៏បានចុះផ្ទាល់ដល់ចំណុចលំបាកនោះនិងបានជួយសំរួលការលំបាកជូនប្រជាពលរដ្ឋដោយបានធ្វើក្បូនពីឬស្សីមួយមានទំហំ២ម៉ែតគុណនិង៦ម៉ែតទុកឲ្យធ្វើដំណើរលើទឹកព្រែកអូរច្បារនេះ។លោកថាចំពោះផ្លូវមន្ទីរបានស្ថាបនារួចរាល់ហើយនៅតែស្ពានឆ្លងកាត់ព្រែកតែប៉ុណ្ណោះ។
លោកប្រធានមន្ទីរបានបន្តថានៅក្នុងគម្រោងឆ្នាំ២០១៧លោកបានដាក់សំណើរទៅថ្នាក់លើដើម្បីស្ថាបនាស្ពានបេតុង១ដែរតែនៅមិនទាន់មានកញ្ចប់ថវិការនៅឡើយ។ជាបឋមលោកកំពុងតែគៀរគរប្រាក់ពីសប្បុរសជនដើម្បីបានមូលនិធិខ្លះស្ថាបនាស្ពានយោលមួយអន្លើរសិនសំរាប់ការឆ្លងកាត់បណ្តោះអាសន្ន។លោកក៏បានស្នើរឲ្យមិនមានការបង់ប្រាក់សម្រាប់ការជិះក្បូនរបស់ក្មេងៗជាកុមារកំព្រា តែបើគ្មាន ករណីលើកលែងនោះ លោកសុខចិត្តបរិច្ចាគប្រាក់ផ្ទាល់ខ្លួនថែមទៀត៕
No comments:
Post a Comment