ម៉ៃ ទិត្យថារ៉ា
 |
| ទាហានវៀតណាម កំពុងសាងសង់ប៉ុស្តិ៍នៅតំបន់ស។ រូបថត អាដហុក |
រតនគីរី៖(ខ្មែរថាមស៍)អាជ្ញាធរខេត្តរតនគិរីបានបដិសេធសំណើរបស់ភាគីវៀតណាមដែលសុំសាងសង់ខ្លោងទ្វារច្រកទ្វារព្រំដែនអន្តរជាតិស្រុកដាក់កឺខេត្តយ៉ាឡាយជាប់នឹងច្រកទ្វារព្រំដែនស្រុកអូរយ៉ាដាវខេត្តរតនគិរីខណៈទាហានវៀតណាម កំពុងបន្តសាងសង់ប៉ុស្តិ៍មួយកន្លែងនៅក្នុងតំបន់សហាមឃាត់ នៅក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ រំលោភទៅលើកិច្ចព្រមព្រៀងថ្ងៃទី១៧ ខែមករា ឆ្នាំ១៩៩៥។
អ្នកនាំពាក្យ និងជាអភិបាលរងខេត្តរតនគិរី លោក ញ៉ែម សំអឿន បានឲ្យដឹងថា នៅថ្ងៃទី១៧ ខែសីហា អាជ្ញាធរខេត្តយ៉ាឡាយ ប្រទេសវៀតណាម បានដាក់លិខិតស្នើសុំសង់ប៉ុស្តិ៍ មកអាជ្ញាធរខេត្ត ក្នុងកិច្ចប្រជុំទ្វេភាគីរវាងអាជ្ញាធរខេត្តទាំងពីរនៅក្រុងបានលុង។ វៀតណាម សំអាងថា កន្លែងសង់ខ្លោងទ្វារប៉ុស្តិ៍ព្រំដែនឋិតក្នុងដីវៀតណាមក៏ប៉ុន្តែតាមកិច្ចព្រមព្រៀងបោះបង្គោលព្រំដែននៃប្រទេសទាំងពីរ កំណត់ថា តំបន់ព្រំដែនដែលភាគីទាំងពីរមិនទាន់ឯកភាពនោះ បង្គោលខណ្ឌសីមាត្រូវរក្សាស្ថានភាពដដែល មិនអនុញ្ញាតឲ្យសាងសង់ ឬធ្វើអ្វីបានឡើយ។
លោកបានថ្លែងឲ្យដឹងទៀតថា៖ «យើងធ្វើរបាយការណ៍បញ្ជូនលិខិតស្នើសុំទៅថ្នាក់ជាតិរួចហើយ យើងមិនមានសិទ្ធិអនុញ្ញាតឲ្យគេសាងសង់នោះទេ ដូច្នេះត្រូវរង់ចាំការសម្រេចរបស់ថ្នាក់ជាតិ យើងបានទៅឃាត់គេកុំឲ្យសាងសង់ទេ គឺយើងមិនអនុញ្ញាតតែម្តង»។
លោកបានឲ្យដឹងទៀតថា កន្លែងដែលវៀតណាម ស្នើសុំសាងសង់ខ្លោងទ្វារនោះ គឺនៅត្រង់ បង្គោលព្រំដែនលេខ៣០ នៅចំណុចមុខច្រកទ្វារព្រំដែនអន្តរជាតិ ស្រុកអូរយ៉ាដាវ ភាគីប្រទេសទាំងពីរឯកភាពបោះផ្លូវការកាលពីខែធ្នូ ឆ្នាំ២០១៥។
លោកបានឲ្យដឹងទៀតថា ទាក់ទិនទៅនឹងទាហានវៀតណាម បានរំលោភសង់ប៉ុស្តិ៍មួយកន្លែងនៅក្នុងតំបន់សហាមឃាត់ ចំណុចអូរកុមារ ជិតប៉ុស្តិ៍ការពារព្រំដែនខ្មែរ ភូមិឡំ ឃុំប៉ក់ញ៉ៃ ស្រុកអូរយ៉ាដាវ គឺគេនៅបន្តធ្វើរបាយការណ៍ជាប្រចាំបញ្ជូនទៅថ្នាក់លើ ពីការវៀតណាម បន្តសាងសង់នេះ។
លោកបានឲ្យដឹងទៀតថា៖ «យើងចុះទៅហាមឃាត់គេកុំឲ្យធ្វើ ប៉ុន្តែគេបានប្រាប់យើងថា លុះត្រាតែគេមានលិខិតណែនាំពីថ្នាក់ជាតិរបស់គេដែរទើបគេឈប់»។
លោក វ៉ា គឹមហុងប្រធានគណៈកម្មការចម្រុះកិច្ចការព្រំដែនបញ្ជាក់ថា លោកមិនទាន់ទទួលរបាយការណ៍ពីអាជ្ញាធរខេត្តរតនគិរី នៅឡើយ។ហើយករណីទាហានវៀតណាម បានរំលោភសង់ប៉ុស្តិ៍មួយកន្លែងនៅក្នុងតំបន់សហាមឃាត់ ចំណុចអូរកុមារ ជិតប៉ុស្តិ៍ការពារព្រំដែនខ្មែរ ភូមិឡំ នោះ លោកបានផ្ញើកំណត់ការទូតទៅប្រទេសវៀតណាម តាំងពីថ្ងៃទី២៨ ខែកក្កដា។
លោកបានថ្លែងថា៖ «គេមិនងាយនឹងឆ្លើយតបមកយើងនោះទេ»។
កាលពីចុងខែកក្កដាកន្លងទៅ ទាហានវៀតណាម បានរំលោភសង់ប៉ុស្តិ៍មួយកន្លែងនៅក្នុងតំបន់សហាមឃាត់ ចំណុចអូរកុមារ ជិតប៉ុស្តិ៍ការពារព្រំដែនខ្មែរ ភូមិឡំ ឃុំប៉ក់ញ៉ៃ ស្រុកអូរយ៉ាដាវ។ ហើយរាជរដ្ឋាភិបាលកម្ពុជា ក៏បានផ្ញើកំណត់ទូតទៅភាគីវៀតណាម បន្ទាប់ពីអាជ្ញាធរខេត្តរតនគិរី ផ្តល់របាយការណ៍វៀតណាម រំលោភសង់ប៉ុស្តិ៍នេះ។ ប៉ុន្តែភាគីវៀតណាម មិនទាន់ឆ្លើយតបកំណត់ទូតរបស់ភាគីកម្ពុជា នៅឡើយនោះទេ។
យោងតាមលោក ឆាយ ធី មន្ត្រីសម្របសម្រួលសមាគមអាដហុក ប្រចាំខេត្តរតនគិរី បានឲ្យដឹងថា រយៈពេលមួយឆ្នាំគត់បើគិតតាំងពីថ្ងៃជីកស្រះ គឺវៀតណាម មិនបានលប់តាមអ្វីដែលសន្យានោះទេ តែបែរជាបន្តធ្វើប៉ុស្តិ៍នៅក្នុងតំបន់សបន្ថែមទៀត នេះបញ្ជាក់យ៉ាងច្បាស់ថា ភាគីវៀតណាម គេមិនច្រឡំនោះទេ គឺគេមានចេតនារំលោភលើអធិបតេយ្យភាពរបស់កម្ពុជា តែម្តង។
លោកបានថ្លែងបញ្ជាក់ទៀតថា៖ «យើងហាមឃាត់គេ១ខែកុំឲ្យធ្វើ ស្រាប់តែពេលនេះលេចរូបរាងចេញតែម្តង គេលែងជីកគ្រឹះទៀតហើយ»។
គួរបញ្ជាក់ថា កាលពីអំឡុងខែមេសា ឆ្នាំ២០១៥ យ៉ាងហោចណាស់ក៏មានស្រះទឹកចំនួន៨ដែលត្រូវបានជនជាតិវៀតណាមជីករួចរាល់នៅក្នុងតំបន់ហាមឃាត់ ដោយពុំមានអាជ្ញាធរកម្ពុជា បានដឹងដែលស្ថិតនៅក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ជាប់នឹងប្រទេសវៀតណាម ស្ថិតក្នុងភូមិសេសៅ ឃុំយ៉ាណាង ស្រុកដាក់កឺ ខេត្តយ៉ាឡាយ។
រដ្ឋធម្មនុញ្ញមាត្រា២ ចែងថា បូរណភាពទឹកដីកម្ពុជា មិនអាចរំលោភបានជាដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០.០០០ (មួយលើមួយរយពាន់) ធ្វើនៅចន្លោះឆ្នាំ១៩៣៣ ដល់ឆ្នាំ១៩៥៣ ហើយត្រូវទទួលស្គាល់ជាអន្តរជាតិនៅចន្លោះឆ្នាំ១៩៦៣ ដល់ឆ្នាំ១៩៦៩។
របាយការណ៍របស់អាជ្ញាធរបង្ហាញថា ព្រំដែនគោកប្រទេសកម្ពុជា ជាប់នឹងប្រទេសវៀតណាម មានបណ្ដោយ ១.២៧០គីឡូម៉ែត្រ។ ចាប់ពីឆ្នាំ២០០៥ រហូតបច្ចុប្បន្ន ភាគីទាំងពីរបានឯកភាពគ្នាបោះបង្គោលព្រំដែនបានជាង ៨៣ភាគរយ ពោលគឺបានឯកភាពគ្នាបោះបង្គោលព្រំដែនបាន ៣១១បង្គោល ដោយឡែកព្រំដែនទឹកមានប្រវែងជាង ២.៥០០គីឡូម៉ែត្រ មិនទាន់វាស់វែងនៅឡើយ៕
No comments:
Post a Comment