ប៉ិច សុធារី
 |
| លោក សំ សុគង់ មេធាវីការពារក្តីឲ្យលោកស្រី ថាក់ ឡានី ដែលបានចូលខ្លួនទៅតុលាការជាតំណាង។ ជរ សុគន្ធា |
ភ្នំពេញ៖ (ខ្មែរថាមស៍)មេធាវីការពារក្តីឲ្យលោកស្រី ថាក់ ឡានី ដែលរងបណ្តឹងលោកនាយករដ្ឋមន្ត្រី បានស្នើឲ្យតុលាការបង្អង់នីតិវិធីស៊ើបអង្កេត ដោយរង់ចាំព្រឹទ្ធសភាដក ឬព្យួរអភ័យឯកសិទ្ធិលោកស្រី ទៅតាមនីតិវិធីច្បាប់ជាមុនសិន ប៉ុន្តែព្រះរាជអាជ្ញារងបានបដិសេធ និងសម្រេចបន្តការស៊ើបអង្កេតលើសំណុំរឿងនេះ។
កាលពីថ្ងៃម្សិលមិញ អយ្យការអមសាលាដំបូងរាជធានីភ្នំពេញ បានកោះហៅលោកស្រី ថាក់ ឡានី ទៅបំភ្លឺជាលើកទី២ ក្រោយពីលោកស្រីខកខានមិនបានបង្ហាញខ្លួនតាមដីកាកោះជាលើកទី១។ តែយ៉ាងណា លោកស្រីនៅតែមិនបានចូលខ្លួនទៅបំភ្លឺតាមការកោះហៅលើកទី២នេះទេ។
លោក សំ សុគង់ មេធាវីការពារក្តីឲ្យលោកស្រី ថាក់ ឡានី ដែលបានចូលខ្លួនទៅតុលាការជាតំណាងលោកស្រី បានថ្លែងថា មូលហេតុដែលលោកស្រីមិនបានចូលខ្លួនទៅបំភ្លឺតាមដីកាកោះរបស់ព្រះរាជអាជ្ញារង ដោយសារតែលោកស្រីជាសមាជិកព្រឹទ្ធសភា ដែលមានអភ័យឯកសិទ្ធិ ហើយក្នុងដំណាក់កាលនេះ ស្ថិតក្នុងនីតិវិធីស៊ើបអង្កេត ពុំមែនជាបទល្មើសជាក់ស្តែងឡើយ។ លោកបន្តថា លោកបានដាក់ពាក្យស្នើសុំអញ្ញត្រកម្ម ឬស្នើសុំបង្អង់នីតិវិធីក្នុងការស៊ើបអង្កេត ទៅកាន់តុលាការ ដើម្បីរង់ចាំព្រឹទ្ធសភា ដក ឬព្យួរអភ័យឯកសិទ្ធិ។
លោកមេធាវី បានបញ្ជាក់ថា៖ «លោកស្រី [ថាក់ ឡានី] នឹងពិចារណារកលទ្ធភាពក្នុងការចូលទៅបំភ្លឺ នៅពេលណាដែលព្រឹទ្ធសភា បានដក ឬព្យួរអភ័យឯកសិទ្ធិរបស់គាត់ទៅតាមនីតិវិធីច្បាប់ហើយ»។
ព្រះរាជអាជ្ញារងសាលាដំបូងរាជធានីភ្នំពេញ លោក លី សុផាណា បានបដិសេធលើពាក្យស្នើសុំអញ្ញត្រកម្ម ស្ដីពីការបង្អង់នីតិវិធីនៃការកោះហៅ ឬការសួរចម្លើយ ឬការស៊ើបអង្កេតបឋមរបស់មេធាវីលោកស្រី ថាក់ ឡានី ដោយមូលហេតុមិនមានមូលដ្ឋានគតិយុត្តិគ្រប់គ្រាន់តាមបញ្ញត្តិនីតិវិធីព្រហ្មទណ្ឌ និងច្បាប់ដែលពាក់ព័ន្ធ។
លោកថា៖ «យើងនឹងសម្រេចបន្តចំណាត់ការស៊ើបអង្កេតរឿងក្តីនេះទៀត ដោយពិនិត្យលើពាក្យបណ្តឹង ភស្តុតាង និងសាក្សីដែលមានប្រយោជន៍ដល់ចំណាត់ការរឿងក្តីនេះ។
អយ្យការអមសាលាដំបូងរាជធានីភ្នំពេញ បានកោះហៅលោកស្រី ថាក់ ឡានី និងលោក សម រង្សុី ប្រធានគណបក្សសង្គ្រោះជាតិ ឲ្យចូលបំភ្លឺជាបន្តបន្ទាប់ ជុំវិញពាក្យបណ្តឹងរបស់មេធាវីលោកនាយករដ្ឋមន្ត្រី ហ៊ុន សែន ករណីដែលអ្នកទាំងពីរចោទប្រកាន់លោកនាយករដ្ឋមន្ត្រី ថាជាអ្នកនៅពីក្រោយឃាតកម្មបាញ់សម្លាប់អ្នកស្រាវជ្រាវឯករាជ្យ លោកបណ្ឌិត កែម ឡី។ លោកនាយករដ្ឋមន្ត្រី ហ៊ុន សែន តាមរយៈមេធាវីតំណាង បានប្តឹងទារសំណងជំងឺចិត្តពីអ្នកទាំងពីរ ក្នុងម្នាក់ ១០០រៀល។ ប៉ុន្តែកន្លងមក លោកស្រី ថាក់ ឡានី ធ្លាប់បានបដិសេធថា លោកស្រីមិនបានចោទប្រកាន់លោកនាយករដ្ឋមន្ត្រីនោះទេ។ ចំណែកលោក សម រង្សុី ត្រូវបានសាលាដំបូង កោះហៅទៅបំភ្លឺនៅថ្ងៃទី១៩ ខេសីហា ស្អែកនេះ៕
No comments:
Post a Comment