ព្រះសីហនុ ៖ នៅព្រឹកថ្ងៃទី២៦ ខែសីហានេះ មានជនជាតិកូរ៉េ២នាក់ទៀតហើយ ដែលបានលង់ទឹកស្លាប់ នៅឆ្នេរសមុទ្រអូរត្រេះ២ ស្ថិតនៅក្នុងភូមិ៦ សង្កាត់លេខ៤ ក្រុងព្រះសីហនុ។ ជនជាតិកូរ៉េចំនួន២នាក់នោះ គឺជាឪពុកនិងកូន ដោយម្នាក់អាយុ៤០ឆ្នាំ និងក្មេងប្រុសអាយុ៤ឆ្នាំ បានលង់ទឹកស្លាប់ទាំង២នាក់ ។ កម្លាំងជំនាញបានពិនិត្យសាកសពនៅកន្លែងហេតុ ។
លោក តាំង សុចិត្តគ្រឹះស្នា ប្រធានមន្ទីទេសចរណ៍ខេត្តព្រះសីហនុ បានបញ្ជាក់ប្រាប់សារព័ត៌មានថ្មីៗថា មូលហេតុដែលជនជាតិកូរ៉េទាំងពីរនាក់ លង់ទឹកស្លាប់នោះដោយសារតែឪពុក និងកូននោះ បានជិះលើពោង ដែលបានអណ្ដែតឆ្ងាយនៅលើផ្ទៃសមុទ្រ ហើយក៏ត្រូវក្រឡាប់ពោងទើបបណ្ដាឲ្យលង់ទឹកស្លាប់ទាំងពីរនាក់។
កាលពីថ្ងៃសុក្រសប្ដាហ៍មុន ទឹករលកសមុទ្រនៅខេត្តព្រះសីហនុតំបន់ឆ្នេរអូឈើទាល បានឆក់យកជីវិតបុរសម្នាក់មកពីខេត្តកំពង់ចាមដែលទៅកម្សាន្តនៅក្រុងព្រះសីហនុ។ ហើយមួយថ្ងៃបន្ទាប់ មានបុរសម្នាក់ទៀតបានលង់ទឹកសមុទ្រនៅតំបន់ឆ្នេរអូឈើទាលខេត្តព្រះសីហនុ តែមិនបណ្តាលឲ្យបាត់បង់ជីវិតទេ។
កាលពីថ្ងៃទី២០ សីហា ស្នងការដ្ឋាននគរបាលខេត្តព្រះសីហនុ អំពាវនាវពលរដ្ឋដែលរស់នៅជាប់តំបន់ឆ្នេរសមុទ្រ ទាំងអ្នកប្រកបអាជីវកម្ម មុខរបរនេសាទខ្នាតតូច ខ្នាតធំ ត្រូវផ្អាកអាជីកម្មនិងការធ្វើដំណើរលើផ្ទៃសមុទ្រ ជាបណ្ដោះអាសន្ន ដោយរង់ចាំអាកាសធាតុវិលមករកភាពដើមវិញ។ ចំណែកម្ចាស់អាជីវកម្មជួលយានយន្ត ដឹកភ្ញៀវទេសចរណ៍ ត្រូវយកចិត្តទុកដាក់ឲ្យបានខ្ពស់ពីបញ្ហាអាកាសធាតុ លើផ្ទៃសមុទ្រ ត្រួតពិនិត្យលក្ខណៈបច្ចេកទេស មិនផ្ទុកលើសចំណុះ ហើយក្នុងករណីមានខ្យល់បកកន្ទ្រាក់ ត្រូវផ្អាកការចេញដំណើរជាបណ្ដោះអាសន្ន។
ដោយឡែកម្ចាស់អាជីវកម្មតាមឆ្នេរសមុទ្រ និងតាមបណ្ដាកោះ ត្រូវចូលរួមសហការជាមួយកម្លាំងសមត្ថកិច្ច និងជួយផ្សព្វផ្សាយណែនាំ ពន្យល់ទៅភ្ញៀវទេសចរ ដែលមកទៅលេងកម្សាន្តដើម្បីបង្កើនការប្រុងប្រយ័ត្ន ជៀសវាងការកើតមានបញ្ហា។ ហើយអាជ្ញាធរក៏បានដាក់ក្រុមជួយសង្គ្រោះ រងចាំជួយសង្គ្រោះភ្ញៀវទេសចរណ៍ដែលទៅលេងកម្សាន្តទីនោះផងដែរ។
តែយ៉ាងណាការគ្រោះថ្នាក់ផ្ទួនៗ បានធ្វើឲ្យមានក្តីបារម្ភថា ចំនួនភ្ញៀវទេចរនៅក្រុងព្រះសីហនុអាចនឹងថយចុះនាពេលខាងមុខ ប្រសិនបើគ្មានវិធានការហ្មត់ចត់ស្តារទំនុកចិត្តភ្លាមៗនោះទេ។
No comments:
Post a Comment