តាំង វីដា
 |
| ពលរដ្ឋមានជម្លោះដីធ្លីឈរនៅខាងមុខតុលាការដើម្បីទាមទារឲ្យដោះលែងសកម្មជនពីរនាក់ដែលសមត្ថកិច្ចឃាត់ខ្លួនករណីយុទ្ធនាការថ្ងៃចន្ទពណ៌ខ្មៅ។ ជរ សុគន្ធា |
ភ្នំពេញ៖(ខ្មែរថាមស៍)សាលាដំបូងរាជធានីភ្នំពេញកាលពីម្សិលមិញ បានបើកសវនាការជំនុំជម្រះលើសកម្មជនដីធ្លីបឹងកក់ ២នាក់ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធនឹងយុទ្ធនាការថ្ងៃចន្ទពណ៌ខ្មៅ និងបានសម្រេចឃុំខ្លួនពួកគេនៅពន្ធនាគារជាបណ្ដោះអាសន្ន រង់ចាំបង្កការជំនុំជម្រះនៅសបា្តហ៍ក្រោយ ចំណែកស្ត្រីជនជាតិអេស្ប៉ាញ ដែលសមត្ថកិច្ចបានឃាត់ខ្លួនសួរនាំពាក់ព័ន្ធនឹងរឿងនេះ ត្រូវបានបញ្ជូនត្រលប់ទៅប្រទេសវិញ។
សកម្មជនដីធ្លីតំបន់បឹងកក់ ២នាក់ មានអ្នកស្រី ទេព វន្នី និងអ្នកស្រី បូវ សោភា ត្រូវបានអាជ្ញាធរខណ្ឌដូនពេញ ឃាត់ខ្លួនកាលពីល្ងាចថ្ងៃទី១៥ ខែសីហា ខណៈពួកគេ និងពលរដ្ឋមួយចំនួនទៀត កំពុងធ្វើសកម្មភាពក្នុងយុទ្ធនាការថ្ងៃចន្ទពណ៌ខ្មៅ ក្នុងគោលការណ៍ទាមទារឲ្យរដ្ឋាភិបាលកម្ពុជា បញ្ឈប់ការរំលោភសិទ្ធិមនុស្ស និងដោះលែងសកម្មជនសិទ្ធិមនុស្ស និងនយោបាយ។ ក្នុងយុទ្ធនាការថ្ងៃចន្ទពណ៌ខ្មៅ សបា្តហ៍ទី១៥នេះ ពួកគេបានប្រមូលផ្តុំគ្នាសម្ដែងមតិ និងធ្វើរូបត្លុកជាមនុស្ស ៤នាក់ ដោយសរសេរថា មន្ត្រីពុករលួយ តុលាការ ជួបសម្លាប់ អ្នកបញ្ជាសម្លាប់ និងឃាតករ និងបានកប់រូបទាំងនោះ ក្នុងរណ្តៅផងដែរ។
សកម្មជនទាំងពីរនាក់នេះ ត្រូវបានឃុំខ្លួននៅទីបញ្ជាការខណ្ឌ និងត្រូវបានបញ្ជូនមកកាន់សាលាដំបូងរាជធានីភ្នំពេញ នៅព្រឹកថ្ងៃទី១៧ ខែសីហា។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឲ្យដឹងថា ក្រោយការសួរនាំរបស់អយ្យការ លោកចៅក្រម ពេជ្រ វិជ្ជាធរ បានបើកសវនាការជំនុំជម្រះ លើជនជាប់ចោទទាំងពីរ តាមនីតិវិធីបង្គាប់ឲ្យបង្ហាញខ្លួនភ្លាម ដែលជាប់ចោទពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមបញ្ញត្តិមាត្រា ៤៩៥ នៃក្រមព្រហ្មទណ្ឌ។ លោកបានបន្តថា បន្ទាប់ពីដំណើរការសវនាការ ចៅក្រមជំនុំជម្រះ ក៏បានសម្រេចឃុំខ្លួនជនជាប់ចោទទាំង២រូប ដើម្បីបន្តសវនាការនៅថ្ងៃចន្ទ ទី២២ ខែសីហា ឆ្នាំ២០១៦ ពេលព្រឹក។
មេធាវីការពារសិទ្ធិស្ត្រីបឹងកក់ ទាំងពីររូប មិនអាចទាក់ទងបានទេ។ អ្នកស្រី ទេព វន្នី និងអ្នកស្រី បូវ សោភា ត្រូវបានសមត្ថកិច្ចឃាត់ខ្លួនជាច្រើនដង និងរងចោទ រហូតដល់ជាប់ពន្ធនាគាររយៈពេលខ្លីម្តងរួចហើយ កាលពីឆ្នាំមុន។
កាលពីថ្ងៃអង្គារ ស្ត្រីជនជាតិអេស្ប៉ាញម្នាក់ មានឈ្មោះ Marga Bujosa Segado ក៏ត្រូវបានសមត្ថកិច្ចឃាត់ខ្លួនសួរនាំអស់ពេញមួយថ្ងៃផងដែរ។
លោក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ បានឲ្យដឹងថា សមត្ថកិច្ច បានសម្រេចបញ្ជូនស្ត្រីជនជាតិអេស្ប៉ាញ រូបនេះ ត្រលប់ទៅប្រទេសកំណើតវិញ នៅយប់ម្សិលមិញ បន្ទាប់ពីរកឃើញថា នាងមកបំពេញការងារនៅប្រទេសកម្ពុជា ដោយមិនមានសៀវភៅការងារ គេចវេសពីការបង់ពន្ធ និងបានចូលរួមការតវ៉ារបស់អ្នកជម្លោះដីធ្លីជាញឹកញាប់។
រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានឲ្យដឹងថា មូលហេតុដែលអាជ្ញាធរកម្ពុជា ហាមឃាត់ និងឃាត់ខ្លួនសកម្មជន ដែលធ្វើសកម្មភាពថ្ងៃចន្ទពណ៌ខ្មៅ គឺមិនមានអ្វីប្លែកនោះទេ ដោយសារតែអ្នកទាំងនោះ ជាក្រុមប្រឆាំងដែលមានសកម្មភាពជាប្រព័ន្ធ ទទួលកម្រៃពីភ្នាក់ងារបរទេស ហើយជនបរទេសបានប្រើប្រាស់កម្ពុជា ជាសមរភូមិចលនាសកម្មជនប្រឆាំងនឹងរដ្ឋអំណាច មិនត្រឹមតែ ទៅប្រតិបត្តិការនៅក្នុងកម្ពុជា ទេ ក៏ប៉ុន្តែនៅក្នុងតំបន់អាស៊ាន ក៏ដូចជាក្នុងតំបន់ដទៃទៀត។
លោកថា៖ «ខ្ញុំសង្កេតឃើញជនបរទេសមួយចំនួនក៏ក្លែងបន្លំអត្តសញ្ញាណជាភ្ញៀវទេសចរ អ្នកសិក្សាស្រាវជ្រាវ ឬក៏ដទៃទៀត ដើម្បីយកឱកាសគ្រប់គ្រង និងវាយតម្លៃនៃកិច្ចប្រតិបត្តិការរបស់ខ្លួន។ នៅពេលមានសកម្មភាពតវ៉ាក្រុមនោះ តែងតែយកមនុស្សដែលងាយរងគ្រោះ ធ្វើជារនាំង និងជាខែល ដើម្បីយកលេសដាក់បន្ទុកទៅលើសមត្ថកិច្ចបង្ក្រាបស្ត្រីចាស់ ស្ត្រីមានផ្ទៃពោះ និងកុមារ»៕
No comments:
Post a Comment