ម៉ៃ ទិត្យថារ៉ា
 |
| លោក នាយករដ្ឋមន្ត្រីចុះជួបនិងសួរសុខទុក្ខប្រជាពលរដ្ឋនៅខេត្តតាកែវកាលពីថ្ងៃម្សិលមិញ។ រូបថត ហ្វេសប៊ុក |
ភ្នំពេញ៖(ខ្មែរថាមស៍)លោកនាយករដ្ឋមន្ត្រីហ៊ុនសែនបានអំពាវនាវជាសាធារណៈទៅដល់ប្រជាពលរដ្ឋទូទាំងប្រទេសដែលរស់នៅតាមបណ្តាខេត្តមានព្រំប្រទល់ជាប់ជាមួយប្រទេសវៀតណាមហាមដាច់ខាតមិនឲ្យជួលដីទៅឲ្យប្រជាជនវៀតណាម និងស្នើឲ្យអាជ្ញាធរមានសមត្ថកិច្ច ត្រូវរៀបចំបោះបង្គោលព្រំដែនឲ្យបានលឿនបំផុតតាមដែលអាចធ្វើទៅបាន។
ក្រោយពីដំណើរទស្សនកិច្ចចុះពិនិត្យសមិទ្ធផលជាតិនិងជួបសំណេះសំណាលជាមួយមន្ត្រីរាជការនិងដោះស្រាយបញ្ហាប្រឈមនានានៅខេត្តតាកែវ កាលពីថ្ងៃទី១៦ ខែសីហា លោកនាយករដ្ឋមន្ត្រីបានសរសេរសារបង្ហោះនៅលើគេហទំព័រ Facebook របស់លោកថា ខេត្តតាកែវ ជាប់ព្រំដែនវៀតណាម ដូច្នេះអាជ្ញាធរខេត្តត្រូវបង្កើនទំនាក់ទំនងសហប្រតិបត្តិការល្អរវាងប្រទេសទាំងពីរ ហើយណែនាំប្រជាពលរដ្ឋទាំងសងខាងឲ្យចេះយោគយល់គ្នា។
លោកនាយករដ្ឋមន្ត្រីថា៖ «ហាមដាច់ខាតការជួលដីឲ្យប្រជាជនវៀតណាម។ នេះមិនមែនសម្រាប់តែខេត្តតាកែវ មួយទេ គឺសម្រាប់ខេត្តទាំងអស់ដែលមានព្រំប្រទល់ជាមួយវៀតណាម។ចំពោះការងារព្រំដែនអាជ្ញាធរមានសមត្ថកិច្ច ត្រូវរៀបចំបោះបង្គោលព្រំដែនឲ្យបានលឿនបំផុតតាមដែលអាចធ្វើទៅបាន»។
គួរបញ្ជាក់ផងដែរថា កាលពីខែវិច្ឆិកា ឆ្នាំ២០១៥ សារាចរណែនាំចុះហត្ថលេខាដោយលោកនាយករដ្ឋមន្ត្រី ហ៊ុន សែន បានហាមពលរដ្ឋខ្មែរ ដែលរស់នៅជាប់ព្រំដែនបញ្ឈប់ការជួលដីទៅឲ្យប្រទេសជិតខាងរួមមាន ថៃ វៀតណាម និងឡាវ ដោយគូសបញ្ជាក់ថា ដីស្រែរបស់ខ្មែរ មួយចំនួនពុំទាន់មានរៀបចំឯកសារគតិយុត្តិ ឬកិច្ចសន្យាជួលត្រឹមត្រូវជាពិសេសនៅតំបន់ព្រំដែនខ្លះមិនទាន់កំណត់ខណ្ឌសីមា និងបោះបង្គោលព្រំដែននៅឡើយ។
កាលពីថ្ងៃទី១៤ ខែកក្កដា រដ្ឋមន្ត្រីក្រសួងមហាផ្ទៃ លោក ស ខេង បានប្រាប់ឲ្យ អាជ្ញាធរថ្នាក់ក្រោមជាតិចាត់វិធានហាមឃាត់ជាបន្ទាន់ ចំពោះការជួល ឬលក់ដីឲ្យបរទេស នៅតាមខ្សែបន្ទាត់ព្រំដែនទូទាំងប្រទេសកម្ពុជា ដើម្បីបញ្ចៀសបញ្ហាព្រំដែននានា។ ដោយចេញបញ្ជាឲ្យ អាជ្ញាធរថ្នាក់ក្រោមជាតិ ពិសេសគឺអាជ្ញាធរថ្នាក់មូលដ្ឋាន ត្រូវត្រួតពិនិត្យ និងហាមឃាត់ រាល់ការជួលលក់ដីនៅតាមព្រំដែនឡើងវិញ ដើម្បីរក្សាស្ថិរភាព បូរណភាពយូរអង្វែងរបស់កម្ពុជា។
លោកថា៖ «បញ្ហាជួលលក់ដីតាមបណ្តោយព្រំដែននេះយូរទៅ អាចក្លាយជាបញ្ហាបូរណភាពដែនដី ដោយភាគីម្ខាងទៀតអាចអះអាងថា នេះជាដីរបស់គេកាន់កាប់យូរណាស់ មកហើយ»។
នៅក្នុងសេចក្ដីប្រកាសព័ត៌មានមួយស្ដីពីលទ្ធផលនៃដំណើរទស្សនកិច្ចផ្លូវការរបស់ប្រមុខការទូតកម្ពុជា លោក ប្រាក់ សុខុន ទៅកាន់ប្រទេសវៀតណាម កាលពីថ្ងៃទី២១ ដល់ថ្ងៃទី២៣ ខែមិថុនា ឆ្នាំ២០១៦ បានបង្ហាញថា រដ្ឋមន្ត្រីក្រសួងការបរទេសកម្ពុជា និងរដ្ឋមន្ត្រីក្រសួងការបរទេសវៀតណាម បានឯកភាពគ្នាពន្លឿនការងារបោះបង្គោលព្រំដែនគោកឲ្យឆាប់ចប់ជាស្ថាពរ ដើម្បីបញ្ចប់បញ្ហាចម្រូងចម្រាស។
តំណាងរាស្ត្រគណបក្សសង្គ្រោះជាតិ ដែលតែងតែសកម្មក្នុងការចុះពិនិត្យព្រំដែនលោក ស៊ុន ឆ័យ បានថ្លែងឲ្យដឹងថា លោកនាយករដ្ឋមន្ត្រីបានប្រកាសហើយក៏បានចេញនូវសារាចរណែនាំហាមពលរដ្ឋខ្មែរ ដែលរស់នៅជាប់ព្រំដែនបញ្ឈប់ការជួលដីទៅឲ្យប្រទេសជិតខាងរួមមាន ថៃ វៀតណាម។ ហើយលោក ស ខេង ក៏បានចេញសេចក្តីណែនាំបន្តផងដែរ តែមិនឃើញមានប្រសិទ្ធភាពអ្វីនោះទេ។
លោកបានថ្លែងថា៖ «ដើម្បីឲ្យមានប្រសិទ្ធភាពគួរតែផ្តល់សិទ្ធិឲ្យអាជ្ញាធរមូលដ្ឋានធ្វើ»។
សម្រាប់អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី នេះមិនមែនជាលើកទី១នោះទេ ហើយរហូតដល់អាជ្ញាធរបានប្រកាសថា នឹងបញ្ជូនក្រុមការងារមួយដើម្បីស្វែងរកការពិតពីទំហំនៃការជួល ប៉ុន្តែតាំងពីនោះមកក៏ស្ងាត់ទៅវិញ ចំណែកតាមតំបន់ព្រំប្រទល់ពុំមានវិធានការអ្វីដែរគឺនៅស្ងាត់ដូចមុន គឺនៅតែជួលដដែល។
លោកបានថ្លែងថា៖ «បើគ្រាន់តែអំពាវនាវអត់មានធ្វើអ្វីជាក់លាក់នោះទេ គឺនៅតែប៉ុណ្ណឹង»។
លោកបានថ្លែងថា ការជួលនោះគឺពិបាកត្រង់ថា ប្រសិនបើរឿងនេះធំទៅៗថ្ងៃក្រោយដីជាដីរបស់ពលរដ្ឋខ្មែរ តែប្លង់ពលរដ្ឋវៀតណាម អ្នកកាន់នេះជាការគ្រោះថ្នាក់។ ហើយបើជួលដីត្រឹមតែ ១ ទៅ២ហិកតារវាមិនអីនោះទេ តែបើជួលរាប់រយរាប់ពាន់ហិកតារ ចូលដី៣ ទៅ៤គីឡូ នៅពេលមានវិបត្តិកើតឡើង គឺគេយកទ័ពគេមកដាក់។
លោកបានថ្លែងថា៖ «សូម្បីតែគេជីកស្រះលើដីយើង និងចូលក្នុងតំបន់ស យើងគ្មានធ្វើអីគេផងហ្នឹង ដោយសារតែកម្លាំងយើងវាតិច បានត្រឹមឈរមើលគេហ្នឹង»។
តាមរបាយការណ៍សរុបបឋមរបស់ក្រសួងមហាផ្ទៃ មានប្រជាពលរដ្ឋខ្មែរ ដែលរស់នៅតាមខ្សែបន្ទាត់ព្រំដែនកម្ពុជា-វៀតណាមចំនួន ៩៥២ គ្រួសារបានជួលដីឲ្យពលរដ្ឋវៀតណាម ក្នុងចំណោមផ្ទៃដីសរុបទាំងអស់ ៦៦៣១,៥៤ ហិកតារ។ ក្នុងនោះខេត្តតាកែវ មាន ២៦៣ គ្រួសារ (ទំហំផ្ទៃដី ៣៤២០ ហិកតារ) ស្វាយរៀង ១៧៨ គ្រួសារ (១០៣៨ ហិកតារ) ព្រៃវែងមាន ៣១២ គ្រួសារ (១២៩២ ហិកតារ) ក្រចេះ ២១ គ្រួសារ ( ២១៤ ហិកតារ) និងខេត្តកណ្តាល មាន ១៧៨ គ្រួសារ (៦៦៥,៦១ ហិកតារ)៕
No comments:
Post a Comment