និពន្ធដោយ:ម៉ៅ សុផា
ភ្នំពេញ៖ រាល់ការិយាល័យចុះឈ្មោះបោះឆ្នោតនីមួយៗ មានកម្លាំងប៉ុស្តិ៍នគរបាលចំនួន២នាក់ ដើម្បីការពារសណ្តាប់ធ្នាប់ និងសន្តិសុខ ក្នុងអំឡុងពេលនៃការចុះឈ្មោះបោះឆ្នោត។ ម្យ៉ាងទៀត កម្លាំងសមត្ថកិច្ចនៃអធិការដ្ឋានចំនួន៥នាក់ និងកម្លាំងកងរាជអាវុធហត្ថចំនួន៥នាក់ទៀត ក៏ត្រូវបានត្រៀមទុកផងដែរសម្រាប់ការិយាល័យចុះបោះឆ្នោតនីមួយៗ ដើម្បីធ្វើអន្តរាគមន៍លើឧប្បទ្ទវហេតុណាមួយ។
ក្រសួងមហាផ្ទៃ បានបង្កើតគណៈបញ្ជាការសនិ្តសុខអចិន្ត្រៃយ៍ ដើម្បីត្រួតពិនិត្យនិងការពារសណ្តាប់ធ្នាប់ ក្នុងអំឡុងពេល នៃការចុះឈ្មោះបោះឆ្នោតនាពេលខាងមុខ។ សម្តេច ស ខេង រដ្ឋមន្ត្រីក្រសួងមហាផ្ទៃ គឺជាប្រធាននៃគណៈបញ្ជាការសន្តិសុខអចិន្ត្រៃយ៍នេះ។ គណៈបញ្ជាការសន្តិសុខអចិន្ត្រៃយ៍ ក៏បានបង្កើតលេខាធិការដ្ឋានរបស់ខ្លួនផងដែរ ដែលមានលោក នេត សាវឿន អគ្គស្នងការនគរបាលជាតិ ជាប្រធាន ហើយលោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេស ជាអនុប្រធាន។
លោក នេត សាវឿន បានលើកឡើងថា កម្លាំងសមត្ថកិច្ចចំនួន៥២៣៦នាក់ នឹងត្រូវដាក់តាមការិយាល័យចុះឈ្មោះបោះឆ្នោតទាំង១៦៣៣ នៅទូទាំងប្រទេស។ លោក នេត សាវឿន បន្ថែមទៀតថា ការិយាល័យចុះឈ្មោះបោះឆ្នោតមួយ មានកម្លាំងប៉ុស្តិ៍នគរបាលចំនួន២នាក់ និងកម្លាំងត្រៀមអន្តាគមន៍ ពីអធិការដ្ឋាននគរបាល នៅតាមក្រុង-ស្រុក-ខណ្ឌ នីមួយៗ ចំនួន៥នាក់ និងកម្លាំងត្រៀមអន្តរាគនម៍ពីបញ្ជាការដ្ឋាននៃកងរាជអាវុធហត្ថ នៅតាមក្រុង-ស្រុក-ខណ្ឌនីមួយៗ ចំនួន៥នាក់។
អគ្គស្នងការនគរបាលជាតិរូបនេះ បញ្ជាក់ថា ប្រតិបត្តិការរបស់គណៈបញ្ជាការសន្តិសុខអចិន្ត្រៃយ៍ គឺធានាឲ្យបាននូវសន្តិសុខ សណ្តាប់ធ្នាប់ និងសុវត្ថិភាព សម្រាប់ដំណើរការនៃការចុះឈ្មោះបោះឆ្នោត ឲ្យប្រប្រឹត្តទៅដោយរលូតនិងគ្មានការបំភិតបំភ័យ គ្មានការគំរាមកំហែង និងគ្មានអំពើហិង្សា។ លោក ផ្ញើសារទៅកាន់ ភ្នាក់ងារសន្តិសុខទាំងអស់ថា ត្រូវមានស្មារតីប្រុងប្រយ័ត្ន ហើយពង្រឹងសមត្ថភាព និងឈ្វេងយល់ឲ្យបានច្បាស់អំពីគោលការណ៍ទាំងឡាយណា ដែលទាក់ទងនឹងការបោះឆ្នោត ដូចជា ច្បាប់ បទបញ្ជា និងនីតិវិធី ក្រមសីលធម៌ ផែនការនៃអន្តរស្ថាប័ន រវាងក្រសួងមហាផ្ទៃ ក្រសួងការពារជាតិ និង គជប ជាដើម។
ការថ្លែងរបស់លោក នេត សាវឿន ខាងលើធ្វើក្នុងកិច្ចប្រជុំផ្សព្វផ្សាយផែនការនៃអន្តរស្ថាប័ន ស្តីពីកិច្ចការពារនូវការចុះឈ្មោះបោះឆ្នោត។ កិច្ចប្រជុំនេះ មានការចូលរួមពីរដ្ឋមន្ត្រីក្រសួងមហាផ្ទៃ ប្រធានគជប អគ្គស្នងការនគរបាលជាតិ អគ្គមេបញ្ជាការកងរាជអាវុធហត្ថលើផ្ទៃប្រទេស តំណាងគណបក្សប្រជាជនកម្ពុជា តំណាងគណបក្សសង្គ្រោះជាតិ និងកម្លាំងសមត្ថកិច្ចជាច្រើនទៀត ដែលមានប្រហែលជា២០០នាក់។
សូមបញ្ជាក់ថា នៅថ្ងៃទី១ ខែកញ្ញា ឆ្នាំ២០១៦ គឺជាការបរិច្ឆេទនៃការចុះបោះឆ្នោតថ្នាក់ឃុំ-សង្កាត់។ ការចុះឈ្មោះបោះឆ្នោត មានរយៈពេល៣ខែ គឺចាប់ពីខែកញ្ញា រហូតដល់ខែវិច្ឆិកា។ ចំណែកគជប បានត្រៀមថវិកាប្រហែលជា ២៣លានដុលា្លរ ដើម្បីចាយវាយក្នុងអំពេលនៃការចុះឈ្មោះបោះឆ្នោត៕
No comments:
Post a Comment