CEN
ដោយ:មុនីរាជ
ភ្នំពេញ: អភិបាលខេត្តស្វាយរៀង បានបដិសេធ និងច្រានចោល ចំពោះការចោទប្រកាន់ របស់ក្រុមតំណាងរាស្ត្រ គណបក្សសង្គ្រោះជាតិ ថានៅឃុំទួលស្តី និងឃុំចន្ទ្រា ស្រុកចន្ទ្រា និងនៅសង្កាត់ប្រាសាទ ក្រុងបាវិត នៅមានការជួលដី ឲ្យប្រជាពលរដ្ឋវៀតណាម ធ្វើស្រែ។ ដោយអភិបាលខេត្តស្វាយរៀង បានហៅការចោទប្រកាន់នេះ គឺមិនមែនជាការពិត និងដើម្បីកេងចំណេញនយោបាយ។
លោក ប៉ែន វិបុល អភិបាលខេត្តស្វាយរៀង បានមានប្រសាសន៍ ប្រាប់គេហទំព័រ CEN ឲ្យដឹងថា បន្ទាប់ពីបានទទួលព័ត៌មាននេះ លោកបានបញ្ជា អភិបាលរងខេត្ត ចុះទៅពិនិត្យជាបន្ទាន់ នៅតាមទីតាំងដែលគណបក្សសង្គ្រោះជាតិ បានលើកឡើងចំពោះ ចំណុចនៅសង្កាត់ប្រាសាទ ក្រុងបាវិត ចំនួន ៤០ ហិកតា គឺជាដីរបស់ប្រជាពលរដ្ឋ ចំនួន៤គ្រួសារ ហើយឆ្នាំនេះ គាត់បានធ្វើស្រែ។ ហើយរឿងទំនាស់ គឺមកពីខាងសមាជិកគណបក្ស ដែលធ្លាប់តែយកគោ ក្របី ឲ្យទៅស៊ីស្មៅ នៅលើដីនោះ ហើយឥឡូវ ម្ចាស់ដីគេធ្វើស្រែ លែងមានស្មៅឲ្យគោ ក្របី ស៊ី ក៏ខឹងប្តឹងថា ជួលដីឲ្យវៀតណាម។ ចំណែកនៅឃុំចន្ទ្រា នៅឆ្នាំ២០១៥ គឺមានជួលមែន ២៥០ ហិកតា ហើយនៅពេលរាជរដ្ឋាភិបាល ប្រកាសឲ្យឈប់ជួលដី គឺនៅឆ្នាំ២០១៦នេះ គ្មានការជួលទៀតទេ។ ហើយមានប្រជាពលរដ្ឋខ្មែរ ៣ គ្រួសារ ធ្វើស្រែ ១០ ហិកតា ដែលជាដីដែលធ្លាប់ជួលឲ្យវៀតណាម ហើយដី ២៥០ ហិកតានោះ គឺស្មៅត្រឹមៗ ជង្គង់ អត់មានជួលទេ ចេះតែចោទប្រកាន់គ្មានការពិត។ ហើយនៅថ្ងៃស្អែក (២៦សីហា) ក្រុមការងារបន្តចុះទៅពិនិត្យមើល នៅចំណុចឃុំទួលស្តី និងឃុំចន្ទ្រា បន្តទៀត ដើម្បីពិនិត្យតាមខ្សែបន្ទាត់ព្រំដែន ដើម្បីឲ្យបានដឹងច្បាស់ជាក់ស្តែង។
អភិបាលខេត្តស្វាយរៀង បានបញ្ជាក់ថា “ពីរចំណុច ដែលគាត់លើកឡើង គឺពុំមានទេ អត់មានជួលសោះ ហើយអ្វីដែលគាត់និយាយអីចឹង គឺអត់ស្រួលទេ និយាយមិនច្បាស់ការណ៍ មិនពិតប្រាកដ ក្នុងនាមអាជ្ញាធរដែនដី គណៈអភិបាលទាំងអស់ បានធ្វើការប្រជុំ ដោយមិនសប្បាយចិត្ត ចំពោះការនិយាយបំផ្លើសអីចឹង”។
ទាក់ទងករណីនេះ ក្រុមតំណាងរាស្ត្រ គណបក្សសង្គ្រោះជាតិ ចំនួន៥រូប កាលពីថ្ងៃទី២៣ ខែសីហា ឆ្នាំ២០១៦ បានធ្វើលិខិតជូន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តាមរយៈសម្តេចអគ្គមហាពញាចក្រី ហេង សំរិន ប្រធានរដ្ឋសភា ស្នើសុំចាត់វិធានការបញ្ឈប់ ការជួលដីខ្មែរ នៅតាមបណ្តោយព្រំដែន កម្ពុជា.វៀតណាម នៅក្នុងខេត្តស្វាយរៀង ឲ្យទៅជនជាតិវៀតណាម។ ដោយនៅក្នុងលិខិត បានជម្រាបជូន សម្តេចក្រឡាហោម ស ខេងថា ទោះបីជាមានសារាចរណែនាំ និងការប្រកាសរបស់ សម្តេចនាយករដ្ឋមន្ត្រី ហាមមិនឲ្យជួលដីខ្មែរ នៅតាមព្រំដែនឲ្យទៅ ជនជាតិវៀតណាម ធ្វើស្រែក៏ដោយ តែសកម្មភាពជួលដីស្រែ ទៅឲ្យជនជាតិវៀតណាម នៅតាមព្រំដែន កម្ពុជា.វៀតណាម នាខេត្តស្វាយរៀង នៅតែបន្តមាន តាមរូបភាពឲ្យ ជនជាតិខ្មែរ ធ្វើតំណាង។ ជាក់ស្តែងនៅឃុំទួលស្តី និងឃុំចន្ទ្រា ស្រុកចន្ទ្រា មានការជួលដីឲ្យប្រជាជនវៀតណាម ធ្វើស្រែចំនួន ១៩៦ ហិកតា (ឃុំស្តី) និងចំនួន ២០០ ហិកតា (ឃុំចន្ទ្រា) ហើយនឹងនៅសង្កាត់ប្រាសាទ ក្រុងបាវិត ចំនួន ៤០ ហិកតា។
គួរបញ្ជាក់ថា រាជរដ្ឋាភិបាលកម្ពុជា បានចេញសារាចរ ស្តីពីការហាមប្រជាពលរដ្ឋខ្មែរ មិនឲ្យលក់ ឬជួលដីស្រែ ឬជួលដីលំនៅឋាន នៅតាមតំបន់ព្រំដែន ឲ្យទៅប្រជាពលរដ្ឋ នៃប្រទេសជិតខាង ដូចជា ប្រទេសវៀតណាម ឡាវ និងថៃ។ ការចេញសារាចរនេះ គឺដោយសារតែការជួលដី ទៅឲ្យប្រជាពលរដ្ឋ ប្រទេសជិតខាង ពុំមានឯកសារត្រឹមត្រូវ តាមផ្លូវច្បាប់ឡើយ ដែលជាហេតុធ្វើឲ្យម្ចាស់ដី ជាជនជាតិខ្មែរ បាត់បង់នូវផលប្រយោជន៍ នៅពេលមានវិវាទ កើតមានឡើង៕
No comments:
Post a Comment