រំដួល ចិត្រា
គណបក្សសង្គ្រោះជាតិ អះអាងថា ស្ថានភាពអ្នកទោសនៅក្នុងពន្ធនាគារព្រៃស មានភាពល្អប្រសើរឡើងវិញហើយ ក្រោយពីមានការផ្សព្វផ្សាយរិះគន់ពីស្ថានភាពរឹតត្បិតសិទ្ធិមនុស្សជាបន្តបន្ទាប់កន្លងមកនេះ។ នៅព្រឹកថ្ងៃទី១៨ សីហា នេះ តំណាងរាស្ត្រគណបក្សសង្គ្រោះជាតិ បានចុះជួបសុខទុក្ខមន្ត្រីខ្លួន៣រូបរួមមានលោក អ៊ុំ សំអាន តំណាងរាស្ត្រគណបក្ស លោក ហុង សុខហួរ សមាជិកព្រឹទ្ធិសភាបក្ស សម រង្ស៊ី និងលោក ស៊ាង ចែត មេឃុំគណបក្ស សម រង្ស៊ី។
ក្រោយពីបានជួបសំណេះសំណាលជាមន្ត្រីបក្សខ្លួននោះ លោក ឡុង រី តំណាងរាស្ត្រគណបក្សសង្គ្រោះជាតិ បានបញ្ជាក់ថា ស្ថានភាពមន្ត្រីខ្លួន រួមទាំងអ្នកទោសដទៃទៀត នៅក្នុងពន្ធនាគារព្រៃស មានភាពប្រសើឡើងជាងមុន ពោលគឺមានការរឹតត្បិតសិទ្ធិអ្នកទោសទៀតឡើយ។ លោក ឡុង រី ដែលបានដឹកនាំតំណាងរាស្ត្រចុះសួរសុខទុក្ខមន្ត្រីខ្លួន ដែលកំពុងជាប់ឃុំនេះ បានបន្ថែមថា ស្ថានភាពពន្ធនាគារពេលនេះ មានការរៀបចំបានល្អជាប្រក្រតីវិញ ដោយសារតែអ្នកកំពុងជាប់ឃុំខ្លួន និងអ្នកទោស ទទួលបានការយកចិត្តទុកដាក់ពីមន្ត្រីពន្ធនាគារ ទាំងផ្នែកសេវាកម្មពិនិត្យសុខភាព និងការបែងចែកទីកន្លែងរស់នៅរវាងអ្នកជាប់ឃុំ និងអ្នកទោសជាដើម។
ថ្លែងចំពោះមុខអ្នកកាសែតតំណាងរាស្ត្ររូបនេះ បានបញ្ជាក់ដូច្នេះថា៖«ក្រោយពីគណៈកម្មការយើងចេញចូលជាញឹកញាប់ ឃើញថាពន្ធនាគារកែប្រែបានច្រើនចំណុច ទីមួយ អ្នកទោសបទល្មើសគ្រឿងញៀនដាក់មួយកន្លែង អ្នកទោសបទល្មើសឧក្រិដ្ឋដាក់មួយកន្លែង អ្នកទោសស្រាលដាក់មួយកន្លែង និងអ្នកទោសនយោបាយមានការគាំពារថែរក្សា យកចិត្តទុកដាក់មែនទែន ក្រោយពីយើងបានជជែកគ្នារឿងអ្វីៗបានវិលទៅរកភាពប្រក្រតី។ …ហើយបើមានជំងឺអ្វីធ្ងន់ធ្ងរ ដែលអាចពិនិត្យនឹងព្យាបាលនៅក្រៅឃុំពន្ធនាគារ មន្ត្រី(ពន្ធនាគារ)ក៏អាចអនុញ្ញាតបើក្នុងករណីចាំបាច់»។
បើតាមលោក ឡុង រី ការរៀបចំស្ថានភាពពន្ធនាគារឲ្យមានភាពប្រក្រតីឡើងវិញ គឺដោយសារតែមានការស្នើសុំពីគណបក្សសង្គ្រោះជាតិ ទៅកាន់ក្រសួងមហាផ្ទៃ ដើម្បីជួយសម្របសម្រួលដោះស្រាយបញ្ហាស្ថានភាពអ្នកទោស និងអ្នកជាប់ឃុំក្នុងពន្ធនាគារព្រៃសនេះ ខណៈដែលអង្គការសង្គមស៊ីវិល បានជួយជំរុញខ្លាំងពីបញ្ហាគោរពសិទ្ធិមនុស្ស និងបញ្ហាសុខភាពអ្នកទោសផងដែរ។
កន្លងមកអ្នកនាំពាក្យអគ្គនាយកដ្ឋានពន្ធនាគារលោក នុត សាវនា ធ្លាប់ប្រាប់សារព័ត៌មានថ្មីៗថា មូលហេតុដែលអាជ្ញាធរដាក់អ្នកជាប់ចោទឲ្យនៅក្នុងបន្ទប់ជាមួយអ្នកទោស គឺដោយសារតែពន្ធនាគារគ្មានអាគារគ្រប់គ្រាន់។ ហើយការកំណត់ម៉ោងចេញសម្រាករបស់អ្នកជាប់ចោទនោះ គឺជាបច្ចេកទេសនៃការគ្រប់គ្រងអ្នកជាប់ឃុំ ដើម្បីការពារសន្តិសុខ ពោលគឺមិនមានការរឹតត្បិតសិទ្ធិសេរីភាពអ្នកជាប់ឃុំ និងអ្នកទោសនៅឡើយ។
តំណាងរាស្ត្រគណបក្សសង្គ្រោះជាតិ បានចុះជួបសុខទុក្ខមន្ត្រីខ្លួន៣រូបរួមមានលោក អ៊ុំ សំអាន តំណាងរាស្ត្រគណបក្ស លោក ហុង សុខហួរ សមាជិកព្រឹទ្ធិសភាបក្ស សម រង្ស៊ី និងលោក ស៊ាង ចែត មេឃុំគណបក្ស សម រង្ស៊ី។ក្រៅពីមន្រ្តីទាំង៣នេះ ក៏មានមន្ត្រីនឹងសកម្មជនគណបក្សសង្គ្រោះជាតិ១៥រូបទៀត ដែលកំពុងតែជាប់ឃុំឃាំងពន្ធនាគារដែរ។
គណបក្សសង្គ្រោះជាតិ ចាត់ទុកបញ្ហាឃុំខ្លួនមន្ត្រីនិងសកម្មជនគណបក្សខ្លួននេះ ថាជារឿងនយោបាយ ហើយគណបក្សនឹងបន្តនិតីផ្លូវច្បាប់ ដើម្បីអន្តរាគមន៍ដោះស្រាយបញ្ហាមន្ត្រីបក្ស។ នេះបើតាមលោក ឡុង រី តំណាងរាស្ត្រគណបក្សសង្គ្រោះជាតិ៕
No comments:
Post a Comment