និពន្ធដោយ: ចំណារ
ភ្នំពេញ៖ រហូតមកដល់ពេលនេះ កម្មករនៅក្នុងវិស័យកាត់ដេរនៃព្រះរាជាណាចក្រកម្ពុជា ទទួលបានប្រាក់ខែគោលចំនួន១៤០ដុល្លារអាមេរិក។ ប៉ុន្តែ សម្រាប់ឆ្នាំ២០១៧ខាងមុខនេះ សហជីពនៅក្នុងប្រទេសកម្ពុជាទាមទាមឲ្យដំឡើងរហូតដល់ជិត១៨០ដុល្លារ។ ការទាមទារនេះ ទទួលបានការគាំទ្រពីឯកឧត្តម សម រង្ស៊ី ប្រធានគណបក្សប្រឆាំងសង្គ្រោះជាតិ និងជាអតីតរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនៅទសវត្សរ៍៩០ ។
«ខ្ញុំសូមគាំទ្រ ការទាមទារ របស់សហជីព តំណាងឲ្យកម្មករនៅប្រទេសកម្ពុជា ដែលទាមទារ ឲ្យថៅកែរោងចក្រ ដំឡើងប្រាក់ឈ្នួលអប្បបរមា ពី១៤០ដុល្លារ ដល់១៨០ដុល្លារយ៉ាងតិច សម្រាប់ឆ្នាំ២០១៧ខាងមុខ»។ នេះ គឺជាអត្ថាធិប្បាយរបស់ឯកឧត្តម សម រង្សី នៅលើទំព័រហ្វេសប៊ុកផ្លូវការរបស់ឯកឧត្តមនៅថ្ងៃទី១១ខែកញ្ញាឆ្នាំ២០១៦នេះ។
ឯកឧត្តម សម រង្ស៊ី បានបន្តទៀតថា ការទាមទារនេះ ត្រឹមត្រូវណាស់ ពីព្រោះ ប្រាក់ខែគោល ១៤០ ដុល្លារដូចសព្វថ្ងៃនេះ កម្មករមិនអាចរស់បានទេ។ ទី២ កម្រិតប្រាក់់ខែនៅកម្ពុជានេះ មិនអាចប្រៀបធៀបទៅនឹងប្រាក់ខែកម្មករនៅប្រទេសជិតខាងបានទេ ពីព្រោះទំនិញនៅប្រទេសកម្ពុជា ថ្លៃជាងនៅប្រទេសជិតខាង ឆ្ងាយណាស់។ ទី៣ នៅប្រទេសកម្ពុជា សេវាសាធារណៈដូចជាប្រព័ន្ធអប់រំ និងប្រព័ន្ធសុខាភិបាល តម្រូវឲ្យប្រជាពលរដ្ឋចំណាយលុយ ច្រើនជាងនៅប្រទេសជិតខាង និងទី៤ នៅប្រទេសកម្ពុជា មិនមានសេវាសង្គមកិច្ច ជួយទ្រទ្រង់ជីវភាពរស់នៅ របស់ប្រជាពលរដ្ឋក្រីក្រ ដូចនៅប្រទេសជិតខាងទេ។
សូមបញ្ជាក់ថា ការប្រកាសគាំទ្រប្រាក់ខែគោល១៨០ដុល្លាររបស់កម្មករពីសំណាក់ ឯកឧត្តម សម រង្ស៊ី នៅថ្ងៃនេះ បានធ្វើឡើងបន្ទាប់ពីភាគីសហជីព បានដាក់សំណើរទាមទារប្រាក់ខែគោលចំនួន ១៧៩,៦ ដុល្លារអាមេរិកសម្រាប់កម្មករនិយោជិតក្នុងឧស្សាហកម្មកាត់ដេរសម្លៀកបំពាក់ និងស្បែកជើង សម្រាប់ឆ្នាំ២០១៧ ខាងមុខនេះ៕
No comments:
Post a Comment