ដោយ: គូគូ
ពោធិ៍សាត់: នារី២នាក់ជាពលការិនីខ្មែរ បានរួចផុតពីក្រញ៉ាំតណ្ហាថៅកែថៃគំនិតថោកមួយរូបដែលចោទប្រកាន់ថានាងលួចទូរស័ព្ទដៃ តាមពិតថៅកែថៃនោះមានបំណង ចង់រំលោភនារីទាំងពីរនាក់នោះសោះ ។
ហេតុការណ៍បកស្បែកមុខអាក្រក់របស់ថៅកែថៃនោះបានកើតឡើងដោយសារថៅកែថៃអប្រីយ៍បានប្តឹងចោទប្រកាន់ ឲ្យទាហានឈុតខ្មៅថៃ ធ្វើការឃាត់ខ្លួននារីទាំងពីរនាក់ពីបទលួចទូរស័ព្ទ ខណៈនារីរងគ្រោះ២នាក់ បានចាកចេញពីទីតាំងកន្លែងធ្វើការនៅទឹកដីខេត្តត្រាតប្រទេសថៃ មកទឹកដីខ្មែរវិញ តាមច្រកថ្មដា ឃុំថ្មដា ស្រុកវាលវែង ខេត្តពោធិ៍សាត់វេលាម៉ោង ១២:៣០នាទី ថ្ងៃទី០៣ ខែកញ្ញា ឆ្នាំ២០១៦។
លោក ជា ជួន មេបញ្ជាការរងវរៈការពារព្រំដែនលេខ ៨២៥ ប្រចាំទិសថ្មដា បានប្រាប់ឲ្យដឹងថា នារីខ្មែររងគ្រោះទាំង២នាក់ មានឈ្មោះ ហុង ឆៃគីម អាយុ ២១ឆ្នាំ និងឈ្មោះ ហុង នូនូ អាយុ ១៧ឆ្នាំ ។
លោកមេបញ្ជាការរងបានបន្តថា ពេលទទួលបានព័ត៌មានភ្លាម មេបញ្ជាការវរៈ៨២៥ និងមេប៉ុស្តិ៍រដ្ឋបាលផ្លូវលេខ៥៦ បានទំនាក់ទំនងទៅទាហានឈុតខ្មៅថៃ ដើម្បីសួរនាំបញ្ហារឿងនេះ។ សមត្ថកិច្ចថៃបានហៅថៅកែថៃមកទីស្នាក់ការសួរនាំទល់មុខគ្នា ជាមួយនារីរងគ្រោះទាំង២នាក់នោះរួចមក ទើបដឹងថាដើមហេតុដំបូង
ថៅកែថៃនោះបានទិញទូរស័ព្ទតម្លៃ ១៥០០០បាតដោយបង់រំលស់ប្រាក់ខែ ៥០០បាតក្នុងមួយខែ ពីពលករខ្មែរទាំងពីរនាក់នោះ។ប៉ុន្តែដោយសារភ័យខ្លាចនូវអំពើថោកទាបរបស់ ថៅកែថៃនោះ មានបំណងមិនល្អមកលើពួកនាង ពោលគឺធ្លាប់ចាប់ថើប និងប៉ងរំលោភ ទើបនាងរត់ចេញមកដោយជាប់ជាមួយទូរស័ព្ទតែម្តង។
ទោះបីយ៉ាងនេះក្តីសមត្ថកិច្ចកម្ពុជា បានសម្របសម្រួលជាមួយអាជ្ញាធរមានសមត្ថកិច្ចថៃ ទូទាត់ប្រាក់ខែ ដែលពួកនាងមិនទាន់បានបើកជាមួយនឹងថ្លៃជំពាក់នានារួចរាល់ និងបានប្រគល់ទូរស័ព្ទដៃឲ្យថៅកែថៃវិញ ហើយនាំនារីរងគ្រោះទាំង២នាក់ ត្រឡប់មកទឹកដីខ្មែរវិញ តាមច្រកថ្មដារដោយសុវត្ថិភាព៕
No comments:
Post a Comment