(ឡាវ)៖ នាយករដ្ឋមន្ត្រីជប៉ុន លោក Shinzo Abe បានសន្យាផ្តល់ប្រាក់ចំនួន៤៤០លានដុល្លារសហរដ្ឋអាមេរិក ដើម្បីជួយទៅដល់បណ្តាប្រទេសក្នុងតំបន់អាស៊ី ដើម្បីពង្រឹងវិធានការប្រយុទ្ធប្រឆាំង នឹងអំពើភេរវកម្ម ខណៈក្នុងតំបន់គេសង្កេតឃើញថា មានការវាយប្រហារទ្រង់ទ្រាយធំ។ នេះបើតាមសម្តីអ្នកនាំពាក្យរដ្ឋាភិបាលជប៉ុន ចុះផ្សាយដោយសារព័ត៌មានស៊ិនហួ នាយប់ថ្ងៃទី៧ ខែកញ្ញា ឆ្នាំ២០១៦នេះ។
សូមជំរាបថា ការបំផ្ទុះគ្រាប់បែកកាលពីសប្តាហ៍មុន នៅស្រុកកំណើតរបស់លោកប្រធានាធិបតីហ្វីលីន Rodrigo Duterte ដែលបានសម្លាប់មនុស្សចំនួន១៤នាក់ ជាស្នាដៃរបស់ក្រុមឧទ្ទាម ជាប់ពាក់ព័ន្ធនឹងក្រុម IS ខណៈមានមនុស្ស២២នាក់ទៀត ត្រូវបានសម្លាប់នៅក្នុងការវាយប្រហារ កាលពីខែកក្កដា នាហាងកាហ្វេមួយ ក្នុងរដ្ឋធានីរបស់ប្រទេសបង់ក្លាដេស។
«ជាការគាំទ្រដំបូងរបស់យើង ចំពោះវិធានការ នៃការប្រឆាំងអំពើរភេរវកម្ម និងក្រុមផ្តាច់ខ្លួន ក្នុងតំបន់អាស៊ី យើងនឹងបង្កើតកម្មវិធីជំនួយមួយ ដែលមានទឹកប្រាក់ ៤៥ពាន់លានយេន (៤៤០លានដុល្លារសហរដ្ឋអាមេរិក) សម្រាប់រយៈពេល៣ឆ្នាំខាងមុខ»។ នេះបើតាមសម្តីអនុប្រធានលេខាធិកាដ្ឋាន គណៈរដ្ឋមន្ត្រីជប៉ុន លោក Koichi Hagiuda ស្រង់សម្តីលោក Abe ប្រាប់នៅក្នុងកិច្ចប្រជុំមេដឹកនាំមួយ នៃសមាគមន៍អាស៊ាន។
វាមិនច្បាស់នោះទេថាតើ បណ្តាប្រទេសក្នុងតំបន់អាស៊ានណាមួយ ដែលនឹងទទួលជំនួយនេះ៕
No comments:
Post a Comment