 |
| លោកស្រី យីងឡាក់ អតីតនាយករដ្ឋមន្ត្រីថៃ (រូបថតពី៖ Channel News Asia) |
សភានីតិកម្មប្រទេសថៃប្រកាសដូចនេះដោយឆ្លងតាមការបោះឆ្នោត ហើយក្នុងនោះសមាជិក២២០រូប គឺ ១៩០សំឡេងប្រឆាំងលោកស្រី ។ សេចក្ដីសម្រេចនេះ បានហាមឃាត់លោកស្រីមិនឲ្យធ្វើនយោបាយរយៈពេល៥ឆ្នាំ ដែលករណីនេះជាកំហុសរដ្ឋបាល ។
គណៈកម្មការប្រឆាំងអំពើពុករលួយថៃបានចោទលោកស្រីយីងឡាក់ ធ្វើឲ្យខាតបង់ប្រាក់៤ពាន់លានដុល្លារក្នុងគម្រោងទិញស្រូវ កាលពីលោកស្រីនៅជានាយករដ្ឋមន្ត្រី ។
សេចក្ដីសម្រេចរបស់សភា ដែលសមាជិកភាគច្រើនជាឧត្តមសេនីយ៍យោធា និងមន្ត្រីមកពីក្រុមប្រឹក្សាយោធា គឺតែប៉ុន្មានម៉ោងប៉ុណ្ណោះ បន្ទាប់ពីការិយាល័យអគ្គព្រះរាជអាជ្ញាព្រមានថា បើរកឃើញភស្តុតាង នោះលោកស្រីអតីតនាយករដ្ឋមន្ត្រីនឹងមានទោស១០ឆ្នាំក្នុងពន្ធនាគារ ។
នៅចំពោះមុខសភានីតិកម្មកាលពីថ្ងៃម្សិលមិញ លោកស្រីបានបដិសេធថា មិនមានរឿងពុករលួយកើតឡើងទេ ។
ការវិភាគ
អ្នកវិភាគមិនមានការភ្ញាក់ផ្អើលច្រើនទេ ចំពោះសេចក្ដីសម្រេចរបស់សភានីតិកម្មប្រទេសថៃ ។ ក្រុមអ្នកវិភាគនយោបាយប្រទេសថៃចាត់ទុកសេចក្ដីសម្រេចនេះថា ជាព្រឹត្តិការណ៍ប្រវត្តិសាស្ត្រ ដែលធ្វើ អ្នកនយោបាយល្បីឈ្មោះត្រកូលស៊ីណាវ៉ាត់ត្រាម្នាក់ទៀតនេះ លាចាកពីជីវិតនយោបាយ ដែលកំពុង មានប្រជាប្រិយភាពរបស់ប្រជាជនថៃ ។
សេចក្ដីសម្រេចដ៏ជោគជ័យ ប្រឆាំងអតីតនាយករដ្ឋមន្ត្រីស្ត្រីដំបូងនៃរាជាណាចក្រថៃរូបនេះ ដែលមកពី ត្រកូលអតីតនាយករដ្ឋមន្ត្រីថាក់ស៊ីន ស៊ីណាវ៉ាត់ត្រា ត្រូវបានផ្ដួលរំលំដោយរដ្ឋប្រហារនៅឆ្នាំ២០០៦ គឺជាសេចក្ដីសម្រេចដ៏កម្រ ប៉ុន្តែប្រកបដោយគ្រោះថ្នាក់ចំពោះលោកស្រីយីងឡាក់ ដែលនាំឲ្យលោកស្រីនឹងត្រូវនាំខ្លួនឡើងតុលាការកំពូលក្នុងសំនុំរឿងព្រហ្មទណ្ឌ ករណីពុករលួយនូវទឹកប្រាក់៤ពាន់លានដុល្លារ ក្នុងគម្រោងទិញស្រូវ ធ្វើឲ្យកសិករថៃខាតបង់ម្នាក់ៗរាប់លានបាត ។
បណ្ឌិតវិទ្យាសាស្ត្រនយោបាយនៅបណ្ឌិតសភា សកលវិទ្យាល័យក្យូតូ Pavin Chachavalpongpunនិយាយថា «សេចក្ដីសម្រេចនេះបញ្ជាក់ពីចេតនាមួយ សំដៅបញ្ចប់ឆន្ទៈរបស់ត្រកូលស៊ីណាវ៉ាត់ត្រា មិនឲ្យ ប្រលូកនយោបាយដែលប្រកបដោយគ្រោះថ្នាក់ ហើយបើតាមការវិនិច្ឆ័យនេះ គឺលោកស្រីយីងឡាក់ ប្អូនស្រីលោកថាក់ស៊ីន ពីការចង់ប្រលូករឿងនយោបាយ ដែលជាការពិតគឺលោកស្រីមិនមានឱកាស ធ្វើនយោបាយបានឡើយ» ។
ទាំងលោកស្រី យីងឡាក់ និងលោកថាក់ស៊ីន គឺក្រុមគ្រួសារដែលមានប្រាក់មហាសាល ។ ក្រុមគ្រួសារនេះមានមុខជំនួយធំៗទាំងក្នុង និងក្រៅប្រទេស ។ គ្រួសារនេះមានប្រជាប្រិយភាពបំផុតជាមួយសហគមន៍ក្រីក្រ ជាពិសេសនៅតំបន់ភាគខាងជើងប្រទេសមានខេត្ត ឈាងរ៉ៃ និងខេត្តឈាងម៉ៃជាដើម ។
លោកស្រី យីងឡាក់ ឆ្នាំនេះមានអាយុ៤៧ឆ្នាំ លោកស្រីជានាយករដ្ឋមន្ត្រីជាប់ឆ្នោតឆ្នាំ២០១១ ប៉ុន្តែត្រូវបានដកហូតអំណាចដោយតុលាការធម្មនុញ្ញនៅដើមឆ្នាំ២០១៤ ពីបទរំលោភអំណាចរដ្ឋ គឺមុនគណៈរដ្ឋមន្ត្រីរបស់លោកស្រីត្រូវបានរំលាយ ដោយរដ្ឋប្រហារថ្ងៃ២២ឧសភា គឺពេលនោះហើយជីវិតនយោបាយរបស់លោកស្រីរងការរឹតត្បិត ហើយងាយគ្រោះថ្នាក់ទៀត គឺការប្រឆាំងលោកស្រីពីបទបង្កឲ្យមានរឿងអាស្រូវពុករលួយក្នុងគម្រោងទិញស្រូវ ។
ការដកសិទ្ធិធ្វើនយោបាយរបស់លោកស្រីយីងឡាក់ ជំរុញឲ្យបណ្ដាញផ្សាយព័ត៌មានអន្តរជាតិធំៗដាក់លើទំព័រមុខ
បណ្ដាញផ្សាយព៌ត៌មាន CNN អាមេរិក បណ្ដាញផ្សាយព៌ត៌មាន BBC អង់គ្លេស ABC អូស្ត្រាលី Channel News Asia កាសែត The New York Times កាសែត Wall Street Journal និងThe Straits Times ធ្វើអត្ថាធិបាយដោយអត្ថន័យប្រហាក់ប្រហែលគ្នាថា ជាការវាយបំបាក់ស្រី្តលេចធ្លោ ម្នាក់នៅអាស៊ី ដែលបានកាន់អំណាចតាមរយៈការបោះឆ្នោត ហើយថាអ្នកនយោបាយត្រកូលស៊ីណាវ៉ាត់ត្រា ដែលក្រុមបក្សនយោបាយប្រឆាំងលោកស្រីនៅក្នុងប្រទេសថៃ ចោទថាមិននិយមរាជវង្សថៃ ត្រូវបានកាត់ជាកង់ៗពីជីវិតនយោបាយ ។
ប្រទេសថៃនឹងរៀបចំការបោះឆ្នោតសភានៅដើមឆ្នាំ២០១៦ ដែលលោកស្រីពិតជាមិនមានសិទ្ធិឈរឈ្មោះជាបេក្ខជនតំណាងរាស្ត្រឡើយ ។
អ្នកវិភាគព្រមានថា ចលនាបង្រួបបង្រួមជាតិកំពុងស្ថិតក្នុងស្ថានភាពគ្រោះថ្នាក់ ខណៈក្រុមអាវក្រហម ដែលនិយមត្រកូលស៊ីណាវ៉ាត់ត្រា ហើយភាគច្រើនមកពីភាគខាងជើង ទោះជាមានរូបភាពតិចតូចក្ដី គឺពួកគេនឹងដើរវ៉ាតាមដងផ្លូវ ប៉ុន្តែរដ្ឋាភិបាលបច្ចុប្បន្ន ដែលដឹកនាំដោយលោក ប្រយុទ្ធ ចន្ទអូចា មេដឹកនាំរដ្ឋប្រហារថ្ងៃ២២ឧសភា នឹងអនុវត្តច្បាប់គ្រាមានអាសន្នបន្តទៀត ៕
VOD
ដោយ៖ នួន បូរិន | ថ្ងៃសុក្រ ទី23 មករា 2015, 05:27 PM
No comments:
Post a Comment