 |
| លោក Alex Gonzalez Davidson សកម្មជនការពារធនធានធម្មជាតិនៅតំបន់អារ៉ែង (រូបថតពី៖ Facebook) |
អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់ VOD នៅរសៀលនេះថា លោកអាឡិចបានមករស់នៅកម្ពុជាជាយូរឆ្នាំមកហើយ ពោលគឺជាង១០ឆ្នាំមកហើយ និងមិនដែលបានចាកចេញពីកម្ពុជាម្តងឡើយ ដោយលោកអាឡិចបានបន្តទិដ្ឋាការជាបន្តបន្ទាប់រហូត ។ លោកថា លោកអាឡិចត្រូវចាកចេញពីកម្ពុជាមួយរយៈសិន ហើយពេលណាលោកអាឡិច ចង់វិលត្រឡប់មកកម្ពុជាវិញ គាត់អាចដាក់ពាក្យសុំទិដ្ឋាការនៅតាមស្ថានទូតខ្មែរនៅបរទេសបាន ។
លោក ខៀវ សុភ័គ បញ្ជាក់ថា «អស់ម្តងសុំបន្តៗជាច្រើនដងហើយ ដូច្នេះដើម្បីឲ្យមានការអនុវត្តច្បាប់ទាំងអស់គ្នា ព្រោះធម្មតាជនបរទេសគេមិនឲ្យសុំលើសពីពីរដងទេ...អញ្ចឹងសុំឲ្យគាត់ទៅម្តងសិនទៅ គាត់ចេញមួយរយៈសិនទៅ ពេលគាត់ចង់មកវិញ គាត់អាចដាក់ពាក្យសុំទិដ្ឋាការមកកម្ពុជាវិញបាន មិនដូចលើកមុនថាគាត់ទៅហើយមិនអាចមកវិញបាន មិនអញ្ចឹងទេ អាហ្នឹងមានការប្រែប្រួលត្រង់ហ្នឹងបន្តិច» ។
ទោះយ៉ាងណា លោក ខៀវ សុភ័គ មិនបានបញ្ជាក់ពីមូលហេតុនៃការប្រែប្រួលនេះទេ ។
កាលពីថ្ងៃទី១៦ ខែកុម្ភៈ ម្សិលមិញ លោក សម រង្ស៊ី បានផ្ញើលិខិតជូនរដ្ឋមន្ត្រីក្រសួងមហាផ្ទៃ លោក ស ខេង ដោយស្នើឲ្យលោក ស ខេង អន្តរាគមន៍ទៅនាយកដ្ឋានអន្តោប្រវេសន៍នៃក្រសួងមហាផ្ទៃ បន្តទិដ្ឋាការឲ្យលោក អាឡិច ដើម្បីអាចមានសិទ្ធិបន្តស្នាក់នៅក្នុងប្រទេសកម្ពុជា ។ លោក សម រង្ស៊ី បានលើកឡើងថា រូបលោកក៏ដូចជាប្រជាពលរដ្ឋខ្មែរជាច្រើនយល់ឃើញថា លោក អាឡិច មិនមែនជាឧក្រិដ្ឋជន ហើយក៏មិនបានប្រព្រឹត្តបទល្មើសអ្វីធ្ងន់ធ្ងរ ដែលតម្រូវឲ្យបណ្តេញគាត់ចេញពីប្រទេសកម្ពុជា ។
ចំណែកឯអង្គការសមាគមជាង៣០ នៅថ្ងៃអង្គារនេះបានចេញសេចក្តីថ្លែងការរួមមួយដោយសម្តែងការសោកស្តាយ ចំពោះសេចក្តីសម្រេចចិត្តមិនបន្តទិដ្ឋាការជូនលោក អាឡិច ។ អង្គការសមាគម ទាំងនោះចាត់ទុកលោក អាឡិច ថាជាបុគ្គលមួយរូបដែលឈានមុខគេក្នុងការធ្វើយុទ្ធនាការការពារតំបន់អារ៉ែងមិឲ្យមានការកសាងទនប់វារីអគ្គិសនី ដែលគេជឿថា ការកសាងទំនប់វារីអគ្គិសនីនេះ នឹងអាចប៉ះពាល់ដល់ដីលំនៅដ្ឋានរបស់ជនជាតិជងនៅទីនោះ ។
មន្ត្រីឃ្លាំមើលការរំលោភសិទ្ធិមនុស្សនៃអង្គការលីកាដូ លោក អំ សំអាត សម្តែងការស្វាគមន៍ចំពោះរដ្ឋាភិបាលបានលុបឈ្មោះលោក អាឡិច ចេញពីបញ្ជីខ្មៅ តែលោកនៅតែបង្ហាញការសោកស្តាយដែលរដ្ឋាភិបាលតម្រូវឲ្យលោកអាឡិច ចេញពីកម្ពុជាជាមុនសិន ទើបអាចសុំទិដ្ឋាការមកជាថ្មី ។ លោកថា នៅកម្ពុជាពុំមានច្បាប់ណាមួយកំណត់ថាជនបរទេសដែលរស់នៅកម្ពុជា និងបានសុំទិដ្ឋាការម្តងជាពីរដងហើយ ត្រូវចាកចេញពីកម្ពុជាជាមុនសិនទើបអាចសុំម្តងទៀតនោះទេ ដោយលោកចាត់ទុកវិធានការនេះថាជាការដែលធ្វើឲ្យល្អមើលជាជាងការប្រើពាក្យបណ្តេញចេញ ។
លោក អំ សំអាត បន្តថា «គ្រាន់តែធ្វើឲ្យល្អមើល កុំឲ្យអាក្រក់មើលពេក កាលណាបណ្តេញចេញវាអាក្រក់មើល តែកាលណាបើសិនជាឲ្យអាឡិចចាកចេញទៅ ហើយសុំវីសា (ទិដ្ឋាការ)ចូលជាថ្មី គេមិនផ្តល់វីសាឲ្យចូល ចូលអត់បានដូចគ្នា ។ អញ្ចឹងវាគ្រាន់តែជាការធ្វើកុំឲ្យអាក្រក់មើលប៉ុណ្ណោះ តែយើងជាសង្គមស៊ីវិល នៅតែទទូច ថាសុំឲ្យរដ្ឋាភិបាលពិនិត្យពិចារណា បើសិនជាដកឈ្មោះអាឡិចចេញពីបញ្ជីខ្មៅហើយ គួរតែបន្តទិដ្ឋាការឲ្យអាឡិចស្នាក់នៅកម្ពុជានេះបន្តទៀត» ។
នៅរសៀលថ្ងៃអង្គារនេះ VOD មិនអាចទាក់ទងលោក អាឡិច ដើម្បីសុំការឆ្លើយតបទៅនឹងការផ្លាស់ប្តូរជំហររបស់ក្រសួងមហាផ្ទៃនេះបានទេ ។ ទោះយ៉ាងណា សហការី និងជាស្ថាបនិកមួយរូបរបស់អង្គការមាតាធម្មជាតិ លោក សាន់ ម៉ាឡា ដែលបានលើកទូសព្ទរបស់លោក អាឡិច បានប្រាប់ VOD ថាការផ្លាស់ប្តូជំហររបស់ក្រសួងនេះ គឺគ្រាន់តែជាល្បិចកលមួយដើម្បីឲ្យលោក អាឡិច ចាកចេញពីកម្ពុជាតាមសម្រួល រួចហើយនឹងបិទមិនផ្តល់ទិដ្ឋាការដល់លោក អាឡិច បន្ទាប់ពីការចាកចេញ ។
លោក សាន់ ម៉ាឡា បន្តថា «អញ្ចឹងយើងគិតថាបើយើងចេញ ក៏យើងអត់អាចសុំទិដ្ឋាការហ្នឹងបន្តទៀតបានដែរគឺយើងសុខចិត្តនៅក្នុងស្រុកខ្មែរ ទោះបីជាមានការធ្វើអន្តរាគមន៍ ឬធ្វើសកម្មភាពណាមួយមកលើពួកយើងយ៉ាងណាក៏យើងទទួលយក» ។
លោក អាឡិច ជាជនជាតិអេស្ប៉ាញដែលបានមករស់នៅលើទឹកដីកម្ពុជានេះជាង១០ឆ្នាំមកហើយ និងចេះនិយាយភាសាខ្មែរបានយ៉ាងច្បាស់លាស់ ព្រមទាំងបានបង្កើតសមាគមការពារព្រៃឈើមួយឈ្មោះថា មាតាធម្មជាតិ ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង ។ ទិដ្ឋាការរបស់លោកនឹងត្រូវផុតកំណត់នៅថ្ងៃទី២០ ខែកុម្ភៈ ខាងមុខនេះ ៕
VOD
ដោយ៖ ទូច សុខា | ថ្ងៃអង្គារ ទី17 កុម្ភៈ 2015
No comments:
Post a Comment