ក្រសួងសាធារណៈការ និងដឹកជញ្ជួនចាត់វិធានការចំពោះការដាក់ជញ្ជីងថ្លឹងឡាននៅតាមដងផ្លូវ ដើម្បីពង្រឹងការអនុវត្ដច្បាប់ ក្នុងគោលដៅធានាឲ្យបានការគ្រប់គ្រងការដឹកជញ្ជួនលើសទម្ងន់កំណត់ និងលុបបំបាត់ការដាក់ប៉ុសិ៍ជញ្ជីងថ្លឹងបែបអាណាធិបតេយ្យតាមដងផ្លូវថ្នល់ ។
សេចក្ដីប្រកាសព័ត៌មានរបស់ក្រសួងសាធារណៈការ និងដឹកជញ្ជួនចេញផ្សាយថ្ងៃទី០៣ ខែកុម្ភៈ ឆ្នាំ២០១៥ ឲ្យដឹងថា រយៈពេលកន្លងមកមានជនខិលខូចបានដាក់ប៉ុស្ដិ៍ត្រួតពិនិត្យបែបអាណាធិបតេយ្យក្រោមរូបភាពការដឹកជញ្ជួនលើសទម្ងន់កម្រិតកំណត់តាមដងផ្លូវមួយចំនួននៅពេលយប់មានដាក់ភ្លើងសញ្ញាបំភ្លឺ ឬសញ្ញាសម្គាល់ឲ្យរថយន្ដដឹកជញ្ជួនឈប់ដើម្បីត្រួតពិនិត្យ និងបង្ខំឲ្យបង់ប្រាក់។ក្រសួងហៅសកម្មភាពនេះថា ធ្វើឲ្យប៉ះពាល់ធ្ងន់ធ្ងរដល់កិត្ដិយសដល់ក្រសួងសាធារណៈ និងដឹកជញ្ជួនក៏ដូចជារាជរដ្ឋាភិបាលទាំងមូលនិងប៉ះពាល់ដល់កិច្ចការងារអាជីវកម្មរបស់ប្រតិបត្ដិការដឹកជញ្ជួនផងដែរ ។
លិខិតដដែរបន្ដថា មានតែស្ថានីយថ្លឹងអចិន្ដ្រៃយ៍បច្ចុប្បន្នចំនួន៩ទីតាំងរួមមាន ស្ថានីយថ្លឹងកូនដំរី ស្ថានីយ៍ឃ្លាំងមឿង ស្ថានីយ៍លង្វែក(ផ្លូវជាតិលេខ៥) ស្ថានីយ៍ថ្លឹងពួក(ផ្លូវជាតិលេខ៦) ស្ថានីយ៍ព្រែកឯង ស្ថានីយ៍កំពង់ភ្នំ ស្ថានីយ៍បាវិត(ផ្លូវជាតិលេខ១) និងស្ថានីយ៍ថ្លឹងថ្នល់ទទឹង(ផ្លូវជាតិលេខ៧)ប៉ុណ្ណោះដែលតម្រូវឲ្យអាជីវករចូលថ្លឹង ។
ទោះជាយ៉ាងណាក្រសួងសាធារណៈការ និងដឹកជញ្ជួនស្នើសុំកិច្ចសហប្រតិបត្ដិការពីអាជ្ញាធរមានសមត្ថកិច្ច និងអាជ្ញាធរមូលដ្ឋានគ្រប់លំដាប់ថ្នាក់រួមមាន ភូមិ ឃុំ ស្រុក និងខេត្ដ ជួយរួមចំណែកក្នុងការលុបបំបាត់ប៉ុស្ដិ៍អនាធិបតេយ្យតាមរយៈការអនុវត្ដគោលការណ៍«ភូមិ ឃុំមានសុវត្ថិភាព» ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ ឲ្យ VODដឹងនៅព្រឹកថ្ងៃសុក្រនេះថា ចំណាត់ការរបស់ក្រសួងសាធារណៈការ និងដឹកជញ្ជួនទៅលើការដាក់ប៉ុស្ដិ៍ជញ្ជីងថ្លឹងឡានចល័តបែបអនាធិបតេយ្យនៅតាមដងផ្លូវពិតជាល្អ ដើម្បីទប់ស្កាត់ចំពោះមន្ដ្រីខិលខូចមួយចំនួនដែលកេងចំនេញដើម្បីផលប្រយោជន៍ផ្ទាល់ខ្លួន ។
លោកបន្ដថា ក្រសួងសាធារណៈការ និងដឹកជញ្ជួនត្រូវតែមានយន្ដការសហការជាមួយប្រជាពលរដ្ឋប្រព័ន្ធទូរស័ព្ទរាយការណ៍ទាន់ហេតុការណ៍ (Hot line) ទទួលពាក្យបណ្ដឹងពីប្រជាពលរដ្ឋ ឬក៏ឲ្យប្រជាពលរដ្ឋប្ដឹងទៅអង្គភាពប្រឆាំងអំពើពុករលួយដើម្បីទប់ស្កាត់រឿងមិនប្រក្រតីរបស់មន្ដ្រីសាធារណៈការ និងដឹកជញ្ជួនមួយចំនួនដែលកេងចំនេញជាផលប្រយោជន៍ផ្ទាល់ខ្លួន ។
លោកបន្ដថា "ដើម្បីឲ្យប្រសើរជាងនេះទៅទៀតក្រសួងសាថារណៈការ និងដឹកជញ្ជួនត្រូវតែពង្រឹង និងចាត់វិធានការរបស់ខ្លួនឲ្យមានប្រសិទ្ធភាពកុំបានតែនិយាយជាគោលការណ៍ តែការអនុវត្ដន៍ពិតអត់មាន អញ្ចឹងដើម្បីឲ្យមានប្រសិទ្ធពិតនិយាយហើយត្រូវតែអនុវត្ដន៍ដើម្បីជាជំនឿដល់ប្រជាពលរដ្ឋ និងអាជីវករដឹកជញ្ជួនផងដែរ " ។
អ្នកសម្របសម្រួលបណ្តាញរួបរួមដើម្បីគណនេយ្យភាពសង្គមអាស៊ីបូព៌ា និងប៉ាស៊ីហ្វិក ប្រចាំកម្ពុជាលោក សន ជ័យ មានប្រសាសន៍ថា គ្រាន់តែការចេញសេចក្ដីជួនដំណឹង ឬផែនការណាមួយរបស់ក្រសួងសាធារណៈការ និងដឹកជញ្ជួនមិនមែនថាការអនុវត្ដន៍ទទួលបានជោគជ័យទេ គឺត្រូវមាន ផែនការឲ្យបានជាក់លាក់ទៅលើការអនុវត្ដន៍ប្រចាំខែប្រចាំឆ្នាំ ហើយមានក្រុមការងារត្រូវចុះត្រួតពិនិត្យការដឹកជញ្ជួនដោយផ្ទាល់ ។ លោកបន្ដថា ក្រសួងសាធារណៈការ និងដឹកជញ្ជួនត្រូវមានផែនការថវិកាច្បាស់លាស់ ក្នុងការចុះត្រួតពិនិត្យ ហើយមន្ដ្រីដែលត្រួតពិនិត្យត្រូវតែមានសិទ្ធគ្រប់គ្រាន់មិនត្រូវរងសម្ពាធ ឬកាបសង្កត់ពីអ្នកអំណាចពីក្រុមហ៊ុនរកស៊ីដឹកជញ្ជួនធំៗនោះទេ ។
លោកថា "កន្លងមកយើងឃើញហើយថាមានក្រុមហ៊ុនច្រើនណាស់សូម្បីតែរឿងការជិះរថយន្ដ ការសន្ដោងដាក់ទំនិញលើសកម្រិតកំណត់នៅតាមរថយន្ដធំៗ ហើយធ្វើឲ្យរងការប៉ះពាល់ចំពោះមន្ដ្រីចុះត្រួតពិនិត្យដោយសារតែក្រុមអ្នកមានអំណាចមួយចំនួនមានការពុករលួយ អញ្ចឹងការអនុវត្ដន៍មិនសូវមានប្រសិទ្ធភាពទេ " ។
នៅក្នុងលិខិតរបស់ក្រសួងសាធារណៈការ និងដឹកជញ្ជួនអះអាងជាថ្មីថា សិទ្ធក្នុងការអនុវត្ដន៍ត្រួតពិនិត្យការដឹកជញ្ជួន និងអាជ្ញាធរមានសមត្ថកិច្ចត្រួវទទួលស្គាល់ និងធានាការពារ ។ ប៉ុន្ដែសិទ្ធនេះត្រូវយកមកអនុវត្ដក្នុងក្របខណ្ឌច្បាប់ និងទៅតាមបទដ្ឋានគតិយុត្ដិហើយសិទ្ធនេះមិនត្រូវប្រើប្រាស់ដោយរំលោភដែលនាំឲ្យប៉ះពាល់ដល់សិទ្ធសេរីភាព និងកិត្ដិយសរបស់អ្នកដ៏ទៃដែលគោរពច្បាប់ឡើយ ៕
VOD
ដោយ៖ ឡេង ចាន់រតនា | ថ្ងៃសៅរ៍ ទី21 កុម្ភៈ 2015, 09:06 AM
No comments:
Post a Comment