 |
| រូបភាពប្រជាពលរដ្ឋឈរតវ៉ាករណីជម្លោះដីធ្លី ជាមួយក្រុមហ៊ុនសិលាដាមិច(រូបថត៖ បូ សាវី ) |
ការព្រមាននេះ ធ្វើឡើងបន្ទាប់ពីពលរដ្ឋប្រហែល៥០នាក់ ទៅដេកចាំដីរយៈពេលពីរយប់ ដើម្បីការពារ កុំឲ្យក្រុមហ៊ុនសិលាដាមិចនោះ យកគ្រឿងចក្រឈូសឆាយដីពួកគាត់ ។
ពលរដ្ឋនៅភូមិស្របាល ឃុំភ្នំពេញ ស្រុកគូលែន អ្នកស្រី លឹម ស្មាន ប្រាប់VODនៅព្រឹកថ្ងៃអាទិត្យនេះ កាល ពីថ្ងៃទី២១ ខែកុម្ភៈ អាជ្ញាធរស្រុកគូលែន និងអភិបាលរង ខេត្ដព្រះវិហារ ប្រាប់ប្រជាពលរដ្ឋ មិនឲ្យរារាំងគ្រឿងចក្រក្រុមហ៊ុនសិលាដាមិច ដែលប្រើគ្រឿងចក្រឈូសឆាយដីចំការពួកគាត់នោះទេ បន្ទាប់ពីពួកគាត់ប្រហែល៥០នាក់ដេកយាមការពារដីចំការចំពួកគាត់រយៈពេលពីរថ្ងៃ ។ អ្នស្រីបន្ថែមថា អាជ្ញាធរទាំងនោះ បានព្រមានថា នឹងចាប់ខ្លូនពួកគាត់ដាក់ពន្ធនាគារ បើហ៊ានឃាត់គ្រឿងចក្រមិនឈូសឆាយ ។ ពួកគាត់ខកចិត្ដនឹងអាជ្ញាធរដែលប្រើពាក្យសំដីបែបនេះនិងបានត្រឡប់ទៅផ្ទះវិញទាំងភ័យខ្លាច ។
ពលរដ្ឋមួយរូបទៀត លោក ស៊ូ សាយ ឲ្យដឹងថា ដីជម្លោះនោះពួកគាត់កាន់កាប់និងធ្វើចំការតាំងពីរ ដូនតាមក ។ លោកថា អាជ្ញាធរប្រដាប់ដោយកាំភ្លើងនិងខ្នោះដៃ ខណៈដែលសន្ដិសុខប្រដាប់ដោយដំបង ដើម្បីរារាំងពលរដ្ឋមិនឲ្យតវ៉ា ។ លោកបន្ថែមថា អាជ្ញាធរទាំងនោះប្រាប់ឲ្យធ្វើការឲ្យក្រុមហ៊ុនប្រសើជាងធ្វើចំការ ។ ទោះជាយ៉ាងនេះក្ដីលោកថា បើសិនអាជ្ញាធរមិនមានដំណោះស្រាយទេនោះពួកគាត់ធ្វើការតវ៉ានិងចូលកាន់កាប់ដីចំការពួកគាត់បន្ដទៀត ។
ករណីនេះអភិបាលស្រុកគូលែន លោក ប៉ាង យាត មានប្រសាសន៍ថា ពលរដ្ឋដែលតវ៉ានោះ ពួកគេមកពីចំង៉ាយដែលលោកថា ដីនោះអាជ្ញាធរបានបែងចែកឲ្យពលរដ្ឋនៅតំបន់នោះរួចហើយ ចំណែកការមកតវ៉ានោះពួកគាត់ធ្វើតាមការញុះញង់ពីអ្នកដដៃដែលបង្កឲ្យកើតមានបញ្ហា ។
អ្នកសម្របសម្រួលសមាគមការពារសិទ្ធិមនុស្ស អាដហុក ខេត្ដព្រះវិហារ លោក ឡោ ចាន់ មានប្រសាសន៍ថា ករណីជម្លោះដីធ្លីរវាងពលរដ្ឋនិងក្រុមហ៊ុន នៅខេត្ដព្រះវិហារក្នុងឆ្នាំ២០១៥ មានការកើនឡើងបើប្រៀបធៀប និងដើមឆ្នាំ២០១៤កន្លងមក ដោយសារអាជ្ញាធរមិនមានដំណោះស្រាយជូនពលរដ្ឋ និងក្រុមហ៊ុន មិនអនុវត្ដតាមបទបញ្ជា០០១របស់ប្រមុខរដ្ឋាភិបាលក៍ដូចសេចក្ដីប្រកាសរបស់អន្ដរក្រសួង ។
បើតាមសមាគមការពាសិទ្ធិមនុស្ស អាដហុកខេត្ដព្រះវិហារ ឲ្យដឹងថា នៅដើមឆ្នាំ២០១៥នេះ ស្ថាប័ននេះទទួលបានពាក្យបណ្ដឹងពីពលរដ្ឋចំនួន៤ករណី ក្នុងនោះមានពលរដ្ឋ មកពីស្រុករវៀង ស្រុកជាំក្សាន្ដ និងស្រុកគូលេន ខណៈដែលពាក្យបណ្ដឹងជាច្រើនទៀតនៅឆ្នាំ២០១៤មិនទាន់មានដំណោះស្រាយនៅឡើយ ៕
VOD
ដោយ៖ បូ សាវី | ថ្ងៃអាទិត្យ ទី22 កុម្ភៈ 2015
No comments:
Post a Comment