 |
| លោកនាយករដ្ឋមន្រ្តី ហ៊ុន សែន កាលពីកន្លងទៅ |
លោកនាយករដ្ឋមន្រ្តីប្រតិកម្មបែបនេះ ក្រោយមានការរិះគន់ថាលោក ហ៊ុន សែន បានប្រើអំណាចបំពានលើអំណាចតុលាការ ក្នុងករណីចាប់ខ្លួនឪពុកម្តាយរបស់លោកថោង សារ៉ាត់ មកដាក់ពន្ធនាគារវិញ។
ក្នុងពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រង លោកនាយករដ្ឋមន្រ្តី ហ៊ុន សែន មានប្រសាសន៍ថាអ្នកខ្លះថាលោកល្អ តែអ្នកខ្លះថាលោកកំពុងតែបំពានអំណាចតុលាការ។ លោកបានបដិសេធនឹងការចោទប្រកាន់នេះ ដោយស្នើឲ្យពិនិត្យទំនាក់ទំនងរវាងអំណាចទាំងបី គឺអំណាចនីតិបញ្ញត្តិ នីតិប្រតិបត្តិ និងតុលាការ។ លោកបញ្ជាក់ថាអំណាចទាំងបីមានទំនាក់ទំនងជាមួយគ្នា មិនអាចដាច់ពីគ្នាបានទេ។
លោកនាយករដ្ឋមន្រ្តីឲ្យដឹងទៀតថាវាជារឿងប្រសើរមួយ ដែលចាប់សេះមកវិញ ក្រោយពេលសេះរួចចេញពីក្រោល។ លោកបានរិះគន់សង្គមស៊ីវិល និងអំពាវនាវកុំឲ្យតាំងខ្លួន«អង្គុយលើក្បាលរដ្ឋាភិបាល»។ លោកបន្តថាសង្គមស៊ីវិលមួយចំនួនកំពុងតែតាំងខ្លួនខ្ពស់ជាងអំណាចរដ្ឋសភា រដ្ឋាភិបាល និងតុលាការ។
គួររំឮកថា ថ្មីៗនេះ មជ្ឈមណ្ឌលសិទ្ធិមនុស្សកម្ពុជា(CCHR)សម្តែងការព្រួយបារម្ភចំពោះការដកតំណែងអតីតប្រធានសាលាដំបូងរាជធានី ភ្នំពេញលោក អាំង មាលតី ដោយមានភាពប្រញាប់ប្រញាល់ បន្ទាប់ពីលោកនាយករដ្ឋមន្ត្រីស្នើសុំឧត្តមក្រុមប្រឹក្សានៃអង្គសចៅក្រមស៊ើបអង្កេតសំណុំរឿងដោះលែងឪពុក ម្តាយលោកថោង សារ៉ាត់។ វិចារណៈកថាព័ត៌មានរបស់CCHR ចេញផ្សាយកាលពីថ្ងៃទី ២២ ខែកុម្ភៈ បានលើកឡើងថាCCHRមានការព្រួយបារម្ភយ៉ាងខ្លាំងទៅលើឥទ្ធិពលហួសហេតុនៃស្ថាប័ននីតិប្រតិបត្តិទៅលើការបំពេញមុខងាររបស់តុលាការ ។
អ្នកសម្របសម្រួលគម្រោងកំណែទម្រង់ប្រព័ន្ធតុលាការនៃCCHRលោក សួន ប៊ុនធឿន មានប្រសាសន៍ថា "ទោះបីជាមានសញ្ញាបង្ហាញថាការដោះលែងលោក ថោង ចំរើន និងអ្នកស្រី កែវ សាវី អាចបណ្តាលមកពីការអនុវត្តខុសនីតិវិធីនៅក្នុងតុលាការកម្ពុជាក្តី ក៏ឧត្តមក្រុមប្រឹក្សានៃអង្គសចៅក្រមត្រូវតែជាស្ថាប័នឯករាជ្យ ។ យើងខ្ញុំសង្ឃឹមថាអ្វីដែលយើងកំពុងឃើញនោះគឺជាឯករាជ្យភាពតុលាការ ពិតប្រាកដមិនមានការឆ្លុះបញ្ចាំងពីការជ្រៀតជ្រែកហួសហេតុរបស់ស្ថាប័ននីតិប្រតិបត្តិទៅក្នុងប្រព័ន្ធតុលាការ " ។
គួរបញ្ជាក់ថា កាលពីថ្ងៃទី ១៨ ខែ កុម្ភៈ ឆ្នាំ ២០១៥លោក តាំង ស៊ុនឡាយ ត្រូវបានព្រះមហាក្សត្រតែងជាប្រធានសាលាដំបូងរាជធានីភ្នំពេញ ជំនួសតំណែងលោក អាំង មាលតី អតីតប្រធានសាលាដំបូងរាជធានីភ្នំពេញ៕
VOD
ដោយ៖ ស៊ុន ណារិន និងជន ស្រីណុច | ថ្ងៃចន្ទ ទី23 កុម្ភៈ 2015
No comments:
Post a Comment