អ្នកនាំពាក្យកងរាជអាវុធហត្ថលើផ្ទៃប្រទេសលោក ខេង ទីតូ បានប្រាប់VODនៅរសៀលថ្ងៃសុក្រនេះថា សំណុំរឿងលោក ពេជ្រ ព្រហ្មមុន្នី ត្រូវបានបញ្ជូនទៅចៅក្រមស៊ើបសួរដើម្បីចាត់ការតាមនីតិវីធីច្បាប់បន្ត បន្ទាប់ពីព្រះរាជអាជ្ញារង លី សុផាន់ណា ដែលកាន់សំណុំរឿងនេះបានបញ្ចប់ការសាកសួរ ។
លោក ខេង ទីតូ បានឲ្យដឹងដែរថា លោក ពេជ្រ ព្រហ្មមុនី ដែលជានាយរងសេនាធិការនៃអគ្គបញ្ជាការកងទ័ពជើងគោកក្រសួងការពារជាតិ និងជាមនុស្សជិតស្និទ្ធិនឹងអតីតប្រធានសលាដំបូងរាជធានីភ្នំពេញ លោក អាំង មាលតី ត្រូវបានកងរាជអាវុធហត្ថលើផ្ទៃប្រទេសចាប់ខ្លួននៅក្នុងខេត្តតាកែវ កាលពីម្សិលមិញ និងបញ្ជូនខ្លួនទៅសាលាដំបូងភ្លាមដើម្បីធ្វើការសាកសួរទាំងយប់ ក្រោមបទចោទ ជ្រៀតជ្រែកការងារសាធារណៈ និងប្រើប្រាស់ស្លាកលេខ ខ.ម ។ បន្ទាប់ពីការសាកសួរ លោក ពេជ្រ ព្រហ្មមុន្នី ត្រូវបានបញ្ជូនខ្លួនទៅឃុំខ្លួនបណ្ដោះនៅទីបញ្ជាការដ្ឋានកងរាជអាវុធហត្ថ ហើយត្រូវបាននាំមកសាកសួរបន្តនៅថ្ងៃនេះ ។
ក្រោយការសាកសួរក្នុងថ្ងៃនេះ នៅម៉ោងប្រមាណ៦និង១០នាទីល្ងាច លោក ពេជ្រ ព្រហ្មមុន្នី ត្រូវបានដឹកចេញពីសាលាដំបូងរាជធានីភ្នំពេញដោយរថយន្តរបស់កងរាជអាវុធហត្ថ ។ មន្ត្រីនៅសាលាដំបូងរាជធានីភ្នំពេញមួយរូបដែលសុំមិនបញ្ចេញឈ្មោះឲ្យដឹងថា លោក ពេជ្រ ព្រហ្មមុន្នី ត្រូវបានបញ្ជូនទៅឃុំខ្លួនបណ្ដោះអាសន្ននៅទីបញ្ជាការដ្ឋានកងរាជអាវុធហត្ថរាជធានីភ្នំពេញ ។
គួរបញ្ជាក់ថា ការចាប់ខ្លួនលោក ពេជ្រ ព្រហ្មមុន្នី ដែលជាមនុស្សស្និទ្ធនឹងអតីតប្រធានតុលាការក្រុងភ្នំពេញ លោក អាំង មាលតី ធ្វើឡើងបន្ទាប់ពីលោក អាំង មាលតី ត្រូវបានដកចេញពីតំណែងជាប្រធានតុលាការកាលពីរសៀលថ្ងៃទី១៨ ខែកុម្ភៈ ពាក់ព័ន្ធនឹងសំណុំរឿងដោះលែងឪពុកម្តាយលោក ថោង សារ៉ាត់ ឲ្យនៅក្រៅឃុំ ៕
VOD
ដោយ៖ អុិត សូធឿត និងយ៉ា រសាត់ | ថ្ងៃសុក្រ ទី20 កុម្ភៈ 2015, 06:39 PM
No comments:
Post a Comment