 |
| លោក ប៉ាវ ស៊ីណា មេដឹកនាំសហជីព (រូបភាពកន្លងមក រូបថត៖ Krishan) |
ប្រធានសម្ព័ន្ធសហជីពចលនាកម្មករលោក ប៉ាវ ស៊ីណា ប្រាប់ VOD នៅថ្ងៃនេះថា កាលពីថ្ងៃទី ១៦ ខែ កុម្ភៈ តំណាងសហជីពរបស់លោកចំនួន៣នាក់ត្រូវបានថៅកែក្រុមហ៊ុន BW(Beautiful Window) ដែលមានទីតាំងស្ថិតនៅតំបន់សេដ្ឋកិច្ចពិសេសសានតុង ខេត្តស្វាយរៀង ហៅជួបប្រជុំដើម្បីពិភាក្សាជ្រើសរើសតំណាងកម្មករប្រចាំរោងចក្រ ។ តែលោកប្រាប់ថា គ្រានោះភាគីរោងចក្រមិនបានជជែកពីការជ្រើសរើសតំណាងកម្មករនោះទេ បែរជាគំរាមឲ្យមន្ត្រីសហជីពរបស់លោកដកខ្លួនចេញពីសមាជិកសហជីពពីព្រោះថៅកែរោងចក្រមួយចំនួនរៃលុយគ្នាដើម្បីជួលឃាតករសម្លាប់រូបលោក ។
លោកមានប្រសាសន៍ថា "ក្នុងអង្គប្រជុំហ្នឹងកូនចៅខ្ញុំរាយការណ៍មកថា មេអើយខាងថៅកែនាយកគ្រប់គ្រងគាត់បានប្រាប់ថា បានគំរាមឲ្យពួកខ្ញុំដកខ្លួនចេញពីសហជីពឲ្យហើយ ណាមួយទៀត ខាងនាយកប្រាប់ថា ខាងថៅកែមួយចំនួនប្រចាំនៅតំបន់សេដ្ឋកិច្ចពិសេស មេតហាធេន បានរៃលុយគ្នាដើម្បីឃាតករមកសម្លាប់ខ្ញុំ(ប៉ាវ ស៊ីណា)" ។
ទោះជាយ៉ាងណាលោក ប៉ាវ ស៊ីណា បញ្ជាក់ថា លោកមិនមានការតក់ស្លុតឡើយពីព្រោះកន្លងទៅក៏ធ្លាប់មានអ្នកគំរាមសម្លាប់លោកដែរហើយលោកនៅបន្តសកម្មភាពបន្តទៀត ដើម្បីផលប្រយោជន៍កម្មករ ។ តែលោកអំពាវនាវឲ្យរដ្ឋាភិបាល និងក្រសួងមហាផ្ទៃស្វែងរកឃាតករពិតដែលសម្លាប់កម្មករនិងតំណាងសហជីពកន្លងមកយកមកផ្តន្ទាទោសតាមច្បាប់ដើម្បីកុំឲ្យថៅកែមួយចំនួនជួលឃាតករបានស្រេចតែចិត្ត និងរកស៊ីខុសច្បាប់នៅកម្ពុជា ។
បើតាមការអះអាងលោក ប៉ាវ ស៊ីណា នៅថ្ងៃចន្ទ សប្តាហ៍ក្រោយនេះលោកនឹងជួបជាមួយមន្ត្រី UN និងអង្គសង្គមស៊ីវិលមួយចំនួនទៀត ដើម្បីពិភាក្សាអំពីនីតិវិធីក្នុងការដាក់ពាក្យប្តឹងនិយោជកទាំងនោះ ៕
VOD
ដោយ៖ ឡាយ សាមាន | ថ្ងៃសៅរ៍ ទី21 កុម្ភៈ 2015, 03:19 PM
No comments:
Post a Comment