ថ្លែងក្នុងពិធីប្រគល់សញ្ញាបត្រដល់សិស្សនិស្សិតសាកលវិទ្យាល័យមួយក្នុងរាជធានីភ្នំពេញ នៅព្រឹកថ្ងៃទី ១៧ ខែកុម្ភៈនេះ លោកនាយករដ្ឋមន្ត្រី ហ៊ុន សែន មានប្រសាសន៍ថា តុលាការត្រូវតែចាត់វិធានការលើករណីពាក់ព័ន្ធនឹងបទឧក្រិដ្ឋនានា ដែលកើតមានកន្លងមក ជាពិសេសពាក់ព័ន្ធនឹងករណីបទឧក្រិដ្ឋរឿងឃាតកម្មទៅលើឧកញ៉ា អ៊ឹង ម៉េងជឺ និងករណីដោះលែងឪពុកម្តាយឧកញ៉ា ថោង សារ៉ាត់ ។ លោកអំពាវនាវដល់ឧត្តមក្រុមប្រឹក្សានៃអង្គចៅក្រម ឲ្យធ្វើសវនកម្មអធិការកិច្ចជាបន្ទាន់លើសំណុំរឿងមួយនេះ ដើម្បីស្វែងរកយុត្តិធម៌ ។
លោកមានប្រសាសន៍ថា «រដ្ឋាភិបាលបានប្រឹងដុតដៃដុតជើង បញ្ជាកម្លាំងដើម្បីតាមរកឃាតកសម្លាប់ឧកញ៉ា អ៊ឹង ម៉េងជឺ ។ ទីចុងបំផុតយើងសម្រេចចាប់បាននូវមួយសំបុក ។ រឿងដែលមិនយល់គឺនៅត្រង់ថា ឲ្យឪពុកម្តាយមេខ្លោងឃាតក ដែលបញ្ហាឃាតក ដែលជាប់ពិរុទ្ធភាពលើបទចោទនេះឲ្យនៅក្រៅឃុំ ហើយអានៅក្រៅឃុំនេះ បើធ្វើត្រូវនីតិវិធីវាមិនអីទេ ប៉ុន្តែវាខុសនីតិវិធីទៅទៀត» ។
លោកនាយករដ្ឋមន្ត្រី ហ៊ុន សែន ក៏បានច្រានចោលផងដែរនូវព័ត៌មានមួយចំនួនដែលបានលើកឡើងថា ការដោះលែងឪពុកម្តាយឧកញ៉ា ថោង សារ៉ាត់ មានលោកនៅពីក្រោយខ្នង ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ យល់ថាតុលាការគួរតែធ្វើការដោយឯករាជ្យ មិនមានសម្ពាធពីអ្នកមានអំណាច និងកុំយករឿងនយោបាយមកពាក់ព័ន្ធ ។ លោកបន្ថែមថា ប្រសិនបើតុលាការស៊ើបអង្កេតរកឃើញភស្តុតាងពិតប្រាកដ គួរធ្វើទៅតាមច្បាប់ ។ លោកបញ្ជាក់ថា «ខ្ញុំគ្រាន់តែចង់ផ្តល់យោបល់ថា ការស៊ើបអង្កេតត្រូវធ្វើឲ្យភាពឯករាជ្យ ហើយបើជនល្មើសហ្នឹងធ្វើខុសពិតប្រាកដមែន នោះយើងត្រូវគោរពច្បាប់ឲ្យបានត្រឹមត្រូវ សុំឲ្យមានរឿងនយោបាយ កុំឲ្យមានរឿងអ្វីៗផ្សេងទៀត ផលប្រយោជន៍ក្រុមនេះ ផលប្រយោជន៍ក្រុមនោះ យកទៅធ្វើជាមូលដ្ឋានក្នុងកាត់សេចក្តី» ។
ប្រធានក្រុមស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា យល់ថាការអំពាវនាវនេះមិនមែនជាច្បាប់ទេ គ្រាន់តែជាការលើកឡើងប៉ុណ្ណោះ ។ លោកថាអ្វីដែលសំខាន់ តុលាការត្រូវតែអនុវត្តច្បាប់ទាំងអស់គ្នាឲ្យមានប្រសិទ្ធភាព ។ ទោះជាយ៉ាងណា លោកបន្តថាការអំពាវនាវនេះ បង្ហាញឲ្យឃើញថា តុលាការចំណុះអ្នកមានអំណាច មិនស្ថិតនៅឯករាជ្យ ដោយធ្វើការតាមតែអ្នកមានអំណាចប៉ុណ្ណោះ ។ លោកថា «ខ្ញុំយល់ថា នេះជាការទទួលស្គាល់ថា តុលាការកម្ពុជាជាតុលាការមួយដែលចំណុះទៅលើអ្នកមានអំណាច ឥឡូវយើងគួរតែពិនិត្យមើលថា នៅពេលដែលនាយករដ្ឋមន្ត្រីនិយាយ បានតុលាការនោះកម្រើកទៅ បានឧត្តមក្រុមប្រឹក្សានៃអង្គចៅក្រុមហ្នឹងកម្រើកទៅ ។ វាបង្ហាញថា តុលាការដែលស្ថិតនៅក្រោមអំណាចបុគ្គល អំណាចនាយករដ្ឋមន្ត្រី អ៊ីចឹងគឺជាតុលាការមួយដែលមិនអាចធានាបាននូវការរកយុត្តិធម៌ឲ្យប្រជាជនទូទៅទេ» ។
ការអំពាវនាវរបស់លោកនាយករដ្ឋមន្ត្រី ធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ លោក លី សុខឡេង សម្រេចឲ្យឪពុកម្តាយឧកញ៉ា ថោង សារ៉ាត់ នៅក្រៅឃុំបណ្តោះអាសន្នកាលពីថ្ងៃទី៦ ខែកុម្ភៈ ។ ប៉ុន្តែកាលពីម្សិលមិញ តុលាការបញ្ជាឲ្យសមត្ថកិច្ចនាំខ្លួនឪពុកម្តាយឧកញ៉ា ថោង សារ៉ាត់ ទៅឃុំខ្លួននៅពន្ធនាគារព្រៃសឡើងវិញ បន្ទាប់ពីរកឃើញថា ជនសង្ស័យទាំងពីរនាក់នោះព្យាយាមរត់គេចទៅលាក់ខ្លួននៅប្រទេសវៀតណាម រំលោភលើសេចក្តីសម្រេចឲ្យនៅក្រៅឃុំបណ្តោះអាសន្ន ។
អ្នកស្រី កែវ សារី និងលោក ថោង ចំរើន ឪពុកម្តាយឧកញ៉ា ថោង សារ៉ាត់ ឧត្តមសេនីយ៍ទោនៃកងយុទ្ធពលខេមរភូមិន្ទ មានកំណើតជាជនជាតិវៀតណាម និងជាថៅកែបុរី៩៩៩នេះ ត្រូវតុលាការបញ្ជាឲ្យឃុំខ្លួននៅពន្ធនាគារព្រៃសម្តងហើយ កាលពីចុងឆ្នាំ២០១៤ ចោទពីបទរក្សា និងប្រើប្រាស់អាវុធខុសច្បាប់ បន្ទាប់ពីសមត្ថកិច្ចឆែកឆេរ រកឃើញអាវុធវែងខ្លីច្រើនដើម ក្រោយពីលោកឧកញ៉ា ថោង សារ៉ាត់ រងការចោទថា ជាមេគំនិតរៀបចំគម្រោងសម្លាប់ឧកញ៉ា អ៊ឹង ម៉េងជឺ កាលពីថ្ងៃទី២២ ខែវិច្ឆិកា ឆ្នាំ២០១៤ ៕
VOD
ដោយ៖ ឡាយ សាមាន | ថ្ងៃអង្គារ ទី17 កុម្ភៈ 2015, 12:14 PM
No comments:
Post a Comment