ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យមួយក្នុងរាជធានីភ្នំពេញ នៅព្រឹកថ្ងៃទី ១៧ ខែកុម្ភៈម្សិលមិញ លោកនាយករដ្ឋមន្ត្រី ហ៊ុន សែន បានរិះគន់ប្រព័ន្ធតុលាការកម្ពុជាថា មិនបានចាត់វិធានការដោយត្រឹមត្រូវ និងយុត្តិធម៌លើករណីពាក់ព័ន្ធនឹងបទឧក្រិដ្ឋនានា ជាពិសេសការដោះលែងឪពុកម្ដាយលោកឧកញ៉ាថោង សារ៉ាត់ ដែលសាលាឧទ្ធរណ៍បានបដិសេធពាក្យសុំនៅក្រៅឃុំ ហើយសំណុំរឿងកំពុងបញ្ជូនទៅតុលាការកំពូល ប៉ុន្តែបែរជាចៅក្រមសាលាដំបូងសម្រេចដោះលែងទៅវិញ។ លោកមានប្រសាសន៍ថា «ហើយអាច្បាប់ហ្នឹង ក្រែងលោច្បាប់ក្រដាស់មួយរយ ហើយមួយរយតាវាម៉ាលានសន្លឹក ថាត្រឹមតែហាសិបម៉ឺនសន្លឹកចុះ វាត្រូវប្រាំលាន»។
កន្លងទៅឧកញ៉ា ថោង សារ៉ាត់ បានផ្សាយខ្សែអាត់សំឡេងមួយ អំពាវនាវឲ្យលោកនាយករដ្ឋមន្ត្រីហ៊ុន សែនជួយអន្តរាគមន៍ករណីដែលចោទថា លោកជាប់ពាក់ព័ន្ធនឹងការធ្វើឃាតលោកឧកញ៉ា អ៊ឹង ម៉េងជឺ ក្នុងខ្សែអាត់សំឡេងនោះឧកញ៉ាថោង សារ៉ាត់ អះអាងថា ប្រើប្រាស់លុយរាប់ម៉ឺនដុល្លារលើប្រព័ន្ធតុលាការ។ លោកលើកឡើងថា «ទៅខ្ចីគេខ្ចីឯង លក់គ្រឿងអលង្ការមួយចំនួនដែលនៅសល់ ដើម្បីយកទៅដូរតូឲ្យតុលាចាយវាយខ្ចាតខ្ចាយរាប់សិបម៉ឺនដុល្លារក្នុងរយៈពេលប៉ុន្មានថ្ងៃ ហើយប៉ាម៉ាក់ខ្ញុំអត់បានចេញហើយ គេយកទៅទៀត ទារច្រើនណាស់ គាត់ហួងហែងស៊ីគ្រួសារខ្ញុំតែម្តង វាអាក្រក់ខ្លាំងណាស់»។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ថា ប្រជាពលរដ្ឋទូទាំងប្រទេសបានដឹងថា មានអំពើពុករលួយក្នុងប្រព័ន្ធតុលាការនេះយូរមកហើយ។ លោកបន្តថា អ្វីដែលដែលប្រជាពលរដ្ឋចង់ឃើញ គឺការកែទម្រង់ជាប្រព័ន្ធ និងវិស័យអទិភាពផ្សេងៗ ដូចដែលសង្គមស៊ីវិលបានរកឃើញ។ លោកព្រាប កុល បន្តថា ការបង្ក្រាបអំពើពុករលួយនេះ មិនមែនធ្វើម្តងម្កាលនោះទេ គឺត្រូវធ្វើជាប្រចាំ ជាប្រព័ន្ធ ដូចភ្លៀងរលឹម ទើបមានប្រសិទ្ធភាព។
យោងតាមស្រាវជ្រាវរបស់អង្គការតម្លាភាពកម្ពុជា និងការស្រាជ្រាវរបស់អង្គការមូលិធិអាស៊ី ស្តីពីអំពើពុករលួយនៅកម្ពុជាបានឲ្យដឹងថា អំពើពុករលួយក្នុងប្រព័ន្ធតុលាការស្ថិតក្នុងលំដាប់ទី១ ស្ថាប័ននគរបាលស្ថិតក្នុងលំដាប់ទី២ និងសេវាសាធារណៈស្ថិតក្នុងលំដាប់ទី៣។
VOD
ដោយ៖ ថោ ស៊ីណា | ថ្ងៃពុធ ទី18 កុម្ភៈ 2015
No comments:
Post a Comment