ប៉ិច សុធារី
 |
| កញ្ញា ធី សុវណ្ណាថា អមពីខាងក្រោយដោយលោក ស្រី ចំរើន ដែលល្បីខាងប្តីងរឿងអាស្រូវស្នេហា នៅក្នុងកម្មវិធីវេទិកាសាធារណៈកម្លងមក។ រូបថត សហការី |
ភ្នំពេញ៖(ខ្មែរថាមស៍)សហព័ន្ធនិស្សិតបញ្ញវន្តកម្ពុជា ស្នើរដ្ឋមន្ត្រីក្រសួងមហាផ្ទៃ ពិនិត្យ និងមានវិធានការផ្លូវច្បាប់ទៅលើសកម្មភាពរបស់ កញ្ញា ធី សុវណ្ណថា ប្រធានអង្គការយុវជនកិច្ចការសង្គម ក្នុងករណីមានការប្រព្រឹត្តផ្ទុយនឹងច្បាប់ស្ដីពីសមាគម និងអង្គការមិនមែនរដ្ឋាភិបាល ខណៈដែលកញ្ញាតែងប្រើប្រាស់វេទិកាសាធារណៈរបស់ខ្លួន ទៅរិះគន់ និងវាយប្រហារទៅលើគណបក្សនយោបាយមួយជាប់ជាប្រចាំ។
ក្នុងលិខិតរបស់ លោក ឡេង សេងហុង ប្រធានសហព័ន្ធនិស្សិតបញ្ញវន្តកម្ពុជា ចុះថ្ងៃទី១៦សីហា ជូនលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានលើកឡើងថា ក្នុងនាមជាប្រធានអង្គការ កញ្ញា ធី សុវណ្ណថា តែងបានធ្វើសកម្មភាពតាមរយៈវេទិកាសាធារណៈរបស់ខ្លួន និងបង្ហោះលើ Facebook ធ្វើការស្ទង់មតិ បរិហាររិះគន់ និងវាយប្រហារទៅលើគណបក្សប្រឆាំង ជាប់ជាប្រចាំ ដែលធ្វើឲ្យមជ្ឈដ្ឋាននានាផ្ដោតការសង្ស័យថា សកម្មភាពទាំង នោះ អាចប្រព្រឹត្តផ្ទុយនឹងមាត្រា៤ នៃច្បាប់ស្ដីពីសមាគម និងអង្គការមិនមែនរដ្ឋាភិបាល និងប្រកាសរបស់ក្រសួងមហាផ្ទៃ ស្ដីពីការចុះឈ្មោះក្នុងបញ្ជីអង្គការមិនមែនរដ្ឋាភិបាល។
លិខិតដដែល បានស្នើថា៖ «សូមសំណូមពរសម្តេចមេត្តាពិនិត្យមើល និងមានវិធានការផ្លូវច្បាប់ទៅលើសកម្មភាពរបស់កញ្ញា ធី សុវណ្ណថា ប្រធានអង្គការយុវជនកិច្ចការសង្គម (ក្នុងករណីមានការប្រព្រឹត្តល្មើសច្បាប់ និងលិខិតបទដ្ឋានគតិយុត្តិនានាជាធរមាន)»។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានមានប្រសាសន៍ថា ក្រុមមន្ត្រីជំនាញកំពុងពិនិត្យមើលផ្លូវច្បាប់ លើករណីនេះហើយ តែលទ្ធផលយ៉ាងណានោះ នៅពុំទាន់បានដឹងនៅឡើយ។
លោកថា៖ «សម្តេចលោកបានណែនាំឲ្យជំនាញពិនិត្យបញ្ហាហ្នឹងហើយ មុនលិខិតហ្នឹងមកដល់ទៀត ចាំមើលជំនាញគេពិនិត្យធ្វើការវាយតម្លៃរឿងនេះសិន»។
កញ្ញា ធី សុវណ្ណថា ប្រធានអង្គការយុវជនកិច្ចការសង្គម មិនអាចសុំការអធិប្បាយបានទេនៅថ្ងៃម្សិលមិញនេះ។
ការស្នើរបស់សហព័ន្ធនិស្សិតបញ្ញវន្តកម្ពុជា បានធ្វើឡើងខណៈដែលសាធារណជន មើលឃើញថា កញ្ញា ធី សុវណ្ណថា បានរៀបចំវេទិកាសាធារណៈជិត ៣០នៅតាមបណ្តាខេត្តនានា ក្នុងនាមជាប្រធានអង្គការយុវជនកិច្ចការសង្គម ដែលក្នុងវេទិកានោះ កញ្ញាបានធ្វើការស្ទង់មតិប្រជាពលរដ្ឋ និងរិះគន់ធ្ងន់ៗទៅលើថ្នាក់ដឹកនាំរបស់គណបក្សសង្គ្រោះជាតិ ព្រមទាំងបានបង្ហោះវីដេអូសកម្មភាពវេទិកានោះនៅលើបណ្ដាញសង្គម Facebook របស់កញ្ញាផងដែរ។
អ្នកប្រើប្រាស់បណ្ដាញសង្គម Facebook ព្រះតេជគុណ អុន ស៊ិន បានមានសង្ឃដីកា comment នៅលើទំព័រ Facebook របស់កញ្ញាថា អង្គការ មិនអាចដើរនយោបាយបម្រើបក្សណាមួយឡើយ គឺត្រូវមានសុចរិតភាពបម្រើប្រជាពលរដ្ឋដោយស្មោះត្រង់ និងមិនលម្អៀងនិន្នាការនយោបាយណាមួយឡើយ។
ព្រះអង្គបានបញ្ជាក់ថា៖ «ឈប់បានឈប់ទៅ កុំយកឈ្មោះអង្គការជាឈ្នាន់នយោបាយលម្អៀងទៅម្ខាង ខាងបក្សកាន់អំណាចអី វាមិនត្រឹមត្រូវទេ»៕
No comments:
Post a Comment