ដោយ ៖វិបុល
(ភ្នំពេញ) ៖ ភរិយារបស់លោកបណ្ឌិត កែម ឡី អ្នកស្រីប៊ួ រចនា និងកូនៗទាំងបួននាក់ បានចាកចេញពីប្រទេសកម្ពុជាហើយកាលពីថ្ងៃទី២៨ សីហា។
ព្រះតេជព្រះគុណ ប៊ុត ប៊ុនតិញ ដែលជាសមាជិកគណៈកម្មការរៀបចំបុណ្យសពលោកបណ្ឌិត កែម ឡីមានថេរដីកាប្រាប់វិទ្យុក្រៅស្រុកមួយថា អ្នកស្រី ប៊ួ រចនា និងកូនៗបានទៅដល់ទីកន្លែងសុវត្ថិភាពហើយ ប៉ុន្តែព្រះអង្គមិនអាចបញ្ជាក់ប្រាប់ថាទៅនៅប្រទេសណានោះទេ។
ព្រះតេជព្រះគុណបន្ថែមថា នៅមុនពេលអ្នកស្រី ប៊ួ រចនា និងកូនៗបានចាកចេញពីប្រទេសកម្ពុជា អ្នកស្រី ប៊ួ រចនាបានធ្វើលិខិតផ្ទេរសិទ្ធិឲ្យគណៈកម្មការរៀបចំបុណ្យសព ដើម្បីសុំឲ្យធ្វើបុណ្យសព១០០ថ្ងៃ ជូនស្វាមីអ្នកស្រី គឺលោកបណ្ឌិត កែម ឡី។
ព្រះតេជព្រះគុណ ប៊ុត ប៊ុនតិញ បន្ថែមថា បុណ្យសពគម្រប់ ១០០ថ្ងៃនេះ នឹងធ្វើរយៈពេលបីថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែតុលា ខាងមុខ។ ពិធីបុណ្យសព១០០ថ្ងៃនេះ ព្រះអង្គមានថេរដីកាថា គណៈកម្មការមិនទាន់សម្រេចថានឹងធ្វើនៅរាជធានីភ្នំពេញឬនៅខេត្តតាកែវ នោះទេ។ ការកំណត់ទីតាំងនេះ គឺអាស្រ័យលើប្រជាពលរដ្ឋភាគច្រើនជាអ្នកសម្រេច ថាតើចង់ធ្វើនៅទីតាំងវត្តចាស់រាជធានីភ្នំពេញ ឬធ្វើនៅខេត្តតាកែវ នោះ៕
No comments:
Post a Comment