ស៊ូ វុទ្ធី
 |
| កញ្ញា មុន្នីពិសី ក្នុងថ្ងៃខួបកំណើត។ ហ្វេសប៊ុក |
ភ្នំពេញ: តារាសម្តែងស្រីលេចឈ្មោះលើវិថីសិល្បៈ តោងកាលីបបងស្រីជីដូនមួយជាកំពូលតារាចម្រៀង ពីរោះទាំងសំនៀង និងល្បីទាំងទឹកចិត្តមនុស្សធម៌អ្នកនាង មាស សុខសោភា កញ្ញា សុខ មុន្នីពិសី ទម្លាយភាពស្ងប់ឈឹងពីការងារសិល្បៈទាំងវ័យក្មេងខ្ចី លើទស្សនីយភាពសម្ញែងដើមទ្រូងស្ទើរនឹងលេចឃើញកំពូលភ្នំ ទាំងមិនញញើតការរិះគន់ និងបម្រាមពីក្រសួងនោះ។
តារាសម្តែងមាឌធំដំបង ដែលកំពុងក្រសោបបានប្រជាប្រិយភាពពីអាជីពសិល្បៈ កញ្ញា សុខ មុន្នីពិសី កាលពីរាត្រីថ្ងៃទី ១៥ ខែសីហា បានចំណាយលុយខ្ទង់ពាន់ដុល្លារ ធ្វើពិធីខួបកំណើតក្នុងវ័យ ២៤ ឆ្នាំ នៅក្នុងហាងមួយនៅក្នុងផ្សារ អ៊ីអនម៉ល។ បើទោះជាការធ្វើនោះក្នុងភាពស្ងៀមស្ងាត់ ប៉ុន្តែគេឃើញមានការចូលរួមពីភ្ញៀវដែលជាតារាសិល្បៈច្រើនគួរសមដែរ ពិសេសវត្តមានបងស្រីជីដូនមួយនាង អ្នកនាង មាស សុខសោភា និងកវី មាស សុខរតនៈនោះ។
នៅក្រោយការបញ្ចប់ពិធីខួបកំណើត តារាសម្តែងនាង សុខ មុន្នីពិសី មិនត្រឹមតែមហាជនចំណាំច្បាស់ថា នាងជាប្អូនស្រីជីដូនមួយនឹង មាស សុខសោភា ទេ នាងក៏ត្រូវបានគេប្រសិទ្ធនាមងារឲ្យភ្លាមៗដែរថា ជាកំពូលតារាសិចស៊ី ហ៊ានចំហទ្រូង បន្ទាប់ពីនាង ដេននី ក្វាន់។
មើលឃើញពីភាពសិចស៊ីចំហទ្រូងលេចចេញកូនភ្នំនៅកណ្តាលវាលនោះ ក៏ផ្ទុះចេញការរិះគន់ក្នុងបណ្តាញសង្គមហ្វេសប៊ុកថា តារាសម្តែងនាង សុខ មុន្នីពិសី មិនត្រឹមតែអត់ខ្វល់ពីការបើកភ្នែកសម្លឹង មើលភាពសិចស៊ីរបស់នាងនោះទេ តារារូបនេះថែមទាំងបញ្ចេញសា្នមញញឹម ហាក់ដូចជា គ្មានរឿងអ្វីកើតឡើង ចំពោះខ្លួននៅពេលមានមហាជនជាច្រើន ធ្វើការរិះគន់។
តែទោះយ៉ាងណាស្រីស្រស់មាឌដំបងវ័យ ២៤ ឆ្នាំ កញ្ញា សុខ មុន្នីពិសី បានប្រាប់ភ្នំពេញ ប៉ុស្តិ៍ ម្សិលមិញថា៖ «ចំពោះរឿងសិចស៊ីនេះ ខ្ញុំមិនបានគិតថា វាជារឿងហួសហេតុអីទេ»។
នាងបញ្ជាក់ថា៖ «ព្រោះថា ខ្ញុំស្លៀកពាក់នោះ វាជាកម្មវិធីផ្ទាល់ខ្លួនខ្ញុំ ខ្ញុំមិនបានស្លៀកពាក់ក្នុងកម្មវិធីឡើងឆាកខនសឺត ឬក៏សម្តែងផងហ្នឹង។ ខ្ញុំចង់ស្លៀកម៉េចក៏បានដែរ វាជាកម្មវិធីខ្ញុំនោះ»។
ស្រីស្រស់រូបនេះក៏អះអាងទៀតថា៖ «ម្យ៉ាងសម្លៀកបំពាក់ដែលខ្ញុំស្លៀកពាក់យប់ខួបកំណើតនោះ វាជារ៉ូបវែង មិនមែនជាបែបខើចលើ ខើចក្រោមឯណា គ្រាន់តែវាលដើមទ្រូងតែប៉ុណ្ណឹង»។
ជាមួយការលើកឡើងនោះ កញ្ញា សុខ មុន្នីពិសី ដែលច្រានចោលសម្ដីអេចអូចថា នាងធ្វើខួបកំណើតបានមានបុរសគូស្នេហ៍ចាំចំហហោប៉ៅចេញលុយនោះ នាងក៏ពោលឡើងទៀតថា៖ «ចំពោះការស្លៀកពាក់នោះ សិចស៊ីបន្តិចមែន ប៉ុន្តែមិនជាជ្រុលពេក ឬខ្លាចក្រសួងហៅណែនាំនោះទេ»។
តារាសម្ដែងស្រីរូបនេះបន្ថែមទៀតថា៖ «ខ្ញុំគិតថា វាមិនដល់ថ្នាក់ហ្នឹងទេ ហើយការស្លៀកពាក់របស់ខ្ញុំនេះ ក៏មិនមានការមិនពេញចិត្តណាមួយពីសាច់ញាតិខ្ញុំដែរ ព្រោះគាត់ក៏យល់ថា មិនជ្រុលដែរ និងជាកម្មវិធីផ្ទាល់ខ្លួនផង»៕
No comments:
Post a Comment