និពន្ធដោយ: ទេព អ៊ីវិសាល
លួងប្រាបាង-ឡាវ៖ យុវជនខ្មែរចំនួន១៤នាក់ដែលជាសមាជិកនៃគំនិតផ្តួចផ្តើម YSEALI របស់លោកប្រធានាធិបតីអាមេរិក បារ៉ាក់ អូបាម៉ា កំពុងជួបជុំគ្នាជាមួយយុវជនអាស៊ានជាង១៨០នាក់នៅក្នុងក្រុងលួងប្រាបាងនៃប្រទេសឡាវ។ នេះគឺជាជំនួបប្រចាំឆ្នាំរវាងយុវជនអាស៊ាន និងលោកប្រធានាធិបតី បារ៉ាក់ អូបាម៉ា ដែលនឹងផ្តោតទៅលើការអភិវឌ្ឍប្រកបដោយនិរន្តរភាព។
យុវជនជាសមាជិកនៃគំនិតផ្តួចផ្តើមភាពជាអ្នកដឹកនាំវ័យក្មេងអាស៊ីអាគ្នេយ៍ (YSEALI) ជាង១៨០នាក់ ដែលក្នុងនោះក៏មានយុវជនកម្ពុជាដែរនោះ និងជួបជាមួយលោកប្រធានាធិបតីអាមេរិក បារ៉ាក់ អូបាម៉ា នៅរសៀលថ្ងៃពុធទី៧ខែកញ្ញានេះ។ នៅថ្ងៃអង្គារនេះ ពួកគេកំពុងចាប់ផ្តើមវគ្គបណ្តុះបណ្តាលដែលមានរយៈពេល៣ថ្ងៃ។ នាថ្ងៃដំបូងនៃជំនួបកំពូលប្រចាំឆ្នាំនេះ យុវជនYSEALI បានស្តាប់ការពន្យល់អំពីបញ្ហាប្រឈមសកលនៃការអភិវឌ្ឍ ដែលត្រូវបានថ្លែងដោយប្រធានបេសកម្ម USAID លោកស្រី Beth Paige។
បញ្ហាប្រឈមរួមមានទាំងការជួញដូរសត្វព្រៃ បំរែបំរួលអាកាសធាតុ ការគ្រប់គ្រងទីក្រុង ទិសដៅនៃការអភិវឌ្ឍប្រកដោយនិរន្តភាព និងបញ្ហាប្រឈមក្នុងតំបន់ និងពិភពលោកផ្សេងទៀត សុទ្ធសឹងតែ ត្រូវបានលើកឡើងតាមរយៈសុន្ទរកថារបស់លោកស្រី Beth Paige ដើម្បីចែករំលែកទៅកាន់យុវជនរបស់YSEALI។
ក្រៅពីការយល់ដឹងពីបញ្ហាប្រឈមសកលនៃការអភិវឌ្ឍប្រកបដោយនិរន្តភាព នាថ្ងៃដំបូងនៃជំនួបរយៈពេលបីថ្ងៃរបស់YSEAL យុវជនប្រមាណជិត២០០នាក់នោះ ក៏ទទួលការបណ្តុះបណ្តាលពាក់ព័ន្ធការផ្សារភ្ជាប់ប្រពៃណីជាមួយនឹងបណ្តាញសង្គម ការធ្វើគម្រោង និងការអនុវត្តគម្រោងដើម្បីឆ្លើយតបទៅនឹងបរិបទជនបទ និងការគ្រប់គ្រងថវិកាដើម្បីអនុវត្តប្រកបដោយប្រសិទ្ធភាពផងដែរ ដែលត្រូវបានធ្វើបង្ហាញដោយអ្នកជំនាញនៃវិទ្យាស្ថានសាធារណៈរដ្ឋអន្តរជាតិនៃសហរដ្ឋអាមេរិក(IRI)។
សូមជម្រាបផងដែរ ជំនួបកំពូលប្រចាំឆ្នាំ YSEALI ២០១៦ ដែលធ្វើឡើងនៅតំបន់បុរាណ និងវប្បធម៌ Luang Prabang នៃប្រទេសឡាវនឹងចាប់ផ្តើមពីថ្ងៃទី៦ដល់ថ្ងៃទី៨ ខែកញ្ញា ដោយផ្តោតលើបញ្ហាការអភិវឌ្ឍប្រកបដោយនិរន្តភាព និងគម្លាតនៃការអភិវឌ្ឍ៕
No comments:
Post a Comment