ដោយ៖ សុផល
(តូក្យូ)៖មន្ត្រីជាន់ខ្ពស់នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍របស់ជប៉ុនបានលើកឡើងថាជប៉ុនចង់ជួយកម្ពុជាដើម្បីសាងសង់បណ្តាញរថភ្លើងស្វ័យប្រវត្តិ យូរីកាម៉ូម៉ិ ក្នុងគោលបំណងជួយបញ្ចៀសការកកស្ទះចរាចរណ៍នៅរាជធានីភ្នំពេញ។
លោកកាវ៉ាហ្គូជី អ៊ីហ្ស៊ូមី ប្រធានការិយាល័យផែនការដឹកជញ្ជូនក្នុងទីក្រុង នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូននិងទេសចរណ៍របស់ជប៉ុនបានអះអាងប្រាប់អ្នកកាសែតកម្ពុជាដែលបានធ្វើទស្សនកិច្ចនៅទីក្រុងតូក្យូកាលដើមខែកញ្ញាឆ្នាំ២០១៦ថា៖រដ្ឋាភិបាលជប៉ុនត្រៀមជួយកម្ពុជាជានិច្ចក្នុងការដាក់ឲ្យដំណើរការរថភ្លើងប្រភេទយូរីកាម៉ូម៉ិ(Yurikamome) នេះពីកណ្តាលរាជធានីភ្នំពេញទៅអាកាសយានដ្ឋានអន្តរជាតិភ្នំពេញ។
លោកអ៊ីហ្ស៊ូមី បានឱ្យដឹងថាភាគីជប៉ុនបានពិភាក្សាជាមួយរដ្ឋមន្ត្រីក្រសួងសាធារណការនិងដឹកជញ្ជូនកម្ពុជារួមទាំងលោកអភិបាលរាជធានីភ្នំពេញផងដែរ។ បច្ចុប្បន្ន ភ្នាក់ងារសហប្រតិបត្តិការកម្ពុជាជប៉ុនចៃកា( JICA) កំពុងតែសិក្សា ហើយលោករំពឹងថាអ្វីៗនឹងដំណើរការទៅមុខ ដើម្បីរួមចំណែកកាត់បន្ថយការកកស្ទះចរាចរណ៍នៅរាជធានីភ្នំពេញ។
ទាក់ទងនឹងទឹកប្រាក់វិនិយោគ អ្នកជំនាញជប៉ុនរូបនេះមិនបានវាយតម្លៃយ៉ាងណានោះឡើយពីព្រោះលោកចាំមើលផែនការមេនិងការស្ទង់មតិជាមុនសិន។
សូមបញ្ជាក់ផងដែរថា កាលពីពេលថ្មីកន្លងមកនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថាការកកស្ទះចរាចរណ៍មិនត្រឹមតែជាបញ្ហាប្រឈមរបស់រាជធានីភ្នំពេញទេ តែវាជាកត្តារារាំងដល់ការអភិវឌ្ឍន៍សេដ្ឋកិច្ចរបស់កម្ពុជាផងដែរ។លោកក៏បានបង្ហើបផងដែរថា ជប៉ុនតាមរយៈទីភ្នាក់ងារ JICA កំពុងសិក្សាលើគម្រោង «រថភ្លើងស្វ័យប្រវត្តិ»ពីភ្នំពេញទៅព្រលានយន្តហោះអន្តរជាតិ៕
No comments:
Post a Comment