CEN
ដោយ: ឧត្តម
ភ្នំពេញ: ក្រសួងការបរទេសនិងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានចេញសេចក្តីប្រកាសព័ត៍មានកាលពីថ្ងៃទី០៩ ខែកញ្ញា ឲ្យដឹងថា ស្ថានបេសកកម្មអចិន្ត្រៃយ៍ នៃព្រះរាជាណាចក្រកម្ពុជា ប្រចាំមន្ទីរអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ បានធ្វើការប្រឆាំងយ៉ាងម៉ឹងម៉ាត់ចំពោះខ្លឹមសារនៃកំណត់ហេតុសារព័ត៍មានរបស់លោកស្រី រ៉ាវីណា ស្សាំដាសានី អ្នកនាំពាក្យនៃឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស កាលពីថ្ងៃទី០៦ ខែកញ្ញា ឆ្នាំ២០១៦។
ក្រសួងការបរទេសកម្ពុជាបានបន្តថា ក្នុងខ្លឹមសារនៃកំណត់ហេតុអ្នកនាំពាក្យបានលើកឡើងអំពី “បរិយាកាសគម្រាមកំហែង” “មូលដ្ឋាននៃភស្តុតាងដាក់បន្ទុកមានភាពទន់ខ្សោយ” “កំហុសឆ្គងនីតិវិធី” ហើយថែមទាំង “ជម្រុញឲ្យអាជ្ញាធរគោរពតាមស្តង់ដារអន្តរជាតិ នៃការកាត់ក្តីប្រកបដោយយុត្តិធម៌” និង “រំលឹករដ្ឋាភិបាលអំពីកាតព្វកិច្ចការចាត់វិធានការធានាសុវត្ថិភាពដល់ពលរដ្ឋកម្ពុជា”។
ទី១ កំណត់ហេតុរបស់អ្នកនាំពាក្យខាងលើនេះមានខ្លឹមសារបញ្ច្រាស់គ្នាទៅនឹងការប្រកាសព័ត៍មានស្តីពីលទ្ធផលនៃជំនួប
ចុងក្រោយបបង្អស់រវាងលោកបាន គីមូន អគ្គលេខាធិការអង្គការសហប្រជាជាតិ និងសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានប្រព្រឹត្តទៅក្នុងកាលបរិច្ឆេទដូចគ្នា។ ទី២ សារធាតុនៃបញ្ហាដែលបានលើកឡើង គឺជាបញ្ហាផ្ទៃក្នុងរបស់កម្ពុជាសុទ្ធសាធ ហើយក្នុងនាមជារដ្ឋអធិបតេយ្យមួយដែលមានកាតព្វកិច្ចទទួលខុសត្រូវចំពោះពលរដ្ឋរបស់ខ្លួននោះ កម្ពុជាមិនអាចទទួលយកការមួលបង្កាច់ណាមួយចំពោះរដ្ឋាភិបាលស្របច្បាប់ ហើយក៏មិនទទួលបញ្ជា ឬទទួលយកការវិនិច្ឆ័យណាមួយពីតួអង្គបរទេសទាក់ទងនឹងស្ថាប័នតុលាការ និងដំណើរការប្រព្រឹត្តទៅនៃកិច្ចការរដ្ឋរបស់យើងដែរ។
រាជរដ្ឋាភិបាលកម្ពុជាសូមគូសបញ្ជាក់ពីការគោរពអំណាចនិងឯករាជ្យភាពរបស់ស្ថាប័នតុលាការនិងការធានាជាមូលដ្ឋានទៅលើសិទ្ធិ
របស់ពលរដ្ឋ។ ជាច្រើនលើករួចហើយ យើងបានពន្យល់យ៉ាងច្បាស់ថា រឿងក្តីដែលពាក់ព័ន្ធ គឺត្រូវបានដាក់បន្ទុកចំពោះតែបុគ្គលដែលបានប្រព្រឹត្តល្មើសច្បាប់ជាធរមានប៉ុណ្ណោះ។អ្នកនយោបាយ និងអង្គការក្រៅរដ្ឋាភិបាលអាចអនុវត្ត តួនាទីរបស់ពួកគេរៀងៗខ្លួនចំពោះពលរដ្ឋដោយសេរី ឈរលើគោលការណ៍នីតិរដ្ឋដោយមិនមានករណីលើកលែងណាមួយឡើយ។
ទាក់ទងនឹងបរិយាកាសរៀបចំការបោះឆ្នោតស្ថានបេសកកម្មអចិន្ត្រៃយ៍សូមទាញចំណាប់អារម្មណ៍សាធារណៈមតិ
ចំពោះកិច្ចខិតខំប្រឹងប្រែងយ៉ាងងខ្លាំងក្លា និងប្រកបដោយសង្គតិភាព របស់អាជ្ញាធរពាក់ព័ន្ធ ដើម្បីធានាបាននូវការបោះឆ្នោតដោយសេរី និងយុត្តិធម៌។ ក្នុងគោលដៅនេះ គួរកត់សម្គាល់ផងដែរថា គណៈកម្មាធិការជាតិរៀបចំការបោះឆ្នោត (គជប) ត្រូវបានកែទម្រង់ទាំងបទដ្ឋានច្បាប់ និងស្ថាប័ន តួយ៉ាងតាមរយៈការអនុម័តច្បាប់ពីរ គឺច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងច្បាប់ស្តីពីការរៀបចំ និងការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោត កាលពីឆ្នាំ២០១៥។បន្ថែមលើនេះ ក្រោយពីបានសម្រេចកំណត់យកថ្ងៃទី០៤ ខែមិថុនា ឆ្នាំ២០១៧ ជាថ្ងៃបោះឆ្នោតជ្រើសរើសក្រុមប្រឹក្សា សង្កាត់ រួចមក បច្ចុប្បន្ននេះ គ.ជ.ប កំពុងតែធ្វើការចុះឈ្មោះបោះឆ្នោតតាមប្រព័ន្ធកំព្យូរទ័រ ដែលដំណើរការនោះបាននិងកកំពុងប្រព្រឹត្តទៅប្រកបដោយបរិយាកាសសន្តិភាព ចាប់តាំងពីដើមខែកញ្ញាមកម្ល៉េះ៕
No comments:
Post a Comment