ដោយ: ដាវុធ
ភ្នំពេញ: រដ្ឋមន្ត្រីក្រសួងបរិស្ថាន បានស្នើឱ្យ USAID ពិចារណាផ្តល់ការគាំទ្រ ដល់មន្ត្រីឧទ្យានុរក្ស ដែលមានភារកិច្ចចម្បង ក្នុងការការពារ និងអភិរក្សធនធានធម្មជាតិ ជាពិសេស ការកសាងសមត្ថភាព មន្ត្រីឧទ្យានុរក្ស តាមរយៈកម្មវិធីបណ្តុះបណ្តាលផ្សេងៗ។
ការលើកឡើងបែបនេះ នៅល្ងាចថ្ងៃទី៨ ខែកញ្ញា ឆ្នាំ២០១៦ លោក សាយ សំអាល់ រដ្ឋមន្ត្រីក្រសួងបរិស្ថាន បានអនុញ្ញាតឱ្យអ្នកស្រី Polly Dunford នាយកបេសកកម្ម ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) និងសហការី ចូលជួបសម្តែងការគួរសម ក្នុងខណ:ដែលអ្នកស្រី ទើបត្រូវបានតែងតាំង ឱ្យមកបំពេញការងារ នៅព្រះរាជាណាចក្រកម្ពុជា។
លោករដ្ឋមន្ត្រី បានលើកឡើង អំពីវឌ្ឍនភាពការងារការពារ និងអភិរក្សធនធានធម្មជាតិ ក្រោយពីរាជរដ្ឋាភិបាល បានកែសម្រួលភារកិច្ច រវាងក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ។
អ្នកស្រី Polly Dunford បានសម្តែងនូវការកោតសសើរ ចំពោះកិច្ចខិតខំប្រឹងប្រែង របស់ថ្នាក់ដឹកនាំ និងមន្ត្រីរាជកា នៃក្រសួងបរិស្ថាន ក្នុងការធ្វើទំនើបកម្មស្ថាប័ន និងការអបអរសាទរ ចំពោះសមិទ្ធផលនានា ក្នុងការការពារ និងអភិរក្សធនធានធម្មជាតិ ដែលក្រសួងទទួលបានមកដល់បច្ចប្បន្ន ហើយអ្នកស្រី បានលើកឡើងនូវ ការបន្តកិច្ចសហប្រតិបត្តិការ និងផ្តល់ការគាំទ្រដល់ ក្រសួងបរិស្ថាន ដើម្បីរួមចំណែកដល់ ការពង្រឹង និងពង្រីកវឌ្ឍនភាព ការងារបន្ថែមទៀត៕
No comments:
Post a Comment