ការអះអាងនេះ ធ្វើឡើងបន្ទាប់ពីមន្ត្រីក្រសួងមហាផ្ទៃព្រមានចាត់វិធានការតាមផ្លូវច្បាប់ បើលោក អាឡិច មិនព្រមចាកចេញពីកម្ពុជា ពេលទិដ្ឋាការរបស់លោកផុតកំណត់ ។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា ពន្យល់ក្នុងកម្មវិធីតុមូលVOD កាលពីថ្ងៃពុធម្សិញមិញថា លិខិតឆ្លងដែនរបស់លោក អាឡិចនឹងត្រូវផុតកំណត់នៅថ្ងៃទី២០ ខែកុម្ភៈស្អែកនេះ តែលោកអាឡិច អាចបន្តស្នាក់នៅកម្ពុជាបាន ដោយមិនបាច់ទៅសុំបន្តទិដ្ឋាការថ្មី ដោយត្រូវបង់ប្រាក់ពិន័យ៥ដុល្លារក្នុង១ថ្ងៃ ។ លោកថា លោកអាឡិច គឺជាជនបរទេសមិនមែនអន្តោប្រវេសន៍ ដែលក្រសួងមហាផ្ទៃមិនអាចយកច្បាប់អន្តោប្រវេសន៍ ទៅអនុវត្តលើបុគ្គលនោះបានទេ ។
លោក នី ចរិយា បញ្ជាក់ថា បើក្រសួងមហាផ្ទៃចាប់បញ្ជូនលោកអាឡិចចេញពីម្ពុជា នោះនឹងធ្វើឲ្យប៉ះពាល់ដល់មុខមាត់រដ្ឋាភិបាល ព្រមទាំងប្រយោជន៍ប្រទេសជាតិ ។ លោកមានប្រសាសន៍ថា «ការដេញអាឡិចមួយ វាមិនប៉ះពាល់តែអាឡិចតែម្នាក់ឯង អាឡិចម្នាក់ឯងគ្រាន់តែជាមនុស្សម្នាក់ក្នុងចំនោមមនុស្សរាប់លាននាក់ក្នុងពិភពលោក ចុះថ្ងៃណាមួយលោតាវិនិយោគទុនដែលគេមក ស្រាប់តែគេនឹងប្រឆាំងអំពើពុករលួយនៅក្នុងប្រទេសកម្ពុជា យើងមិនសប្បាយចិត្តនឹងអំពើប្រឆាំងអំពើពុករលួយ អត់ឲ្យវីសាគេថាតើវិនិយោគ លុយដែលគេយកមកវិនិយោគរាប់ពាន់លានអី គេអាចដោះស្រាយបានទេ អាហ្នឹងគឺជាបញ្ហាមួយធំណាស់ដែលបង្ហាញឲ្យវិនិយោគទុនបរទេសគេលែងមានជំនឿទៅលើរដ្ឋាភិបាល»។
មន្ត្រីនាយកដ្ឋានជនបរទេសមិនអន្តោប្រវេសន៍ លោក សុខ វាសនា មានប្រសាសន៍ថា នៅថ្ងៃ២០ខែកុម្ភៈស្អែកនេះ លិខិតឆ្លងដែនលោកអាឡិចត្រូវផុតកំណត់ ។ លោកបន្តថា បើផុតកំណត់៣០ថ្ងៃ តាមអនុក្រឹត្យ ត្រូវចាប់បញ្ជូនជនមិនមែនអន្តោប្រវេសន៍នោះចេញពីកម្ពុជា ។ លោកលើកឡើងថា «តាមច្បាប់របស់យើង អនុក្រិតយើង វាលើស៣០ថ្ងៃគាត់ត្រូវតែបង់ផាកពិន័យ ហើយចាប់បញ្ជូនចេញ អត់មានបញ្ហា ឬក៏យើងមិនបានហាមឃាតថាអត់ឲ្យគាត់ចូលវិញទេ ចឹងគាត់មានសិទ្ធិគ្រាន់តែផុតទិដ្ឋាការហ្នឹង ឲ្យគាត់អញ្ជើញចេញ ហើយមានសិទ្ធិចូលមកវិញសុំទិដ្ឋាការថ្មីម្តងទៀត»។
នៅថ្ងៃព្រហស្បតិ៍នេះ លោក អាឡិច ប្រាប់VODថា បើរដ្ឋាភិបាលពិតជាចង់ឲ្យលោកចាកចេញពីកម្ពុជា នោះលោកនឹងចាកចេញ ។ តែលោកមិនមានជំនឿថា បានត្រឡប់មកកម្ពុជាវិញទេ ។
កាលពីថ្ងៃទី១៦ ខែកុម្ភៈ ប្រធានគណបក្សសង្គ្រោះជាតិលោក សម រង្ស៊ី បានចេញលិខិតមួយផ្ញើទៅរដ្ឋមន្ត្រីក្រសួងមហាផ្ទៃ លោក ស ខេង ឲ្យជួយបន្តទិដ្ឋាការស្នាក់នៅក្នុងទឹកដីកម្ពុជាដល់លោកអាឡិច ដើម្បីជួយការពារធនធានធម្មជាតិនៅកម្ពុជា ។ កាលពីថ្ងៃពុធម្សិលមិញ រដ្ឋមន្ត្រីស្តីទីនៃក្រសួងមហាផ្ទៃលោក ឯម សំអាន បានចេញលិខិតឆ្លើយតបនឹងករណីនេះដែលមានខ្លឹមសារថា ក្រសួងតម្រូវឲ្យលោក អាឡិច ចាកចេញពីកម្ពុជាមួយរយៈសិន តែលោកអេឡិចអាចត្រឡប់មកសុំទិដ្ឋាការស្នាក់នៅកម្ពុជាជាថ្មីវិញនៅពេលណាក៏បាន ព្រោះក្រសួងមិនមានគោលការណ៍ណាមួយហាមមិនឲ្យជនបរទេសរូបនេះស្នាក់នៅកម្ពុជានោះទេ។
ដោយឡែកអនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភាលោក កឹម សុខា ក៏បានផ្ញើលិខិតមួយទៅប្រធានរដ្ឋសភាលោក ហេង សំរិន និងមួយទៀតផ្ញើថ្វាយព្រះមហាក្សត្រដែលមានខ្លឹមសារដូចគ្នា គឺសុំឲ្យអន្តរាគមន៍ទៅស្ថាប័នពាក់ព័ន្ធជួយបន្តទិដ្ឋការដល់លោកអាឡិចបានស្នាក់នៅក្នុងទឹកដីកម្ពុជា ដើម្បីជួយការពារធនធានធម្មជាតិនៅកម្ពុជា តែមិនទាន់មានការឆ្លើយតបយ៉ាងណានៅឡើយទេ ។
តាមការស្ទង់មតិតាមរយៈហ្វេសប៊ុករបស់VODចំនួន២ថ្ងៃនេះឃើញថា៩៩ភាគរយ នៃអ្នកលេងហ្វេសប៊ុកជាង៤០០០នាក់ មិនយល់ស្របនឹងការសម្រេចរបស់រដ្ឋាភិបាលកម្ពុជា ក្នុងការបណ្តេញសកម្មជនការពារបរិស្ថាននៅតំបន់អារ៉ែង លោក អាឡិច (Alex Gonzalez-Davidson) ចេញពីប្រទេសកម្ពុជាឡើយ ។
សូមជម្រាបថា លោក អាឡិច ជាជនជាតិអេស្ប៉ាញ បានមករស់នៅលើទឹកដីកម្ពុជានេះជាច្រើនឆ្នាំ ចេះនិយាយភាសាខ្មែរច្បាស់ និងបានបង្កើតសមាគមការពារព្រៃឈើមួយឈ្មោះថា មាតាធម្មជាតិ ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង ខេត្តកោះកុង៕
VOD
ដោយ៖ ណាត សុភាព | ថ្ងៃព្រហស្បតិ៍ ទី19 កុម្ភៈ 2015, 05:36 PM
No comments:
Post a Comment